Read Paite Chin MATTHAI 21 Bible Online

MATTHAI 21 - Paite Chin bible

MATTHAI 21

¹Huchi in Jerusalem khua a tunding kuan un, Bethphage khua, Olive tang a tun un Jesu’n nungzuite nih a sawl a, a kiang uah,

²“Na mazawn khua uah vahoh unla, sabiltung khih, a kiang a a nou toh, na mu ding ua; phel unla, ka kiang ah honkai un.

³Huan kuapeuh in na kiang ua banghiam a gen uleh, ‘Toupa’n a deih a ahi,’ na chi ding uh; aman a honsawl pah maiding” a chi hi.

⁴Hiai tengteng zawlnei kam a gen a hongtun theihna ding in a hong omta hi.

⁵“En dih, na Kumpipa, thunuailut tak in, Sabiltung tung ah, Sabiltungnou tung ngei a tuang in na kiang ah a hongpai, chi in, Zion tanu hilh in,” a chih.

⁶Huchi in nungzuite a vapai ua, Jesu’n a kiang ua thu a piak bang ngei in a hihta uhi.

⁷Sabiltung leh a nou a honkai ua, a tung uah a puante uh a phah ua, huai ah a tuangta hi.

⁸Huan mipi lak a tamzaw in lampi ah a puante uh a phah ua, midang in singsawl sat in, lampi ah a phah uhi.

⁹Mipi a malam a paite leh a zuite’n, “David Tapa kiang ah Hosanna! Toupa min a hongpai a hampha hi; tungnungpen ah Hosanna!” chi in, a kikou uhi.

¹⁰Jerusalem khua a honglut in a khua in, “Hiai mi kua ahia?” chi in, a ling souhsouh uhi.

¹¹Mipite’n, hiai mi zawlnei Jesu, Galili gam a Nazaret khua a ahi, a chi uhi.

¹²Pathian biakin ah Jesu a valut a, biakin a zuakmite leh leimite tengteng a delhkhia a, dangka khengte dohkante leh vakhu zuakte tutphahte leng a sawnpaih sak hi.

¹³A kiang uah, “Ka inn thumna in a chi ding uh chi a gelh ahi; nou bel suamhatte khuk in na bawlzaw uh” a chi hi.

¹⁴Huan Pathian biakin ah mittawte leh khebaite a kiang ah a hong ua; amau a na hihdam hi.

¹⁵Himahleh siampu liante leh laigelhmite’n a thillamdang hihte leh biakin a, David Tapa Hosanna: chi a naupang kikoute a muh un, a lungkimkei mahmah uhi.

¹⁶A kiang ah, hiaite thugen na za hia? a chi uhi. Jesu’n a kiang uah, “Za e, ‘naungekte leh nawi nelaite kam a pawt in pahtawina na hihkimta,’ chih na sim ngeikei ua hia?” a chi hi.

¹⁷Huan amau a paisan a , khopi apat a pawt a, Bethani ah a pai a; huai ah a giakta hi.

¹⁸A zing a khopi lam a a kiknawn lai in a gil a kialta hi.

¹⁹Lampi sik ah theipi kung a mu a, a vanaih leh a nah kia loungal muh ding a omkei hi. Huan, a kiang ah, “Tangtawn in na gah nawn ken” a chi hi.

²⁰Huchi in theipi a vuaipah hi. Nungzuite’n huai a muh un, “Bangchidan ahia theipi a vuaipah tel?” chi in lamdang a sa mahmah uhi.

²¹Jesu’n a kiang uah, “Chihtaktak in, k’on hilh ahi, ginna na neih ua, na ginlah kei uleh, theipi tung a hih bangphet leng na hihkei ding ua, hiai tang kiang ah leng, na kisuan inla, tuipi ah na kipailut in, chi le uchin, na chih bang un, a om maiding hi.

²²Bangpeuh gingta a thum a na nget uh na mu ding uh” chi in a dawng hi.

²³Huan Pathian biakin a lutnung a thu a hilhlai in, siampu liante leh vantang upate a kiang ah a hong ua, a kiang ah, “Kua thu in ahia hiai thil na hih? Kuan thu honpia ahia?” a chi uhi.

²⁴Jesu’n a kiang uah, “Ken leng thu kamkhat k’on dongsam ding a, huai n’on hilh uleh, kua thu in hiam hiai thilte ka hih chih k’on hilh sam ding hi.

