Read Paite Chin MATTHAI 16 Bible Online

MATTHAI 16 - Paite Chin bible

MATTHAI 16

¹Huaizoh in Pharisaite leh Saddukaite a hongpai ua, amah ze-etna ding in van a kipan chiamtehna amaute ensak ding in a ngen uhi.

²Aman a kiang uah, “Nitaklam a hong hih in, khua a pha dia ading meisan a suak, na chinak uhi.

³Huan zingsang in, tuni’n khua se dia ading e, meisan a suak a, a niamkai, na chinak uh. ‘Van omdan na theisiam ngal ua, himahleh, hun chiamtehnate na theisiam theikei uhi.’

⁴Khang gilou leh angkawmte’n chiamtehna a zong ua, himahleh, Jonah chiamtehna loungal a kiang uah chiamtehna piak a hi kei ding” chi in, a dawng hi. Huan amaute paisan in a pawtkheta hi.

⁵Huan nungzuite galkhat lam a tun un tanghou a paw mangngilh ua,

⁶Jesu’n a kiang uah, “Pharisaite leh Saddukaite silngou lak ah kiveng unla, pilvang un” a chi hi.

⁷Amau, “Tanghou i puaklouh ziak uh eive” chi’n a kingaihtuah uhi.

⁸Jesu’n huai a thei a, “Ginglahte aw, bang a chia tanghou na neihlouh ziak ua kingaihtuah na hi ua?

⁹Tu nangawn in na lungsim un na thei naikei lailai umaw? Mi sang nga nek tanghou phel nga leh, a khamval uh bawmpi bangzah na dimsak zah uh na theigige kei ua hia?

¹⁰Mi sang li nek tanghou phel sagih leh, a khamval uh bawmpi bangzah hiam na luahdim uh chih theilou maw?

¹¹Tanghou thu na kiang ua genlou in, Pharisaite leh Saddukaite silngou apan pilvang un, chih gen ka hizaw chih bang a chia theilou na hi ua?” a chi hi.

¹²Huaitak in tanghou silngou lak a pilvang ding in a sawlkei a, Pharisaite leh Saddukaite thuhilhna apan pilvang ding in amau a sawlzaw chih a theita uhi.

¹³Kaisaria uk a Philippi mun a hongtun in Jesu’n a nungzuite kiang ah, “Mite’n Mihing Tapa kua ahi a chi ua?” chi in, a dong hi,

¹⁴Amau, “khenkhat in, Baptispa Johan ahi, a chi ua; khenkhat in, Elijah ahi, a chi ua; khenkhat in, Jeremiah hiam zawlnei kuahiam ahi” a chi uh, a chi uhi:

¹⁵Aman a kiang uah, “Ahihleh, nou kua ka hi n’on chi ua?” a chi hi.

¹⁶Simon Peter in, “Khrist Pathian Hing Tapa na hi” chi in a dawng hi.

¹⁷Jesu’n a kiang ah, “Simon, Bar Jonah, hampha chia; sa leh sisan in a hon theihsak na hi kei a, ka Pa van a om hon theihsak na hizaw hi.

¹⁸K’on hilh ahi, nang Peter na hi, hiai suangpi tung ah ka saptuam ka lamtou ding a, misi khaw kulh kongkhakte’n hiai a zoukei ding uh.

¹⁹Van gam tahbite k’on pe ding a, leitung ah bangpeuh na hen van ah leng hen ahi ding a, leitung ah bangpeuh na phel van ah leng phel ahi ding” a chi hi.

²⁰Huaizoh in Khrist ahi chih kuamah hilhlou ding in nungzuite a chi bikbek hi.

²¹Huai nung in Jerusalem a a pai ding dan, upate, siampu liante, laigelhmite apan thil tampi a thuak ding dan leh hihlup a a om ding dan, ni thum ni a kaihthoh a a om ding dan Jesu’n a nungzuite a theisak panta hi.

²²Huai phet in Peter in amah a pituam a; “Toupa, hi kei hen! Huaite na tung ah tung ngeikei hen!” chi in, a taihilh hi.

²³Jesu a kihei a, Peter kiang ah, “Setan, ka nung ah pai in; kei a di’n pukna na hi; Pathian thilte ngaihtuahlou in mihing thilte na ngaihtuah zaw hi” a chi hi.

²⁴Jesu’n a nungzuite kiang ah, “Kuapeuh in a hon zuihnop leh amah ki mangngilh in, a Kros pua in honzui hen.

²⁵Kuapeuh a hinna humbit ut in a tan ding a; kuapeuh keimah ziak a a hinna tan in a humbit ding hi.

²⁶Min khovel a pum in nei henla, a hinna tan leh amah ading in bang a phatuam dia? Ahihkeileh min a hinna sik in bang a pethei dia?

²⁷“Mihing Tapa a angelte toh, a Pa thupina a kizem a a hongpai ding ziak in. Huai hun chiang in michih a nasep bang un a dinchiat ding hi.

²⁸Chihtaktak in k’on chi hi, hiai a ding akhente, Mihing Tapa a gam a hongpai a muh masiah uh, sihna chiamlou hial ding a om uh” a chi hi.