Read Paite Chin MATTHAI 28 Bible Online

MATTHAI 28 - Paite Chin bible

MATTHAI 28

¹Huan khawlni a bei in, ni sagihni masapen ding a phalvak in, Mari Magdalini leh Mari dang han ending in a kuan uhi.

²Ngai dih, nakpitak in zin a hongling a; Toupa angel van a kipan a hongsuk a, suang a hong khukkhia a, a tung ah a tuta hi.

³A mel omdan khophia bang ahi a, a puansilhte tuh vuk bang in a ngou hi;

⁴Amah a kihtak ziak un vengmite a ling ua, misi bang in a hong omta uhi.

⁵Angel in numeite a houpih a, a kiang uah, “Nou zaw lau kei un: Jesu, a kilhden uh na zong uh chih ka thei:

⁶Hiai ah a omta kei; a gen bang ngei in a thounawnta, a lupna mun en un, a chi uhi.

⁷Paimeng unla, nungzuite kiang ah, ‘misi lak a kipan a thounawnta hi; ngai dih uh, Galili gam ah na ma uah a pai; huai ah amah na mu ding uh’ chi in, hilh un. Ngai dih uh, k’on hilhta ahi” a chi hi.

⁸Huan lau leh kipak mahmah kawm in, han a kipan a pai mengmeng ua, a nungzuite hilh ding in a taita uhi.

⁹Huan ngai dih, Jesu’n amau a tuak a, “Chibai aw,” a chi hi. Huchi in, amau a khepek a len ua, a bia uhi.

¹⁰Jesu’n a kiang uah, “Lau kei unla, paita un, Galili gam a pai ding in ka unaute va hilh un; huai ah n’on mu ding uh” a chi chi in.

¹¹Huan a pailai un vengmi sepaih khenkhat khopi ah a va lut ua, thil omdan tengteng siampu liante kiang ah a va hilh uhi.

¹²Upate toh a kikhawm ua, a kihou zoh un, sepaihte kiang ah dangka tampi a pia uhi,

¹³“Zan a, ka ihmut kal un, a nungzuite a hongpai ua, amah a guta uh, chi unla,

¹⁴gamukpa’n huai a na zak leh amah leng i khem ding ua lunghimawh lou ding in i bawl na ke,” a chi uhi.

¹⁵Huchi in dangka a la ua, a hilh bang un a hihta ua; huchi in, tutan in huai thu Judate lak ah a genthang lai uhi.

¹⁶Himahleh nungzui sawmlehkhatte Galili gam ah, Jesu’n tang a sehsak ah a hoh uhi,

¹⁷Amah a muh un a bia ua; khenkhat in a ginglah uhi.

¹⁸Huchi in, Jesu a kiang uah a hongpai a, amau a houpih a, “Lei leh van a thuneihna tengteng ka kiang a piak ahita.

¹⁹Huaiziak in, kuan unla, namchih apan nungzuite bawl unla, Pa, Tapa, leh Kha Siangthou min in baptist unla,

²⁰Thu k’on piak tengteng zui ding in thuhilh un. Ngai un, kei tangtawn in, khovel tawppha in leng, na kiang uah ka om ding hi” a chi hi.