²⁵Johan baptisma koi a kipan ahia? Van a kipan hia, ahihkeileh mihing a kipan?” chi in a dong hi. Amau a kingaihtuah ua, ‘Van a kipan chile hang, bangdia amah ginglou na hi ua leh?’ a honchi ding a;

²⁶Mihing a kipan chi lehang, mipi i kihta ngal a; mi tengteng in lah Johan zawlnei in a pom ngal ua” a chi uhi.

²⁷Huchi in Jesu a dawng ua, “Theikei ung” a chi uhi. Aman leng a kiang uah, “Ken leng kua thu in ahia hiai thilte ka hih k’on hilh sam kei ding” a chi hi.

²⁸“Himahleh nou bangchi na sa ua? Mi kuahiam in tapa nih a nei a, a khatna pen kiang ah a vahoh a, ‘Tapa aw, tuni’n ka grephuan ah vasem ve,’ a chi hi.

²⁹Aman, ‘ka utkei’ chi in a dawng hi. Himahleh a denchiang in a lungsim a kheng a, a kuanta hi.

³⁰Huan a nihna pa kiang ah leng a vahoh a, tua bangmah in a vachi hi. Aman ‘Pu, ka kuan ding’ chi a dawng na pi in a kuanta kei hi.

³¹Huai mi nihte a kua zaw in a pa uh deihlam a hih a leh?” a chi hi. Amau “A masapen in” a chi uhi. Jesu’n a kiang uah, “Chihtaktak in k’on hilh ahi, siahkhawnmite leh kizuakte’n Pathian gam ah nou a hon lutsan ding uh.

³²Johan diktatna tawn in na kiang uah a hong a, amah na gingta kei uhi: siahkhawnmite leh kizuakte’n amah a gingta uhi; noute’n huai na muh nung un leng amah na gintakna ding un na kisik nuam tuankei uhi.

³³“Gentehna thu dang ngaikhia un: Mi kuahiam inn neitu a om a, huai min grephuan a bawl a, dai in a umsuak a, grep sukna khuk a tou a, inn sang a lam a; loukemte kiang ah khohloh ding a pia in gamdang ah a paita hi.

³⁴Huan a gahloh hun in a gah lakhawm ding in loukemte kiang ah a sikhate a sawl hi.

³⁵Loukemte’n tua sikhate a na man ua, khat a vua ua, khat a that ua, khat suang in a deng uhi.

³⁶Huaizoh in sikha dang amasa pawl sang a tamzaw a sawlnawn hi; amau tung ah leng a ma ua mite a hih bangmah un a na hih nawn uhi.

³⁷Huai nung in, ‘Ka tapa a zahtak ding uh,’ chi in, a tapa a kiang uah a sawl hi.

³⁸Himahleh loukemte’n a tapa a na muhtak un, hiai mipa gouluahdingpa ahi; that ni e: a gouluah ding tansak ni, a kichi uhi.

³⁹Huchi in amah a man ua, grephuan a kipan a paikhia ua, a thatta uhi.

⁴⁰Huchi in grephuan neipa a hongpai chiang in huai loukemte tung ah bang chin a honhih dia le?” a chi hi.

⁴¹Amau tuh a kiang ah, “Huai migiloute haksatak in a hih mangthang ding a, grephuan loukem midang a loh hun teng a a gahte a kiang a pe zel dingte kiang ah khohloh ding in a pe ding” a chi uhi.

⁴²Jesu’n a kiang uah, “Inlammite suang deihlouhpen huai ngeingei a ning a suang phatuampen a hong hita. Huai Toupa hih ahi, i mit muh in a lamdang ahi, chih Laisiangthoute na sim ngeikei ua hia?”

⁴³Huaiziak in Pathian gam na kiang ua kipan laksak ahi dia, a gahsuah ding namdang kiang ah piak ahi ding, chih, k’on hilh ahi.

⁴⁴Huai suang tung a puk tuh a kitam gawp dia; a delhkhakmi a gawizan ding” a chi hi.

⁴⁵Huan siampu liante leh Pharisaite’n a gentehna thute a zak un amau tungthu a gen chih a theita uhi.

⁴⁶Huchi in amah mat a tum ua; himahleh mipi’n zawlnei a a pom ziak un a kihta uhi.