Read Paite Chin MATTHAI 20 Bible Online

MATTHAI 20 - Paite Chin bible

MATTHAI 20

¹“Van gam tuh inn neipa grephuan a semdingte chial ding a zing a pawtkhia bang ahi.

²Aman nasemte toh ni khat a makhai loh dia a kituahtak un a grephuan ah a sawl chiat hi.

³Huan dak thumna ding vel in a vapawt a, midang dawlmun ading maimaite a mu hi.

⁴A kiang uah, ‘nou leng grephuan ah vapai sam ve ua, a kilawm hun k’on pe ding,’ a chi hi.

⁵Huchi in a paita uhi. Huan, dak gukna ding leh dak kua na ding vel in a va pawtnawn a, huchi mah bang in a hih nawn hi.

⁶Huan dak sawmlehkhatna ding in a va pawt a, midang dingte a mu a; a kiang uah, ‘Bangdia nitum a hiai lai ading maimai na hi ua?’ a chi hi.

⁷Amau a kiang ah, ‘kuamah in a hon chiallouh ziak un,’ a chi uhi. Aman a kiang uah, ‘nou leng grephuan ah vahoh sam un,’ a chi hi.

⁸Huan, nitaklam a hong hih in, grephuan neipa’n, a sumkempa kiang ah, nasemte sam inla, a nanungpen a kipan a masapen tan in a loh uh pia in, a chi hi.

⁹Huan dak sawmlehkhatna ding khong in a chialte a hong uh leh makhai a mu chiat uhi.

¹⁰A masapente a hong ua, muh tamdeuh a kigingta ua; himahleh amau leng makhai mah a mu chiat uhi.

¹¹A loh uh a santak un, inn neipa tung ah a phun uhi,

¹²Hiai nanungpente’n dakkal khat kia a sem ua, kou sun haksa leh kho-ul thuakte toh kibang in na bawl a, chi in.

¹³Aman bel, a lak ua mi khat kiang ah, ‘Lawm, na tung ah bangmah ka hihkhial sam a; makhai loh ding in i kituak ka hia?

¹⁴Nang a la inla paimai in; nang ka honpiak bangmah hiai nanungpen kiang ah ka pe nuam ahi.

¹⁵Kei a hiven, ka utut a ka hih a siang ka hia? Ahihkeileh kei ka hoih ziak in nang na haza ahia?’ chi in, a dawng hi.

¹⁶Huchi in a nanungpente a masapente a honghi ding ua, a masapente leng a nanungpente a honghi ding uh” a chi hi.

¹⁷Jerusalem khua a a hohtouh lai in Jesu’n a nungzui sawmlehnihte a pituam a, lampi ah a kiang uah,

¹⁸“Ngai dih uh, Jerusalem khua ah i paitou dia, Mihing Tapa siampu liante leh laigelhmite khut a matsak in a om ding; amau si ding in a tung ah thu a hihpuk ding uhi.

¹⁹Nuihzabawlna dia zatding leh Kros a kilhden ding in Jentelte kiang ah a pe ding uh; huan, ni thum ni a kaihthoh in a om ding” a chi hi.

²⁰Huailai tak in, Zebedai tapate nu, a tate pi in, a kiang ah a hong a, amah bia in, thil banghiam a ngen hi.

²¹Huan aman a kiang ah, “Bang ahia na deih?” a chi hi. Aman, “Hiai ka tapa nihte na gam ah na taklam ah khat, na veilam ah khat a tut theihna ding un thupia in” a chi hi.

²²Jesu’n, “Na nget uh theilou hi uteh. Ka nou dawn ding na dawn thei ua hia? Ka baptisma tan ding na tangthei ding ua hia?” chi in, a dawng hi. Amau a kiang ah, “Thei e” a chi uhi.

²³Aman a kiang uah, “Ka nou na dawn ngei ding ua; ka baptisma tan ding na tangthei ding uhi. Himahleh ka taklam leh ka veilam a tut ding thu zaw kei piak ding a hi kei, ka Pa bawlsakte ading ahizaw ding” a chi hi.

²⁴Huchi in sawmte’n huai a zak un unau nihte tung ah a hehta uhi.

²⁵Jesu’n amaute a sam a, “Jentelte vaihawmte a tung uah a thunei mahmah ua, a miliante un a tung uah thu a nei mahmah lai uh chih leng na thei uh.

²⁶Himahleh nou lak ah zaw huchi a hi kei ding; kuapeuh na lak ua milian hih ut na nasem un a omzaw ding hi.

²⁷Kuapeuh na lak ua masapen hih ut na nasem un a omlai ding ahi;

²⁸Mihing Tapa nasepsak a om ding in a hong paikei a, nasem ding leh mi tampi tatna dia a hinna pe ding a hongpai ahizaw hi” a chi hi.

²⁹Jeriko khua a kipan a pawtlai un mipi tampitak in amah a zui uhi.

³⁰Ngai dih, mittaw nih lamgei a tute’n Jesu a pai chih a zak un, “Toupa Nang David Tapa, ka tung uah zahngai in” chi in, a kikou uhi.

³¹Mipite’n dai ding in a tai ua; himahleh, amau, “Toupa Nang David Tapa, ka tung uah zahngai in” chi in, a ki nakkou semsem uhi.

³²Jesu ading a, amau a sam a, “Na tung uah bang ka hih na ut ua?” a chi hi.

³³Amaute’n a kiang ah, “Mitvak ka ut uh” a chi uhi.

³⁴Jesu’n amau a hehpih mahmah a, a mit uh a khoih a; huchi in, a muthei pah ngal ua, amah a zuita uhi.