Read Paite Chin MATTHAI 15 Bible Online

MATTHAI 15 - Paite Chin bible

MATTHAI 15

¹Huailai in, Jerusalem khua a om Pharisaite leh laigelhmite Jesu kiang ah a hongpai ua,

²“Bangdia na nungzuite upate thugousiah a talek nak uh ahia? Tanghou a nek chiang un a khut uh a sil ngeikei uh” a chi uhi.

³Jesu’n a kiang uah, “Nou leng bangdia na thugousiah ziak ua Pathian thupiak a talek na hi ua?

⁴Pathian in, ‘Na nu leh na pa zahtak in, kuapeuh a nu hiam a pa hiam gensia si ngeingei heh’ a chi hi.

⁵Nou bel, ‘kuapeuh a nu hiam a pa hiam kiang a, n’on zatna ding Pathian kiang a piak a hih peuhmah chiang in,

⁶a nu leh a pa a zah ding ahi nawnkei’ na chi uhi. Huchi in na thugousiah ziak un Pathian thu bangmahlou na suah uhi.

⁷Nou lepchiahte, Isai in na tungtang thu uh a na genkhol dik mahmah hi:

⁸‘Hiai mite’n a kam un a honzah ua, a muk un a honphat ua, himahleh a lungtang un a hon gamlat uhi chi in,

⁹Himahleh, a thuhilhna ua mihing thupiak a hilh ziak un a hon biak uh a thawn mai ahi.’ ” chi in, a dawng hi.

¹⁰Huan mipi a sam a a kiang uah, “Ngaikhia unla, theisiam un;

¹¹Kam a lut in mihing a hihnin kei a; himahleh kam a pawt, huai ngei in mihing a hihnin zaw hi” a chi hi.

¹²Huailai in a nungzuite a hongpai ua, a kiang ah, “Pharisaite’n huai thu a zak ua a lungkimlouh dan uh na thei hia?” a chi uhi.

¹³Aman, “Kung tengteng ka Pa van a om suanlouh bohkhiak in a om ding.

¹⁴Amaute awlmoh kei un: mittaw makai ahi uh; huchi in mittaw in mittaw mah a pi leh kawkhuk ah a ke khawm ding uh” a chi a, a dawng hi.

¹⁵Huan Peter in a kiang ah, “Huai gentehna thu hon hilhchian in, chi in a dong hi.

¹⁶Aman, “Tutan a nou leng thei nailou lai na hi umaw?

¹⁷Kam a lut peuhmah gil ah a lutsuk a, dailenna ah paihkhiak in a om chih na theikei ua hia?

¹⁸Kam a pawtte bel lungtang a kipan a hongpawt ahi ua: huaite ngeingei in mihing a hihnin nak hi.

¹⁹Lungtang a kipan ngaihtuahna giloute, tualthahna, angkawmna, kingaihna, guktakna, hekna, gensiatna a hongpawt nak hi;

²⁰Huaite ahi mihing hihnin; khut sillou a annek in mi a hihnin kei” a chi hi.

²¹Jesu hiai a kipan pawt in Tura leh Sidon uk ah a paita hi.

²²Huan ngai dih, huai gam a kipan Kanan numei khat a hongpai hi, “Toupa, David Tapa, ka tung ah zahngai in, ka tanu dawi in lungkhamhuaipi in a man” chi’n, a kikou hi.

²³Aman bel kam khat in leng a dawng kei hi. A nungzuite’n, “I nung ah a kikou kou a, paisak mai in” chi in a hong gen uhi.

²⁴Aman bel, “Israel inkaw nam lak a belam mangte kiang loungal ah sawl ka hi kei” a chi a, a dawng hi.

²⁵Himahleh numei a hongpai a, “Toupa honhuh in” chi in, a bia hi.

²⁶Huan aman, “Tate tanghou laksak a, uite kiang a paih a kilawm kei” a chi a, a dawng hi.

²⁷Numei in, “Toupa, hihzaw ahi tham hi; himahleh, uite’n leng a pu uh dohkan a kipan a tanghou nen kia a nezel sam ve ua oi” a chi hi.

²⁸Huaitak in Jesu’n a kiang ah, “Numei, na ginna thupi na tel e; na deih bangtak in na tung ah om hen” a chi a, a dawng a, huchi in a tanu huai hun ngei in a damta hi.

²⁹Jesu huai a kipan a pai a, Galili dil kiang a hongtung a: tang ah a paitou a, huai ah a tuta hi.

³⁰Huchi in mipi tampi a kiang uah a hong ua, khebaite, mittawte, pautheiloute, piangsualte leh midang tampi a honpi ua aman amaute a na hihdam chiat hi.

³¹Mipite’n pautheiloute hong pau a, piangsualte hong hoih a, khebaite khe a pai a, mittawte’n hon mutheita uh chih a muh un lamdang a sa mahmah ua; huchi in Israelte Pathian a phatta uhi.

³²Huchi in Jesu’n a nungzuite a sam a, “Mipite ni thum ka kiang ah a omta ua, nekding bangmah a neihlouh ziak un, ka lainat mahmah; anngawl in ka paikik sak utkei hi, huchilou in zaw lamkal ah a bahse kha ding uh” a chi hi.

³³Nungzuite’n a kiang ah, “Mipi hiai zahzah vahna khop tanghou huai zahzah gamdai ah koi a kipan i mu dia?” a chi uhi.

³⁴Huan Jesu’n a kiang uah, tanghou phel bangzah na nei ua? a chi hi. Amau a kiang ah, phel sagih, nga neu tawmchik toh” a chi uhi.

³⁵Huan aman lei a tu ding in mipite thu a pia a.

³⁶Huan tanghou phel sagih leh ngate a la a, kipahthu a gen in, a balkham a, nungzuite kiang ah a pia a, huan nungzuite’n mipite kiang ah a pe sawn uhi.

³⁷Huan avek un a ne ua, a vah chiatta ua; a khamval nen uh bawmpi sagih a dim hi.

³⁸A nete tuh numei leh naupang simlouh in, piching ngen sang li ahi uhi.

³⁹Huan mipite a sawlmang nung in Jesu long ah a tuang a, Magadan gam a hongtungta hi.