Read Paite Chin MATTHAI 19 Bible Online

MATTHAI 19 - Paite Chin bible

MATTHAI 19

¹Hichi ahi a, Jesu’n huai thute a gen zoh in, Galili gam a kipan a pawt a, Jordan luigal Judia gam ah a hoh hi.

²Mipi thupitak in a zui ua; amaute a hihdam zel hi.

³Huan Pharisaite a kiang ah a hong ua, amah ze-etna ding in, “Bangziak peuh in min a zi mak a siang hia?” a chi uhi.

⁴Aman, “A tung a kipan amau bawlpa’n numei leh pasal a bawl leh,

⁵Hiai ziak in pasal in a nu leh a pa a paisan ding a, a zi a len ding.

⁶Huchi in, a nih un sa pumkhat a hong hita ding uh, a chi chih na simkei ua hia? Huchi in nih ahita kei ua, sa pumkhat ahi zawta uhi. Huaiziak in Pathian in a gawmsa mihing in khenkei hen” chi in, a dawng hi.

⁷Amau bel a kiang ah “Ahihleh, bangdia Mosi in kimakna laipiak a mak ding chi a thupia ahia?” a chi uhi.

⁸Aman a kiang uah, “Mosi in na lungtang uh khauh ziak in eive na zite uh mak a phal; himahleh a tung a kipan huchibang ahi ngeikei hi.

⁹Ken zaw k’on chi ahi, kuapeuh kingaihna ziak hilou a, zi ma a midang nei angkawm ahi: maksa nei peuhmah leng angkawm ahi” a chi hi.

¹⁰Nungzuite’n a kiang ah, “A zi lam thu a pasal huchibang ahihleh kiten hoihkei” a chi uhi.

¹¹Aman a kiang uah, huai thu ahihleh, a piaknate kia loungal, mi napeuh in a pom theikei ding uh.

¹²Mi chilgeh, a nu gilsung ua kipan huchibang a piang himte a om ua; michilgeh, mihing khut a gehte leng a omsam ua; michilgeh van gam ziak a chilgeh a kibawltawmte leng a omsam uhi. Kuapeuh a pom thei in pom hen” a chi hi.

¹³Huailai in a tung ua a khutkoih a, a thumsak ding in, a kiang ah naupang neute a honpi ua; nungzuite’n a na tai uhi.

¹⁴Jesu’n, “Naupang neute ka kiang ah honsawl unla, khamkei un; van gam hichibang mite a ahi ngal a” a chi hi.

¹⁵Huan a tung uah a khut a koih a, huai apan in a paita hi.

¹⁶Huan mi khat a kiang ah a hong a, “Pu, tangtawn hinna ka neih theihna ding in thil hoih bang ka hih ding? a chi hi.

¹⁷Aman a kiang ah, “Thil hoih thu bangdia hon dong? Hoih khat kia a om; himahleh, hinna a na lut utleh thupiakte zui in” a chi hi.

¹⁸Aman a kiang ah, “A koipen maw?” a chi hi. Jesu’n, “Tual na thah ding ahi kei; Ang na kawm ding ahi kei; Na gu ding a hi kei; Na hek ding ahi kei;

¹⁹Na nu leh na pa zahtak in, chihte leh nangmah na ki-it bang in na vengte na it ding ahi chih” a chi hi.

²⁰Tangval in a kiang ah, “Huaite teng ka zui zel; bang ka samlai a?” a chi hi.

²¹Jesu’n a kiang ah, “Hoihkim a om na ut leh, pai inla, na neih tengteng zuak inla, mizawngte kiang ah pia in, huchi in, van ah gou na nei ding; huan, hongpai inla, honzui in” a chi hi.

²²Tangval bel huai thu a zak in lungkhamtak in a paimangta a, mi hausa a hih ziak in.

²³Jesu’n a nungzuite kiang ah, “Chihtaktak in k’on hilh ahi, mi hausa dia van gam lut haksa pi ahi.

²⁴Huan k’on hilh ahi, mi hausa Pathian gam a lut sang in sangawngsau phim bil a lutsuak a baihlam zaw” a chi hi.

²⁵Huan nungzuite’n huai a zak un, lamdang a sa mahmah ua, “Kua hotdam in a om zou dia?” a chi uhi.

²⁶Jesu’n amau a en a, a kiang uah, “Huai mihing hihvual a hi kei, Pathian a di’n bangkim hihtheih ahi” a chi hi.

²⁷Peter in a kiang ah, “Ngai dih, kou bangkim paisan in k’on zuita ua; bang ka mu ding ua?” chi in a dong hi.

²⁸Jesu’n a kiang ah, chihtaktak in k’on hilh ahi, “Khovel thak ah, Mihing Tapa a thupina tutphah a a tut chiang in, nou kei hon zuite, Israel nam sawmlehnihte tung a vaihawm in, mangtutphah sawmlehnih ah na tu sam ding uhi.

²⁹Huan michih a innte, a unaute, a sanggamnute, a pa, a nu, a tate, a gamte ka min ziak a paisan peuhmah tuh a leh za a mu ding ua, tangtawn hinna a tang ding uh.

³⁰Himahleh mi tampi, masapen a omte, nanungpen in a om ding uh; nanungpen a omte leng masapen in a om ding uh” a chi hi.