Read Paite Chin MATTHAI 6 Bible Online

MATTHAI 6 - Paite Chin bible

MATTHAI 6

¹“Na thilpiakte uh mi muh ding in, mihing mitmuh a hihlou ding in pilvang un; huchilou in zaw na Pa uh van a om kiang ah kipahman na neikei ding uhi.

²“Huchi in, mi kiang a thilpiak na piak in, mi lepchiahte’n miphat a loh theihna ding ua kikhopnain leh kongzing a a hihnak bang un na ma uah pengkul mutkei un. Chihtaktak in k’on hilh ahi, a kipahman uh a mu ta uhi.

³Nang zaw mi kiang a thilpiak na piak in, na khut taklam in a hih na khut veilam in theikei hen.

⁴Na thilpiak a guk a a omtheihna din: huchi in na Pa a guk a mupa’n a hondin ding hi.

⁵“Huan na thum chiang un milepchiah te bang in na hih ding uh ahi kei; min a muh theihna ding un, kikhopnain leh kongzing kathuam laitak ah ding kawm in thum a utse uhi. Chihtaktak in k’on hilh ahi, a kipahman uh a muta uhi.

⁶Nang zaw na thum in, na dantan sunggil ah lut inla, na kongkhak khak inla, na Pa a guk a om kiang ah thum in. Huchi in na Pa a guk a om in honmu in, a hondin ding hi.

⁷“Huan, na thum un, Jentelte bang in gentuan mawkmawk kei un: a pau tam ziak ua zaka om ding a kisa uhi.

⁸Huaiziak in, amau bang in omkei un, amah na nget ma ua na Pa un bangbang ahia na poimawh uh a theigige hi.

⁹Huchi in nou zaw hichibang in thum un: “Ka Pa uh van a om, na min ki zahtak hen.

¹⁰Na gam hongtung hen. Na deihlam van a a kihih bang in, lei ah leng kihih hen.

¹¹Tuni’n ka nek khop uh an honpia in.

¹²Kabatte uh hon ngaidam in, kou leng ka leibate uh ka ngaihdam tak bang un.

¹³Khemna ah hon pilut kenla, gilou lak ah hon huzaw in, Gam leh thilhihtheihna leh thupina Tangtawn a nang a a hih ziak in, Amen” chi in.

¹⁴Mi a tatleknate uh na ngaihdam uleh, na Pa uh van a om in leng a hon ngaidam sam ding hi.

¹⁵Himahleh mite tatleknate na ngaihdam kei ngal un, na Pa un na tatleknate uh a ngaidam sam kei ding hi.

¹⁶“An na ngolh un leng, milepchiahte bang in nguimel pawkei un: amau zaw mi mitmuh a anngawl a a kilat theihna ding un, a mel uh a nguisak nak uhi. Chihtaktak in k’on hilh ahi, a kipahman uh a muta uhi.

¹⁷Nou zaw, an na ngolh chiang un na lu uh sathau nilh unla, na mai uh phiat un.

¹⁸Huchi in, na Pa uh a guk a om mitmuh loungal ah mihing mitmuh ah anngawl na bang kei ding ua; huchi in, na Pa uh a guk a mu pa’n a hondin ding hi.

¹⁹“Lei a, leikha leh tuiek in a neksiatna ah, gutate’n phenvang a a gukna uah gou kikhol kei un.

²⁰Van ah, leikha leh tui ek in a neksiatlouhna ah, gutate’n a phen ua a guk samlouhna uah, gou kikhol zaw un.

²¹Na gou omna peuh uah na lungtang uh leng a om ding hi.

²²“Sapum khawnvak mit ahi; huchi a na mit a chim leh na sapum avek in a tansuak ding hi.

²³Na mit a siat leh na sapum avek in a mial khin vek ding. Huchi in na sung a vak om pen mial hileh nak mial natel in chia!

²⁴“Kuamah in heutu nih nna a semkop theikei; khat hua in khat a it ding; ahihkeileh, khat gum in khat a simmawh ding. Pathian leh sumna na semkop theikei ding uh.

²⁵“Huaiziak in, k’on hilh ahi. Bang ahia ka nekding, bang ahia ka dawn ding, chi in, na hinna thu uh leh, bang ahia ka silh ding, bang ahia ka ten ding, chi in na sapum thu uh lunghimawh kei un. Nekding sang in hinna a thupizaw ka hia? Silhlehten sang in sapum leng a thupizaw ka hia?

²⁶Tungleng vasate en un; buh a tuh kei uh, a at kei uh, buh in ah leng a seklut sam kei uh. Himahleh na Pa uh van a om in amau a vak hi. Noute amau sang a nakpitak a manpha zaw hilou na hi umaw?

²⁷Huan noute lak ah lunghihmawh ziak a kuan ahia amah dunglam tong khat a hihsang tuan thei?

²⁸“Huan silhlehten thu bang ding a lunghimawh na hi ua? Gamlak lili pak khandan hoihtak in ngaihtuah un; na a sem kei ua, khau leng a khek kei uh.

²⁹Himahleh, k’on hilh ahi, Solomon hial leng a thupina tengteng a a kizep in hiai lili pak khat bang in zep in a omkei hi.

³⁰Huchi in gamlak loupa, tuni a hing a, a zing a thuk a khulmai ding bawn Pathian in huchi lawmlawm a a zep leh aw nou gintawmte, silhlehten ding honpe tawk lou ding hiam?

³¹“Huchi in bang ahia i nekding, ahihkeileh bang ahia i dawn ding? Ahihkeileh bang silh in ahia i om ding chi in lunghimawh kei un.

³²Jentelte’n huai tengteng a zong uhi. Huai tengteng na poimawh uh chih na Pa uh van a om in a theigige hi.

³³A gam leh a diktatna zong masa un, huchi in huai tengteng a honpiak behlap ding hi.

³⁴“Huchi in a zing ading lunghimawh kei un, a zing in amah ading a ki lunghimawh tawm ding ziak in. Ni khat ading in ni khat gimthuak a hun hi.