Read Paite Chin MATTHAI 27 Bible Online

MATTHAI 27 - Paite Chin bible

MATTHAI 27

¹Huan zingsang a hong hih in siampu liante leh vantang upate tengteng Jesu that ding in a tungthu ah a kihou uhi.

²Amah a hen ua, a pi ua, gam ukpa Pilat kiang ah a pi uhi.

³Huan Judas a mansakpa’n Jesu siamlouh a tangsak uh chih a theih tak in a kisik a, dangka sawmthum siampu liante leh upate kiang ah a hontawi nawn hi.

⁴“Midik sisan ka khot thil ka hihkhial hi” a chi hi. Amau, “Huai kou a ding in bang a khawk dia? Nang na lohloh loh in” a chihsan uhi.

⁵Aman huai dangka Mun Siangthou ah a pailut a, paimang in a awklumta hi.

⁶Huan siampu liante’n huai dangka a la ua, “Hiai thohlawm bawm a koih a siangkei, sisan man ahi” a chi uhi.

⁷Huchi in a kihou ua, mikhualte vuina ding in belvelmi mun a leita uhi.

⁸Huaiziak in huai mun tutan in ‘Sisan mun’ a chi uhi.

⁹Huan zawlnei Jeremiah in a na gen, “Amah man ding a Israel tate lak a kuate hiam in a sak uh dangka sawmthum a lata uhi;

¹⁰Toupa’n honhilh bang in belvelmi mun man ding in a pia ua” chih a hong tangtungta hi.

¹¹Huan gamukpa ma ah Jesu a ding hi. Gamukpa’n, “Judate kumpipa na hi hia?” chi in, a dong hi. Jesu’n a kiang ah, “Hi e” a chi hi.

¹²Siampu liante leh upate’n a heklai un bangmah in a dawngkei hi.

¹³Huchi in, Pilat in a kiang ah, “A hon hekna zouzai uh na za ka hia?” a chi hi.

¹⁴Aman kamkhat lel in leng a dawng kei hi; huchi in gamukpa’n lamdang a sa mahmah hi.

¹⁵Huan gamukpa’n ankuangluini’n henta khat, a deihdeih uh, mipite ading in a pawtsak zel hi.

¹⁶Huailai in henta minthang, Barabba a chih uh a om hi.

¹⁷Huchi in, a hong kikhop un, Pilat in a kiang uah, “Kua zaw hon pawtsak leng na ut ua? Barabba hia, Jesu Khrist kichi?” a chi hi.

¹⁸Hazat ziak in amah a mansak uh chih a thei hi.

¹⁹Vaihawmna tutphah a a tutlai in, a zi in, “Hiai midik tung ah bangmah hih ken, tuni’n amah ziak in ka mang in thil tampi ka thuak hi” chi’n a thukhak hi.

²⁰Huan siampu liante leh upate’n, Barabba nget a Jesu hih manthat ding in, mipite a thuzoh uhi.

²¹Gamukpa’n amau a houpih a, “Amau nihte a kua zaw hon pawtsak leng chi na hi ua?” a chi nawn hi.

²²Amaute’n, “Barabba” a chi uhi. Pilat in a kiang uah, “Jesu Khrist kichi, bang ka chihta dia le?” a chi hi. Avek un, “Amah zaw Kros ah kilhden in om hen” a chi uhi.

²³Aman, “Bang di’n maw? Bang a hihkhial a ahia?” a chi hi. Himahleh amau, “Kros ah kilhden in” chi in, a kikou vengvung uhi.

²⁴Huchi in, Pilat in bangmah a hih theikei a, a hong buai deuhdeuh zaw ding chih a theih in, tui a la a, mipite ma ah a khut a sil a, “Hiai midik sisan ah ka siang e; noumau na lohloh un loh un” a chi hi.

²⁵Huan mipi tengteng in, “A sisan zaw koumau tung ah leh ka tate uh tung ah om hen” chi in a dawng uhi.

²⁶Huaikhit in Barabba a pawtsak a; Jesu a zep a, Kros a kilhden ding in a peta hi.

²⁷Huaikhit in, gamukpa’ sepaihte’n Jesu Inpi ah a pilut ua, a pawl ua mi tengteng a kiang ah a hong kikhawm uhi.

²⁸A puante suahsak in, puan sandup a silhsak uhi.

²⁹Linglukhu a phan ua, a khusak ua, a khut taklam in sialluang a tawisak ua; a ma ah a khukdin ua “Chibai, Judate kumpipa” chi in nuihza bawlna’n a nei uhi.

³⁰Huan amah a chilsiat ua, sialluang laksak in, a lu a khen uhi.

³¹Nuihza bawlna dia a neihkhit un, puan a suahsak ua, amah puante a silhsak nawn ua, Kros a kilhden ding in a pita uhi.

³²Huan, a paikhiak lai un, Kurini khua a mi, a min Simon a mu ua; huai mi a Kros paw ding in a man uhi.

³³Golgotha mun a hongtun un, huai tuh Luguh mun chihna ahi.

