Read Paite Chin MATTHAI 5 Bible Online

MATTHAI 5 - Paite Chin bible

MATTHAI 5

¹Huchi in mipite a muh in tang ah a paitou a, a tu a, a nungzuite a kiang ah a hongpai uhi;

²Huan thu a gen a, amau thu a hilh hi:

³“Lungsim a gentheite a hampha uh van gam amau a ahi ngal a.

⁴“Lungkhamte a hampha uh; khamuan a om ding ahi ngal ua.

⁵“Thunuailutte a hampha uh; leigou luah ding ahi ngal ua.

⁶“Diktatna lunggulh a gilkial a dangtakte a hampha uh, tai ding ahi ngal ua.

⁷“Zahngaitheite a hampha uh; zahngaihna mu ding ahi ngal ua.

⁸“Lungsim a siangthoute a hampha uh; Pathian mu ding ahi ngal ua.

⁹“Lemna bawlte a hampha uh; Pathian’ tate chih ding ahi ngal ua.

¹⁰“Diktakna ziak a sawina thuakte a hampha uh, van gam amau a ahi ngal a.

¹¹“Min keimah ziak a hontai ua, a honsawi ua, zuau a gilou chiteng a a honhek hun chiang un, na hampha uhi.

¹²Kipak unla, nakpitak in nuam un; van ah na kipahman uh a thupi ngal a: Tuamah bang in na ma ua zawlnei omte leng a na sawi zel uhi.

¹³“Lei chi na hi uh: himahleh chi peng leh, bang in ahia a hih al nawn ding? Paihkhiak a mihingte chilgawp loungal ding in, bangmah din a phatuam kei hi.

¹⁴“Khovel vak na hi uh. Tang tung a khopi om selguk theih ahi kei hi.

¹⁵Min khawnvak de in lawh nuai ah a koih ngeikei ua, a koihna ah a koih zaw uhi. Huchi in insung a om tengteng a tanvak hi.

¹⁶Huchi mah bang in, na vak uh mi mitmuh ding in vak hen, huchi in na thil hoih hihte uh a mu ding ua, na Pa uh van a om a pahtawi thei ding uhi.

¹⁷“Dan hiam, zawlneite thu hihmang ding a hongpai ka hih um kei un; hihmang ding a hongpai ka hi kei, hih tangtung ding a hongpai ka hi zaw hi.

¹⁸Chihtaktak in k’on hilh ahi, lei leh van a man masiah danthu a sutvom neuchik hiam, thaivom neuchik hiam, khat leng a mang keihial ding, avek a a tunkim masiah uh.

¹⁹Huchi in kuapeuh hiai thupiak neupente lak a khat bohsia a, huai zui dia mite thuhilh peuhmah, van gam ah mi neupen a kichi ding; himahleh kuapeuh zui a thuhilh behlapte, van gam ah milian a kichi ding hi.

²⁰Na diktatna un laigelhmite leh Pharisaite diktatna a khup kenzaw van gam ah na lut kei hial ding uh chih k’on hilh ahi.

²¹“Nidanglai a mite kiang ah, ‘Tual na that ding ahi kei’ kichi leh, ‘kuapeuh tualthat vaihawmna adin lauhthawn huaitak in a om ding uh,’ ki chi na zata uhi;

²²Ken zaw, kuapeuh a unau tung a heh vaihawmna adin lauhthawn huaitak in a om ding. Kuapeuh a unau selphou vaihawmmite hawmsak a om lauthawn huaitak in a om ding; kuapeuh, ‘Nang mihai’ chi Gehenna mei a paih lauhthawn huaitak in a om ding uh” chih k’on hilh ahi.

²³Huaiziak in, maitam a na thilpiak na lat lai a na unau in na tung ah lung hihlouhna a nei chih na theihkhiak leh,

²⁴Huai maitam ma ah na thilpiak nusia inla, pai inla, na unau kilempih in, huaizoh in na thilpiak lan in.

²⁵Na langpa toh vaihawmna inn zuan a lampi a na paikhawmlai un kilempih in, huchilou in zaw na langpa’n thukhenmi khut ah a honpe dia, thukhenmi’n mimanpa kiang ah a honpe dia; suangkulh ah a honkhum ding hi.

²⁶Chihtaktak in k’on hilh ahi, paihsa san khat nangawn na piakkim masiah huai a kipan in na pawtkhe kei hial ding hi.

²⁷“Nidanglai mite’n ‘Ang na kawm ding ahi kei’ a chih uh na zata uhi.

²⁸Himahleh ken zaw kuapeuh etlahna lungsim toh numei en in, a lungsim in angkawm ahi chih k’on hilh ahi.

²⁹Na mit taklam in a hon hihpuk leh, khelkhia inla paimang in, na sapumpi Gehenna a paisang in na sapum a hiang khat manthat nang ading in a hoihzaw hi.

³⁰Na khut taklam in a hon hihpuk leh, tankhia inla paimai in; na sapumpi a Gehenna a paisang in, na sapum a hiang khat manthat nang ading in a hoihzaw hi.

³¹“Kuapeuh zi ma in kimakna lai a kiang ah pia heh, leng a kichi.

³²Ken zaw kuapeuh kingaihna ziak hilou a, zi ma in amah angkawm sak ahi, kuapeuh maksa neinawn angkawm ahi chih k’on hilh ahi.

³³“Nidanglai in mite kiang ah, Zuau in kichiam kenla, Toupa kiang ah na kichiamnate tangtun zaw in, a kichi chih leng na zata uhi.

³⁴Ken zaw, k’on hilh ahi, chiam himhim kichiam kei un; van lou in kichiam kei un, huai Pathian mangtutphah ahi ngal a; lei lou in kichiam sam kei un, huai a khengakna ahi.

³⁵Jerusalem lou in kichiam sam kei un, huai Kumpipa thupitak khopi ahi.

³⁶Na lu lou in na kichiam ding ahi sam kei, samzang khat lel leng na hihngou in, na hih vawm thei ngalkei uhi.

³⁷Na thugen uh, ‘ahi, hi,’ ‘hilou, hilou,’ hi vanglak hen;” a kan a valzaw gitlouhna a suak ahi.

³⁸“Mit sik in mit, ha sik in ha, a kichi chih na zata uhi.

³⁹Ken zaw k’on hilh ahi. Migilou nang kei un; na taklam biang bengte, a lehlam leng doh zaw un.

⁴⁰Kuapeuh in na lak ah thusia bawl in, na puanak lak a tup leh, na puanza leng lasak ngal in.

⁴¹Huan mel khat pai dia hon phut kiang ah mel nih pai in.

⁴²A hon ngen kiang ah pia inla, na lak a leitawi nuam kiheisan ken.

⁴³“Na vengte it inla, na melmate hua in, a kichi chih na zata uhi.

⁴⁴Ken zaw k’on hilh ahi, na melmate it unla, a honsawite thumsak un.

⁴⁵Na Pa uh van a omtate na hih theihna ding un. Aman migiloute leh mi hoihte tung ah a ni a suaksak a, mi diktatte leh diktatloute tung ah leng vuah a zusak hi.

⁴⁶Nou hon itte kia na it un, kipahman bang ahia na muh ding uh? Siahkhonmite’n leng huchibang in a hihsam kei ua hia?

⁴⁷Huan na unaute kia uh chibai na buk un bang na hihtam tuan ua ahia? Jentelte’n leng hichibang in a hih sam kei ua hia?

⁴⁸Huchi in na Pa uh van a om a hoihkim sipsip bang in na hoihkim sipsip ding uh ahi.