Read Paite Chin MATTHAI 25 Bible Online

MATTHAI 25 - Paite Chin bible

MATTHAI 25

¹“Huai hun chiang in van gam tuh nungak siangthou sawm, a khawnvak uh tawi a mouneipa dawn ding a pawtte toh teh ahi ding hi.

²Huchi in a lak ua nga a hai ua, nga a pil uhi.

³A haite’n a khawnvak uh a tawi ua, a tui a tawikei uhi.

⁴A pilte’n bel a khawnvakte uh a tawi in, a um ah a tui leng a tawi uhi.

⁵Huan mouneipa a hong zekai ziak in avek un a lusu ua, a na ihmuta uhi.

⁶Ngai dih uh! zanlai in, ‘mouneipa a hong e: a dawn ding in hongpawt un’: chi in, kikou ging a hong omta hi.

⁷Huaitak in nungak siangthoute a thouvek ua, a khawnvakte uh a hahsiang uhi.

⁸Huan, a haite’n, a pilte kiang ah, na khawnvaktui uh hon pesam un; ka khawnvak uh mit ding in a kisa, a chi uhi.

⁹Himahleh, a pilte’n, kou leh nou ading in a kiching kei ding; a zuakte kiang ah pai unla, lei zaw un, chi in, a dawng uhi.

¹⁰Huan, lei ding a a paimang kal un mouneipa a hongtungta a; huchi in, a mansate amah toh kitenna Ankuang um ding in a lut ua; huan, kongkhak a khakta uhi.

¹¹Huai nung in nungak siangthou dangte leng a hongtung ua, “Toupa, Toupa, hon hon in” a chi uhi:

¹²Himahleh aman, chihtaktak in k’on hilh ahi, k’on thei ngeikei, chi in a dawng hi.

¹³Huaiziak in, kiging un, a ni leh a hun na theihlouh ziak un.

¹⁴“Van gam tuh mi gamdang a pai dia kisa, a sikhate sam a, a sumte a kiang ua kemsak bang ahi.

¹⁵Sikha khat kiang ah talent nga a pia a, sikha dang kiang ah talent nih a pia a, sikha dang kiang ah talent khat a pia a; a hihtheih hun ding dan chiat ua pia in a paita hi.

¹⁶Talent nga mupa huai in a va sumsin paha, talent nga dang a mukheta hi,

¹⁷Huchi mah bang in talent nih mupa’n leng talent nih dang a mukhia hi.

¹⁸Talent khat mupa bel a vakuan a, lei a tou a, a pu dangka a phumgu zawta hi.

¹⁹“Hun sawtpi nung in huai sikhate pu amau toh a sum tungtang hihfel ding in a hongpai ta hi.

²⁰Talent nga mupa a hongpai a, talent nga dang a hontawi a, ‘Pu, nang talent nga n’on kemsak a; en dih, talent nga dang ka mukhia,’ a chi hi.

²¹A pu’n a kiang ah, sikha hoih leh muanhuai, na hihhoih hi, tawmchik tung ah na muanhuai a, tampi tung ah k’on omsak ding; na pu kipahna ah lut in, a chi hi.

²²“Talent nih mupa leng a hongpai a, ‘Pu, nang talent nih n’on kemsak a; en dih, talent nih dang ka mukhia,’ a chi hi.

²³A pu’n a kiang ah, ‘Sikha hoih leh muanhuai, na hihhoih e, tawmchik tung ah na muanhuai a, tampi tung ah k’on omsak ding; na pu kipahna ah lut in,’ a chi hi.

²⁴“Huan talent khat mupa leng a hongpai a, ‘Pu, mi chihhakpi na hi chih k’on thei a; na tuhlouhna ah leng na at a, na thehlouhna ah leng na khawm hi;

²⁵Huaiziak in ka lau a, ka vapai a, na talent lei ah ka selgu a; en in, nang a ngei na mu nawn hi,’ a chi hi.

²⁶“A pu’n a kiang ah, ‘Sikha gilou leh zongzaw, ka tuhlouhna a ka at a, ka thehlouhna ah leng ka khawm chih na thei maw?

²⁷Huchi ahihngal leh ka dangka sumsinte kiang a na koih ding hi a, huchi a ka hongpai a kei a a pung toh ka muhnawn ding ahi.

²⁸Huaiziak in a talent khat laksak unla, talent sawm neipa kiang ah pia un.

²⁹Kuapeuh a nei piak behlap ahi ding a, a honghau ding; kuapeuh a neilou a neihsun nangawn laksak ahi ding hi.

³⁰Huan sikha phatuamlou pawlam mial ah paikhia un, huai ah kah leh hagawi a om ding,’ chi in, a dawng hi.

³¹“Himahleh, Mihing Tapa, a angelte tengteng toh, a thupina a kivan a a hongpai hun chiang in, a thupina mangtutphah ah a tu ding hi.

³²A ma ah namchih a kikhawm ding ua; belamchingpa’n kel lak apan belamte a khenkhia bang in amaute a khenkhe ding hi.

³³Belamte a taklam ah a koih ding a, kelte a veilam ah a koih ding hi.

³⁴Huai hun chiang in Kumpipa’n a taklam a mite kiang ah, ‘Ka Pa deihsakte aw, hongpai un, khovel siamchil apan nou adia gam bawlsa luah un.

³⁵Ka gil a kial in, nekding n’on pia ua; ka dang a tak in, dawn ding n’on pia uh; mikhual ka hih in n’on zintun ua;

³⁶Vuaktang ka hih in, puan n’on silhsak uh; ka chi a nat in, ka kiang a na hong ziak un,’ a chi ding hi.

³⁷“Huai hun chiang in, mi diktatte’n, Toupa, chik in ahia gilkial a k’on muh ua nekding k’on piak uh? Dangtak a k’on muh ua, dawn ding k’on piak uh?

³⁸Chik in ahia mikhual a k’on muh ua, k’on zintun ua, vuaktang a k’on muh ua, puan k’on silhsak uh?

³⁹Chik in ahia china in hiam suangkulh ah hiam k’on muh ua, na kiang a ka hong uh? chi in, a dong ding uhi.

⁴⁰Kumpipa’n amaute kiang ah, chihtaktak in k’on hilh ahi, ‘hiai ka unau neupente lak a mi khat tung a na hih uh ka tung a hih na hi uh’ chi in, a dawng ding hi.

⁴¹“Huaikhit in, a veilam a mite kiang ah leng, ‘Hamsia thuakte aw, tangtawn mei Diabol leh a sawltakte dia mun bawl ah hon paimang san un;

⁴²Ka gil a kial in, nekding n’on pekei ua; ka dang a tak in, dawn ding n’on pekei ua;

⁴³Mikhual ka hih in, n’on zintun kei uh; vuaktang ka hih in, puan n’on silhsak kei ua; china leh suangkulh a ka om in, n’on veh louh ziak un’ a chi ding hi.

⁴⁴“Huai hun chiang in amau leng, Toupa, chik in ahia gilkial hiam, vuaktang hiam, china hiam, suangkulh ah hiam k’on muh ua, na nna k’on sepsaklouh uh? chi in a dong ding uhi.

⁴⁵Aman a kiang uah, Chihtaktak in k’on hilh ahi, ‘hiai mi neupente lak a mi khat tung a na hihlouh uh ka tung a hihlou na hi uh’ chi in, a dawng ding hi.

⁴⁶Huan huaite tangtawn gawtna ah a pai ding ua; mi diktatte bel tangtawn hinna ah a pai ding uhi” a chi hi.