Read Paite Chin MATTHAI 24 Bible Online

MATTHAI 24 - Paite Chin bible

MATTHAI 24

¹Jesu Pathian biakin a kipan a pawtkhia a; a pailai in, a nungzuite Pathian biakin ensak ding in a kiang ah a hongpai uhi.

²Himahleh aman a kiang uah, “Hiai tengteng na mu umaw? Chihtaktak in k’on hilh ahi, hihchip louh a suang kichiang hiai ah a omkei ding” a chi a, a dawng hi.

³Olive tang a a tutlai in nungzuite amau kia in a kiang ah, a hong ua: “Huaite chikchiang in a hongom dia? Na hong painawnna leh khovel tawpna ding chiamtehna bang ahi dia? honhilh in” a chi uhi.

⁴Jesu’n amau a dawng a, “Kuamah in a hon khemzoh louhna ding in pilvang un.

⁵Mi tampi’n, ‘Khrist ka hi, chi in, keimah minlou in a hongpai ding uh, mi tampi a khemzoh ding ziak un.’

⁶Huan kidou thu leh kidou thuthang na za ding ua; na mangbat louhna ding un pilvang un; huaite a hongom ding him ahi; himahleh tawpna zaw ahi nai tadih kei ding hi.

⁷Nam tuam leh nam tuam a kidou ding ua, gam tuam leh gam tuam a kidou ding ua, mun tuamtuam ah kial a ke dia, zin a ling ding hi.

⁸Huai tengteng nauvei kipatna ahi.

⁹“Huai hun chiang in gimthuak ding in a hon mansak ding ua, a honthat ding uh. Ka min ziak in nam tengteng huat na hi ding uh.

¹⁰Huai hun chiang in mi tampi a puk ding ua, a kimansak tuah ding ua, a kihaw tuah ding uhi.

¹¹Zawlnei taklou tampi a hongpawt ding ua, mi tampi a khempuk ding uh.

¹²Huan hihkhelhna a punding ziak in mi tamzaw itna a hong dai ding hi.

¹³Himahleh, a tawptan a thuakngap peuhmah, huai mingei hotdam in a om ding hi.

¹⁴Huan hiai gam Tanchinhoih nam tengteng theihsakna ding in khovel tengteng ah hilh in a om ding; huai khitchiang in tawpna a hongtung ding hi.

¹⁵“Huchi in hihmangbangpa kihhuai, zawlnei Daniel gen, Mun Siangthou ading na muh chiang un, a sim peuhmah in a omdan thei hen.

¹⁶Judia gam a omte tangsang ah taimang uhen.

¹⁷Inn tung a om in a inn a banghiam la ding in kum kei uhen.

¹⁸Huan, lou a om inn a puan la ding in kiknawn kei hen.

¹⁹Huai ni’n gaite leh naunou pawmte tung a gik ding hi!

²⁰Na taimang hun ding uh phalbi lai hiam, khawlni hiam a hong tunlouhna ding in thum un.

²¹Huai hun chiang in gimthuakna thupi a om ding ziak in, hichibang a thupi leilung piantung a kipan tutan in a om ngei naikei a, chikmah chiang in a hongom n’on sam kei ding.

²²Huai nite hihtom hi kei leh mihing dam in a pawtkei ding uh; himahleh, telte ziak in huai nite hihtom ahi ding hi.

²³“Huai hun chiang in kuapeuh in na kiang ua, ‘En dih, Khrist hiai ah hiam, ‘huai ah, hiam,’ a chih uleh, gingta kei un.

²⁴Khrist taklou leh zawlnei takloute a hongpawt ding ziak un, huaite’n hithei liai leh telte nangawn leng a khempuk theihna ding un chiamtehna leh thillamdang thupitakte a hih ding uhi.

²⁵Ngai un k’on hilhkholta ahi.

²⁶“Huchi in, na kiang uah, ‘ngai un, gamdai ah a om’ a honchih uleh, ‘paikhe kei un; dantan sunggil ah a om, a honchih uleh, taksang sam kei un’.

²⁷Khua, suahlam a a hongphiat a, tumlam tan a a kilat zel bang in, Mihing Tapa a hong painawnna huchibang ahi ding ahi.

²⁸Sapul omna mun peuh ah musanete leng a omkhawm ding uhi.

²⁹“Himahleh huai gimthuakna nite nungzek in, ni hihmial in a om ding a, kha a vak nawnta kei dia, van a kipan aksite a hong ke ding ua, van thilhihtheihnate hihlin in a om ding uhi.

³⁰Huai hun chiang in Mihing Tapa chiamtehna van ah a honglang ding a, huai hun chiang in leitung a nam tengteng in a sun ding ua, ‘Mihing Tapa thilhihtheihna leh thupina lian toh van meitung a hongpai a mu ding uh.’

³¹Huan, a angelte pengkul ging thupi toh, a sawlkhe ding, amau a telte lei ning lite a kipan, vantawp a kipan a lehlam tawppha in, a kaikhawm ding uh.

³²“Huchi in, theipi kung ah gentehna thu zil un: a hiang a hongnou a, a nah a hongsel in nipi a nai chih na thei uh;

³³Huchi mah bang in nou leng huai tengteng na muh chiang un, amah a hongnaita a, kongkhak bul ah a om chih thei un.

³⁴Chihtaktak in k’on hilh ahi, huai tengteng a tunkim masiah tulai khang a mangkei ding.

³⁵Lei leh van a mang dia, ka thu ahihleh a mang kei ding hi.

³⁶“Himahleh, huai ni leh hun thu Pa kia loungal kuamah in, van a angelte’n leng, Tapa in leng, a theikei uh,

³⁷Noah damlai bang in Mihing Tapa hong painawnna ah ahi ding.

³⁸Huai ni, tuichim tunma in, Noah long a a lut ni tan in, a ne un a dawn ua, zi leh pasal in a kinei ua;

³⁹Tuichim a hongtung a, avek ua a lakmang masiah bangmah a theikei uh; Mihing Tapa hongpai nawnna huchi mah bang ahi ding.

⁴⁰Huai hun chiang in lou ah mi nih a om ding ua; khat paimangpih in a om dia, khat nutsiat in a om ding.

⁴¹Numei nih buh gawinelna ah buh gawinel in a om ding ua, khat paimangpih in a om dia, khat nutsiat in a om ding hi.

⁴²Huaiziak in kiging un, bang ni’n ahia na Toupa uh a hongpai ding na theihlouh ziak un.

⁴³Himahleh, hiai thei un, guta a hongpai hunding inn neitu in thei leh, a veng dia, a inn a phenvangsak kei ding hi.

⁴⁴Huaiziak in nou leng kiging gige in om un, na ginlouh dak ua Mihing Tapa a hongpai ding ziak in.

⁴⁵“Sikha muanhuai, piltak, a pu’n a hunteng a a tanding uh hawmsak ding a a inkuanpihte tung a heutu dia a koih, kuapen ahi dia le?

⁴⁶A pu a hongpai chiang a sikha huchibang hih a a muhpen a hampha ding hi.

⁴⁷Chihtaktak in k’on hilh ahi, a neih tengteng tung ah heutu di’n a koih ding.

⁴⁸Himahleh sikha gilou in, a lungtang in, ka pu a hong zok kei ding, chi in,

⁴⁹A sikha hihpihte na vua henla, nekham takhamte kiang ah ne in dawnta leh:

⁵⁰Huai sikha pu a gintak louh ni’n, a theihlouh lai in, a hongpai ding a,

⁵¹Tum nih a suah ding a, mi lepchiahte tan bangbang a tangsak ding; huai ah kah leh hagawi a om ding hi.