Read Paite Chin MATTHAI 2 Bible Online

MATTHAI 2 - Paite Chin bible

MATTHAI 2

¹Huan kumpipa Herod vaihawm lai a Judia gam a, Bethlehem khua a Jesu a hong pianlai in, ngai in, suahlam a kipan mipilte Jerusalem khua ah a hongpai uhi.

²“Koi ah ahia Judate Kumpipa a hong pian? Suahlam ah a Aksi ka mu ua, amah be dia hongpai ka hi uh” a chi uhi.

³Kumpipa Herod in huai a zakphet in a lungzing a, Jerusalem tengteng leng a lung uh a zing sam uhi.

⁴Huchi in, siampu liante leh mite Laigelhmi tengteng a samkhawm a, Khrist pianna ding thu a dongta hi.

⁵Huan, amau a kiang ah “Judia gam a Bethlehem khua ah; zawlnei in hichi in a gelh a kei hiam:

⁶‘Nang, Judia gam a Bethlehem aw, Judia khopite lak ah na neupen kei hial, na sung a kipan ukpa hongsuak ding ahi ngal a, ka mi Israelte vengpa ding in’ ” chih, a chi uhi.

⁷Huai nung in Herod in a guk in mipilte a sam a, ngentel tak in Aksi kilat lai a dongkheta hi.

⁸Huan amau Bethlehem khua ah a paisak a, “Paita unla, naungek thu ngenteltak in dongkhia un, ken leng amah ka hong biak theihsamna ding in, na muhtak un, honghilh un,” a chi hi.

⁹Huan kumpipa thu a zak un; a paita ua; ngai in suahlam a Aksi a muh uh naungek omna tung zawn a tun a a khawl masiah a ma uah a pai zel hi.

¹⁰Aksi a muh un, a kipak law mahmah uhi.

¹¹Inn sung ah a valut ua, a nu Mari kiang a naungek om a muh un, a bokkhup ua, a bia uhi; a goubawm uh a hong ua, a kiang ah kipahna dangkaeng, begaw leh murra a lan uhi.

¹²Herod kiang a kik nawnlou ding in a mang ua vauhilh a a om ziak un, amau kholam ah lamtuam ah a paita uhi.

¹³Huan a painung un, ngai in, Toupa angel Joseph kiang ah a mang in a kilak a, “Thou inla; naungek leh a nu pi inla, Aigupta gam ah taipih in, k’on hilh nawn masiah huai ah om gige in; Herod in naungek hihsiat dia zong ding a hih ziak in” a chi hi.

¹⁴Huchi in, a thou a, a zanzan in naungek leh a nu a pi a, Aigupta gam ah a paita hi.

¹⁵Herod sih mateng huai ah a om gige hi; Toupa’n zawlnei kam a, “Ka tapa Aigupta gam a pan ka samkhia” chi a a gen a hongtun theihna ding in.

¹⁶Huchih lai in Herod in mipilte khem a hih a kitheihtak in a heh mahmah a, mi a sawl a, a hun laitak thu ngenteltak a mipilte a dotkhiak bang in, Bethlehem khua leh a kim tengteng a pasal naupang kum nih chiang nuai lam avek un a thatta hi.

¹⁷Huchihlai in zawlnei Jeremiah in:

¹⁸“Ramah khua ah husa a za uh, sunna, kah thawm, misi ngai a mau vengvungte, Rakil in a tate a kah a, a om nawnlouh ziak un a khamuan theih kei” chi a a na gen a hongtungta hi.

¹⁹Himahleh Herod a sih nung in, Ngai in, Aigupta gam a Joseph kiang ah Toupa Angel a mang in a kilak hi.

²⁰“Thou inla, naungek leh a nu pi inla, Israel gam ah pai in; naungek thahtumte a sihtak ziak un” a chi hi.

²¹Huchi in a thou a, naungek leh a nu a pi a, Israel gam ah a paita uhi.

²²Himahleh Arkelaus, a pa Herod sik in Judia gam ah vai a hawm chih a zak in, huailam a pai a lau a; a mang a vauhilh a a om ziak in Galili gam ah a paita hi;

²³Nazaret kichi khua khat ah a tengta hi. “Amah zaw Nazaret mi a chi ding uh” chi a zawlneite na gen a hongtun theihna ding in.