Read Paite Chin MATTHAI 18 Bible Online

MATTHAI 18 - Paite Chin bible

MATTHAI 18

¹Huailai tak in nungzuite Jesu kiang ah a hongpai ua, “Van gam ah kua a thupipen dia?” a chi uhi.

²Huan aman naupang neuchik a sam a; a lak uah a dingsak hi.

³“Chihtaktak in k’on chi ahi, na lamdan ua, naupang neuchik bang n’ong hih kei uleh, van gam ah na lut kei hial ding uh.

⁴Huchi in kuapeuh hiai naupang neuchik bang a kingainiam, huai mi van gam ah a thupipen ding a chi hi.

⁵Huan kuapeuh ka min ziak a hichibang naupang neuchik khat kipahpih keimah hon kipahpih ahi.

⁶“Himahleh hiai hon gingta neuchikte lak a khat leng hihpuk, a ngawng ah buhgawizanna suang lianpi oksak in tuipi thuklai ah khemang le uh amah ading in a hoihzaw ding hi.

⁷Puknate ziak in khovel tung a gik hi; puknate bel om ding him ahi a; himahleh pukna omsakpa tung a gik hi.

⁸“Huan na khut hiam, na khe hiam, in hon hihpuk leh, tankhia inla, paimang in; khut nih leh khe nih nei a tangtawn mei a paih a om sang in, piangsual hiam khebai hiam a hinna a lut nang ding in a hoihzaw hi.

⁹Huan na mit in a hon hihpuk leh khelkhia inla, paimang in; mit lang nih nei a Gehenna mei a paih a omsang in, mit langkhat nei a hinna a lut nang ading in a hoihzaw hi.

¹⁰“Hiai mineute lak a khat leng simmohlou ding in pilvang un, a angelte un van ah ka Pa van a om mel a en gige uh chih k’on hilh ahi.

¹¹Mihing Tapa mangthangte zong ding a hongpai ahi him ahi.

¹²Bangchi na sa ua? Mi kuapeuh in belam za nei henla, a lak ua khat vakmangta leh sawmkua leh kuate nusia in, tang a pai in, a mang pen a zong kei dia hia?

¹³Chihtaktak in k’on hilh ahi, a muhnawn zenzen leh sawmkua leh kua vakmangloute tung ah sang in, tua belam tung ah a kipak zaw ding hi.

¹⁴Huchi mah bang in hiai mineute lak a khat manthat na Pa uh van a om deihlam a hi kei hi.

¹⁵“Huan na unau in na tung ah thil a hihkhelh leh pai inla, amah leh nang kia theih in a khelhna hilh in; a hon ngaihkhiak leh na unau na zou ahi ding.

¹⁶A hon ngaihkhiak kei leh midang khat hiam nih hiam na kiang ah na pi dia, huchi in thu chiteng theihpih mi nih hiam thum hiam kam a hihkip a a om theihna ding in.

¹⁷Huan amau leng a ngaihkhiak nopkei lai leh, saptuamte kiang ah tun in. Huan saptuamte leng a ngaihkhiak nopkei leh, amah tuh nang ding in Jentel leh siahkhawnmi bang hi hen.

¹⁸Chihtaktak in k’on hilh ahi, leitung ah bangpeuh na hen uh, van ah hen ahi ding. Huan leitung a na phel uh, van ah leng phel ahi ding hi.

¹⁹Chihtaktak in k’on hilhnawn hi. Leitung ah na lak ua mi nih a thil nget ua a kithutuah uleh, ka Pa van a om hihsak in a om ding uh.

²⁰Mi nih hiam thum hiam ka min a a kikhopna peuh uah a lak uah ka om zel hi” a chi hi.

²¹Huailai in Peter a hongpai a, “Toupa, ka unau in bangzah vei ahia ka tung ah hihkhial leh ka ngaihdam ding? Sagihvei tan in ahi diam?” a chi hi.

²²Jesu’n a kiang ah, Sagihvei tan k’on chikei a, “Sagihvei mun sawmsagih tan,” k’on chi zaw ahi.

²³“Huaiziak in, van gam kumpipa kuahiam a sikhate kiang a a sumthu saifel tum toh tehpih ahi.

²⁴Huchi a sumthu honsai pattak in, mi khat talent sing khat ba a kiang ah a honpi uhi.

²⁵Huan piak ding a neihlouh ziak in, a pu in amah toh, a zi toh, a tate toh, a neih tengteng toh zuak a dit ding thu a pia hi.

²⁶Huchi in, sikha in Toupa, ‘ka tung ah zahngai tadih inla, avek in k’on pe ding, chi in khupboh in a bia hi.’

²⁷Huai sikhapa pu’n a hehpihta mahmah a, a khah a, a bat a ngaidamta hi.

²⁸Himahleh huai sikha a paikhia a, a sikha hihpihte lak a khat a makhai za khat ba a va mu a; amah a man a, na bat honpia in, chi in a gawlmek hi.

²⁹Huchi in a sikha hihpihpa’n khupboh in, ka tung ah zahngai tadih inla, k’on pe ding, chi in a ngen ngutngut hi.

³⁰Himahleh a utkei a; a bat a piak zoh masiah suangkulh ah a khumta hi.

³¹Huchi in, a sikha hihpihte’n a thilhih a muh un, poi a sa mahmah ua, a thilhih tengteng a Toupa uh a hilhta uhi.

³²Huaitak in a toupa’n amah a sam a, a kiang ah, sikha gilou, n’on nget ngutngut ziak a, n’on bat tengteng hon ngaidam ing a:

³³K’on hehpih bang in nang leng na sikha hihpih na hehpih sam ding hilou hia? a chi hi.

³⁴Huchi in a Toupa a thangpaita a, a bat tengteng a piak zoh masiah migawtte kiang ah a peta hi.

³⁵Michih in na lungtang tak ua na unaute uh na ngaihdam kei uleh ka Pa van a om in leng huchi mah bang in na tung uah a hih sam ding” a chi hi.