Read Paite Chin MATTHAI 3 Bible Online

MATTHAI 3 - Paite Chin bible

MATTHAI 3

¹Huchihlai in Baptispa Johan in,

²“Kisik un! van gam a naita” chi in, Judia gamdai ah thugen in a hongpai hi.

³Amah ahi, zawlnei Isai in: “Gamdai a mi kikou aw in, Toupa lamlian sial unla a lampite tangsak un, a chi” chi a a na genpen ahi.

⁴Johan in sangawngsau mul puan a silh a, savun kawnggak a gak a, a an khaukhup leh khuaizu ahi.

⁵Huchihlai in Jerusalem khua, Judia gam tengteng, Jordan luidung kim tengteng a hong paikhawm uhi.

⁶A khelhna uh thupha tawi in a kiang honzuan ua, Jordan lui ah a Baptisma a tang uhi.

⁷Himahleh, Pharisaite leh Saddukaite tampi a ma a baptisma tang ding a hongpai a muh in, a kiang uah, “Gulsuante! thangpaihna hongtung ding taisan ding in kuan hon thuhilh ahia?

⁸Huchi in kisikna toh kilawm gah hon suangkhia un;’

⁹Abraham ka pu uh ahi, chi in, kingaihtuah kei un, Pathian in hiai suangte Abraham suante in a dingsak thei hi k’on chi ahi.

¹⁰Tua kipan in heipi singbul teng ah a koihta uh; huchi in, singchih gah hoih a gahlou peuhpeuh a phuk ua, mei ah a pailut zel uhi.

¹¹“Ken zaw kisikna ding in tui in k’on baptist ngei a, himahleh, amah ka nung a hongpai keimah sang in a thupizaw a, a khedap tawitak leng ka hi kei, Aman zaw Kha Siangthou leh mei in noute a hon baptist ding hi.

¹²A khut in phazah a tawi a, a phual a zapsiang sipsip ding a, buhpang ah a buh asung ding, a si bel mei mittheilou in a haltum ding” a chi hi.

¹³Huchihlai in a kiang a baptisma tang ding in Jesu Galili gam a kipan Jordan lui ah Johan kiang ah a hongpai hi.

¹⁴Johan in, “Nang kei n’on baptist kiphamoh zawpi a, ka kiang ah na hong zawsop ahi maw?” chi in, a kham hi.

¹⁵Himahleh Jesu’n a kiang ah, “Tuin lemsak teitei in, hichibang a diktatna tengteng hih tangtun ei dia kilawm ahi” chi in, a dawng a, huchi in lem a sata hi.

¹⁶Huan Jesu baptisma a tantak in tui a kipan a pawtpah ngal a, ngai in, amah ading in van kihong a, Pathian Kha, vakhu bang a hongsuk in, a tung a hongtu a mu hi.

¹⁷Huan ngai in, van a kipan aw in, “Hiai ka Tapa deihtak, ka kipahna mahmah ahi” a chi hi.