Read Paite Chin MATTHAI 23 Bible Online

MATTHAI 23 - Paite Chin bible

MATTHAI 23

¹Jesu’n mipite leh a nungzuite kiang ah thu a gen hi.

²“Laigelhmite leh Pharisaite Mosi tutphah ah a tu uhi.

³Huaiziak in a honhilh peuhmah uh hih unla zuizel unla; amau thilhih bang zaw hih tuankei un, genzaw a gen ua, a hih tuankei uhi.

⁴Puakgik haksatak a bawl ua, mite a suan ua, amau lah a khutzung un leng a suan nuam kei uhi.

⁵A thilhih tengteng uh mihing muh ding in ahi, a hihzawk uh, a thilbuh uleh a khipte uh a liansak ua, a puanmongkai uh a sausak ua,

⁶Ankuangluina ah mun hoihpen leh kikhopnain ah tutphah hoihpen leh,

⁷Dawlmun a chibai buk leh min, ‘Rabbi, Rabbi,’ a chih bang uh a deihtuamse uhi.

⁸Nou zaw, Rabbi chih in omkei un; sinsakpa khat na nei ua, nou tengteng unaute na hi uhi.

⁹Huan leitung ah kuamah Pa, chi kei un: na Pa uh khat kia van a om ahi.

¹⁰Heutute chih in omsam kei un, heutu khat na nei ua amah Khrist ahi.

¹¹Na lak ua thupipen na sikha ua a om zawk ding ahi.

¹²Kuapeuh kiliansak a dai ding, kuapeuh kingaineu pahtawi in a om ding hi.

¹³“Himahleh nou Laigelhmi leh Pharisai lepchiahte aw, na tung uh a gik hi: van gam lampi mite na khaksak ngal ua: nou lah na lut ngalkei uh, mi a lut dingte lut ding leng na phalkei zel uh.

¹⁴Laigelhmi leh Pharisai lepchiahte aw, na tung uh a gik hi: meithai’ innte na negai ngal ua, thumna saupi mikhemna ding in na nei ua: huaiziak in mawhna liansem na mu ding uhi.

¹⁵Nou Laigelhmi leh Pharisai lepchiahte aw, na tung uh a gik hi: phungkai khat lel bawl ding in tuipi leh gam na pai kimvel ngal ua, huchibang a a hongom tak in, amah noumau lehnih in gawtmun ta in na bawl uhi.

¹⁶“Nou makai mittaw, kuapeuh Pathian biakin lou a kichiam bangmah ahi kei; kuapeuh Pathian biakin a dangkaeng lou a kichiam zaw tangtunsak ding ahi, chite aw, na tung uh a gik hi.

¹⁷Nou mihai leh mittawte aw: a bang a thupizaw a dangkaeng hia, dangkaeng siangthousak Pathian biakin?

¹⁸Kuapeuh maitam lou a kichiam bangmah ahi kei: a tung a thilpiak omlou a kichiam in a tangtunsak ding ahi, na chi uh.

¹⁹Nou mittawte aw, a bang a thupizaw a, thilpiak hia thilpiak siangthousak maitam?

²⁰Huchi in ‘maitam lou a kichiam peuhmah zaw maitam leh a tung a om tengteng lou a kichiam ahi.’

²¹Huan Pathian biakin lou a kichiam peuhmah zaw Pathian biakin leh asung a tengpa lou a kichiam ahi.

²²Huan van lou a kichiam peuhmah leng Pathian mangtutphah leh a tung a tupa lou a kichiam ahi.

²³“Nou Laigelhmi leh Pharisai lepchiahte aw, na tung uh a gik hi: pudina, mohuri, zira sawm a khat na pia ua, dan khawkzaw, diktatna, hehpihna, ginomna na limsak ngalkei uhi; himahleh hiaite eive na hih ding uh, a dangte hihlou tuanlou in.

²⁴Nou makai mittawte, thousi khisiang a sangawngsau nawmvalhte aw!

²⁵“Laigelhmi leh Pharisai lepchiahte aw, na tung uh a gik hi: nou leh kuang pawlam na hihsiang ua, asung lah lepgukna leh kideklouhna in a dim uhi.

²⁶Nou Pharisai mittaw, nou leh kuang sunglam hihsiang masa un, a pawlam leng a hongsiang theihna ding in.

²⁷“Laigelhmi leh Pharisai lepchiahte aw, na tung uh gik hi: hansuang nuhngou, pawlam a kilawmtak a kilang, a sunglam misi guhte leh nin chiteng a dim bang na hi uhi.

²⁸Nou leng huai bang in pawlam ah mihing mitmuh in diktattak in na kilang ua, na sunglam u bel lepchiahna leh gitlouhna in na dim uhi.

²⁹“Nou Laigelhmi leh Pharisai lepchiahte aw, na tung uh a gik hi: zawlneite han na lam ua, mi diktat hante leng na zem uhi.

³⁰‘I pipute damlai a na om hitaleng, zawlneite sisan suahna ua panglou ding hi hang a,’ na chi uhi.

³¹Huchi in zawlneite thatte suante na hi uh chih na kitheisak uhi.

³²Na pipute uh hih bang in semzawm tou ngal un.

³³Gulte leh gulsuante aw, Gehenna vaihawmna bangchi’n na pelthei ding ua?

³⁴Ngai dih ua, huaiziak mah in na kiang uah, zawlneite, mipilte, laigelhmite k’on sawl ding; khenkhat na that ding ua, Kros ah na kilhden ding uh, khenkhat na kikhopnain uah savun khau in na zep ding ua, khoteng ah na sawi zel ding uhi.

³⁵Huchi in Abel mi diktattak sisan a kipan, Pathian biakin leh maitam kikal a Barak tapa Zekariah na thah uh sisan tan in, leitung a mi diktat sisan na suah tengteng uh noumau tung ah a hongtung ding hi.

³⁶Chihtaktak in k’on hilh ahi, huai tengteng tu khang tung ah a hongtung ding hi.

³⁷“Aw Jerusalem, Jerusalem, zawlneite that, na kiang ua a honsawlte uh suang a na denglum a, akpi in a noute a khanuai a a opkhum bang in na tate bangzah vei opkhum ka tum a, himahleh na utkei uhi.

³⁸En un, na inn uh a vuak a taisan in a omta hi.

³⁹K’on hilh ahi, ‘Toupa min a hongpai a hampha hi na chih masiah uh tuban n’on mu nawn takei ding uh’ ” a chi hi.