³⁴Uain thuk, thilkha toh hel, dawn ding in a pia ua, himahleh a cheptak in a dawn nuam kei hi.

³⁵Kros a a kilhden khit un, aisan in a puansilh a kihawm uhi.

³⁶Huan huai ah a tu ua a vengta uhi.

³⁷A hekna uh, “HIAI JUDATE KUMPIPA JESU AHI” chi a gelh, a lu tung ah a suang uhi.

³⁸Amah toh, suamhat nih, a taklam ah khat a veilam ah khat a kilhden uhi.

³⁹Huan mi vialvak peuh in a enghou ua, a lu uh sinkhum uhi,

⁴⁰“Nang Pathian biakin hihsia a ni thum a lam nawnpa, kihihdam in; Pathian Tapa na hihleh Kros a kipan hong kumsuk tanla” chi in.

⁴¹Huchi mah bang in siampu liante’n, laigelhmite toh, enghou in,

⁴²“Mi dangte hondampa, amah leh amah kihondam theilou pi in. Israelte kumpipa a hihngal leh tuin Kros a kipan hongkum leh a kei dia, huchi in amah i gingta mai ding.

⁴³Pathian a muangna a ka, amah zaw a ut leh tuin hondam leh ake; Pathian Tapa ka hi, a chi ngal a” a chi uhi.

⁴⁴Suamhat a kilhden un leng, huchi mah bang in a enghou hi.

⁴⁵Huan dak gukna a kipan dak kua na tan in khua a hong mialvekta hi.

⁴⁶Dak kuan a ding in, Jesu aw ngaihtak in, “Eloi, Eloi, lam a sabakthani?” chi in, a ki koukhia a, huai, “Ka Pathian, ka Pathian bangdia hon paisan?” chihna ahi.

⁴⁷A kiang a ding khenkhatte’n huai a zak un, “Hiai mi’n Elijah sam ahi” a chi uhi.

⁴⁸A lak ua mi khat kintak in a taipah a, spanji a la a, uain thuk ah a diahdim a, chiang ah a suang a, a dawnsak tou hi.

⁴⁹Midangte’n, “Ngaihsak kei un, amah lakhe ding in Elijah a hong hiam i en ding” a chi uhi.

⁵⁰Jesu ngaihtak in a kikou nawn a, a kha a khahta hi.

⁵¹Huan ngai dih, Pathian biakin puanzak a tunglam a kipan a nuailam tan in hong keksuakta a; zin a hongling a, suangpite khangkham in; hante a hong kihong hi.

⁵²Misiangthou ihmusate sapum tampi leng kaihthoh in a omta uhi;

⁵³Huaite a thohnawn nung in, han apat hongpawt in khaw siangthou ah a lut ua, mi tampi lak ah a kilakta uhi.

⁵⁴Huan sepaih zaheutu leh a kiang a Jesu veng a omsamte’n, zinling leh thil omdante a muh un a lau mahmah ua, “Hiai mi Pathian Tapa ahi ngeingei” a chi uhi.

⁵⁵Huai ah, numei tampi, a nna sepsak kawm zel a Galili gam a kipan a honzuite a om ua, gamlapi ah a en uhi.

⁵⁶Huaite lak ah Mari Magdalini, Mari Jakob leh Joseph nu, Zebedai tapate nute a om uhi.

⁵⁷Huan nitaklam a hong hih in, mihausa, a min Joseph Arimathai khua mi, a hongpai a, amah leng Jesu nungzui ahi sam hi.

⁵⁸Huai mi Pilat kiang ah a vahoh a, Jesu luang a ngen hi. Pilat in piak ding in thu a pia hi.

⁵⁹Huchi in Joseph in a luang a la a, puanmalngat siangtak in a tuam hi.

⁶⁰A han thak, suang khuakkuak ah a sial hi; han kongkhak ah suang lianpi in a delh a, a paita hi.

⁶¹Huan huai ah Mari Magdalini leh Mari dang a om ua, han ma zawn ah a tu uhi.

⁶²Huan a zing in huai tuh Kiginni zing ahi, siampu liante leh Pharisaite Pilat kiang ah a omkhawm kheukhou uhi.

⁶³“Pu, huai mi khemhat in, a damlai in, ni thum nung in ka thounawn ding, a chih ka theigige uhi.

⁶⁴Huchi in han ni thum ni tan a venghoih ding in thupia in; huchilou in zaw a nungzuite’n amah a va gukhe ding ua, vantang kiang ah, misi lak a kipan a thounawnta ahi, a chi kha ding uh; huchi in khemna nanung zaw amasa sang in a hoihkei zawsem ding” a chi uhi.

⁶⁵Pilat in a kiang uah, “Vengmi sepaihte na nei ve ua oi; pai unla, na hihtheih bang un veng hoihsak ta unla” a chi hi.

⁶⁶Huchi in vengmi sepaihte toh a vahoh ua, han a veng hoihsak ua, hansuang a chiamteh uhi.