Read Paite Chin MATTHAI 22 Bible Online

MATTHAI 22 - Paite Chin bible

MATTHAI 22

¹Jesu’n amaute houpih in a kiang uah gentehna thu a gen nawn hi,

²“Van gam tuh kumpipa kuahiam a tapa adia kitenna Ankuanglui toh teh ahi.

³Huan kitenna Ankuang um dia a chialte sam ding in a sikhate a sawl a, himahleh a hong nuam kei uhi.

⁴Aman, ka chialte kiang ah, ‘ngai dih ua, ka Ankuang a manta; ka bawngtalte leh ka ganvakthaute ka gouta a, bangteng a manta hi; kitenna Ankuang um ding in hongpaita un,’ chi un, chi in, sikha dang a sawlnawn hi.

⁵Himahleh a na limsak kei ua, khat a lou ah a kuan a, khat a sumsinna ah a paimang hi;

⁶Midangte’n a sikhate a man ua, zumhuaitakin a bawl ua, a hihlumta uhi.

⁷Huchi in, kumpipa a thangpaita a; a sepaihhon a sawl a, tualthatte a hihmang a, a khua uh leng a halsakta hi.

⁸A sikhate kiang ah, ‘kitenna Ankuang man ahita, ka chialte netak a hi kei uhi.

⁹Huaiziak in lamlian ah pai unla, mi na muh peuhpeuh uh kitenna Ankuang um ding in chial un,’ a chi hi.

¹⁰Huchi in huai sikhate a pawt ua, lamlian a vapai in, a muh peuhmah uh, migilou leh mi hoihte leng a pikhawm vek uhi: huchi in kitenna dantan michialte in a hong dimta hi.

¹¹“Himahleh kumpipa michialte enkhe ding a a honglut leh kitenna puan silhlou mi khat huai ah a mu hi.

¹²Huchi in a kiang ah, ‘Lawm, bangchidan a kitenna puan silhlou a hiai a honglut na hia?’ a chi hi. Amah a daidide hi.

¹³Kumpipa’n a sikhate kiang ah, ‘a khut leh a khe gak unla, pawlam mial ah paikhia un; huai ah kah leh hagawi a om ding,’ a chi hi.

¹⁴Chialte tampi ahi ua, telte zaw tawmchik ahi uh” a chi hi.

¹⁵Huailai in Pharisaite a thugen a a mat theihna ding dan a kikum uhi.

¹⁶Huan amau a nungzuite uleh Herod pawlte a kiang ah a sawl ua, huai mite’n, “Sinsakpa, mi diktak na hi a, diktak in Pathian thu na hilh a, kuamah deihsak tuam leh maivil tuam na neikei chih ka thei uh.

¹⁷Huaiziak in bangchi na sa a, honhilh in? Kaisar kiang a siah piak a siang hia sianglou?” a chi uhi.

¹⁸Jesu’n a gitlouhdan uh a zetheih a, “Lepchiahte aw, bangdia hon ze-et na hi ua?

¹⁹Na siahsum uh hon ensak un” a chi hi. Huan a kiang ah makhai a honla uhi.

²⁰Aman a kiang uah, “Hiai kua lim leh kua min ahia?” a chi hi.

²¹Amau a kiang ah, “Kaisar a” a chi uhi. Aman a kiang uah, huchi ahihnung Kaisar thilte Kaisar kiang ah pia unla, Pathian thilte Pathian kiang ah pia un, a chi hi.

²²Hiai thute a zaktak un lamdang a sa mahmah ua, amah nusia in, a paimangta uhi.

²³Huai ni mah in, Saddukaite, thohnawnna a omkei chite, a kiang ah a hongpai ua;

²⁴A kiang ah, “Sinsakpa, Mosi in, mi taneilou in sileh, a unaupa’n a zi luah in a unaupa a di’n chi a khahsak ding ahi, a chi hi.

²⁵Ahi a, koute lak ah sal sagih a om ua; a upapen in zi a nei a, a si a, chi a khahlouh ziak in a zi a unaupa luah ding in a nutsiat hi.

²⁶Huchi mah bang in a nihna in a luah a, a thumna in a luah lai a, a sagihna tan in a luah chiat uhi.

²⁷A tawp in avek ua a sih nung un numei mah leng a sita hi.

²⁸Huchi in thohnawnna ah amau sagihte lak ah kuapen zi ahi dia? Avek un lah a neichiat ua? chi in” a dong uhi.

²⁹Jesu’n a kiang uah, “Laisiangthou leh Pathian thilhihtheihna na theihlouh ziak un na ngaikhial nak uhi.

³⁰Thohnawn hun ah zi leh pasal a kitenna a om nawn kei a, van a angelte bang ahi zawta ding uh” a chi hi.

³¹Himahleh, misi thohnawnna thu Pathian in na kiang ua a gen na simkei ua hia?

³²‘Kei Abraham Pathian, Isak Pathian, Jakob Pathian ka hi,’ Pathian zaw misi Pathian a hi kei a, mihing Pathian ahizaw” chi in dawng hi.

³³Mipite’n huai a zak un a thuhilh lamdang a sa mahmah uhi.

³⁴Pharisaite’n Jesu’n Saddukaite a selkhia chih a zak un a kikhawm uhi.

³⁵Huchi in a lak ua dansiammi khat in, amah ze-et in thu a dong hi.

³⁶“Sinsakpa, dan ah bang thupiak pen ahia thupipen? a chi hi.

³⁷Aman a kiang ah, “Toupa na Pathian tuh na lungtang tengteng in, na kha tengteng in, na lungsim tengteng in na it ding ahi, chih.

³⁸Huai thupiak thupipen leh poimawh pen ahi.

³⁹Huan a zom in, a kibatpih hiai ahi, ‘Nangmah na ki-it bang in na inveng leng na it ding ahi chih’

⁴⁰Huai thupiak nihte ah dan leh zawlneite thu tengteng a kikhaikhawm vek hi” a chi hi.

⁴¹Huan Pharisaite a kikhoplai un, Jesu’n amaute thu a dong hi.

⁴²“Khrist bangchi na sa ua? Kua tapa ahia?” a chi hi. Amau a kiang ah, “David tapa” a chi uhi.

⁴³Aman a kiang uah, “Bangchidan in ahia David in Kha a amah Toupa, a chih?

⁴⁴‘Toupa’n, ka Toupa kiang ah, “Na melmate na khepek nuai a ka koih masiah ka taklam ah tu in” a chih?’

⁴⁵David in amah Toupa, a chih ngal leh, bangchi’n a tapa ahi dia?” a chi hi.

⁴⁶Kuamah in kam khat in leng a dawng theikei ua, huai ni a kipan kuamah in thu dang a dong ngam nawnta kei uhi.