Read Paite Chin MATTHAI 8 Bible Online

MATTHAI 8 - Paite Chin bible

MATTHAI 8

¹Huan tang a kipan a a hong paisuk nung in mipi thupitak in amah a zuita uhi.

²Ngai in, a kiang ah phak khat a hongpai a, “Toupa, na ut leh n’on hihsiangthou thei hi” chi in, a bia hi.

³Jesu’n a sawk a, a khoih a, “Ka ut hi, na siangthouta in” a chi hi. Thakhat in phak a hong siangthou pah hi.

⁴Jesu’n a kiang ah, "kuamah hilhlou ding in pilvang in, himahleh siampu kiang ah vakilak inla, Mosi in thilpiak ding a chihte lan in amau a hon theihchet na ding un," a chi hi.

⁵Kapernaum khua a lut in, a kiang ah sepaih zaheutu a hongpai hi,

⁶“Toupa, ka naupang zaw, inn ah a lum maimah a, nakpitak a hihnat in a om” chi in a na ngen hi.

⁷Huan aman a kiang ah, “Ka hongpai dia, ka hihdam ding” a chi hi.

⁸Sepaih zaheutu’n, “Toupa, ka inn sung na lutna tak ahi kei, thu kia gen lechin, ka naupang a dam ding.

⁹Keileng mi thunuai a om ka hi a, ka nuai ah sepaihte a om ua, ‘nang, pai in,’ ka chih leh, a pai zel; midang kiang ah, ‘nang hongpai in,’ ka chih leh, a hongpai zel; ka sikha kiang ah leng, ‘hiai hih in’ ka chih leh, a hihzel” chi in a dawng hi.

¹⁰Huan Jesu’n huai thu a zak in lamdang a sa a, amah zuite kiang ah, “Chihtaktak in, k’on hilh ahi, Israelte lak ah leng hichitel a ginna thupi ka mu kei hi.

¹¹K’on hilh ahi, suahlam leh tumlam apat mi tampi a hongpai ding ua, van gam ah Abraham, Isak leh Jakob kiang ah a tu ding uhi.

¹²Gam tate zaw pawlam mial ah paihkhiak in a om ding uh; huai ah kah leh hagawi a om ding” a chi hi.

¹³Huan Jesu’n sepaih zaheutu kiang ah, “Paita in; na gin bang in na tung ah tung hen” a chi a, huchi in naupang a damta hi.

¹⁴Jesu Peter inn ah a lut a, a zi nu khosik a lum a mu hi.

¹⁵A khut a khoihsak a, a khosik a daita; a thou a, a na a sepsakta hi.

¹⁶Huan nitaklam a hong hih in a kiang ah dawimatte tampi a honpi ua; thu in dawite a delhkhia a, damlou tengteng a hihdam hi.

¹⁷Zawlnei Isai in, “Amah ngei in i hatlouhnate a la a, i natnate a pua” chi a a gen a hongtun theihna ding in.

¹⁸Jesu’n a kimvel a mipi thupitak a muh in, galkhat lam a pai ding in thu a pia hi.

¹⁹Laigelhmi khat a hongpai a, a kiang ah, “Heutupa, na paina peuh ah k’on zui ding” a chi hi.

²⁰Jesu’n a kiang ah, “Sehalte’n kua a nei ua, tungleng vasate’n leng bu a nei uh, himahleh Mihing Tapa in zaw lungakna ding mun a neikei” a chi hi.

²¹Huan a nungzuite lak a midang khat in, “Toupa, ka pa hon vuisak phot in” a chi hi,

²²Himahleh aman a kiang ah, “Honzui in; misi in amau misi kivui uhen” a chi hi.

²³Huan long sung ah a lut a, a nungzuite’n a zui uhi.

²⁴Ngai in, dil ah huihpi thupitak a hongnung a, huchi in tuikihawt in long hontum tou a; amah lah a ihmu hi.

²⁵Huan a kiang ah a hongpai ua, a phawng ua, “Toupa, hon hondam in, mangthang ding ka kei uhiam” a chi uhi.

²⁶Aman a kiang uah, “Ginglahte aw, bangdia lau na hi ua?“ a chi hi. Huchi in a thou a, huih leh dil a tai a; huan a hong dai sipsipta hi.

²⁷Huan mite’n lamdang a sa mahmah uhi. “Hiai mi bangchidan ahia, huih leh dil nangawn in a thu a man uh?” a chi uhi.

²⁸Huan galkhat lam Gadara mite gam a tun in dawimat nih, han a kipan a hongpawt in, a hontuak ua; a hang mahmah ua, huchi in, huai lampi ah kuamah a pai theikei uhi.

²⁹Ngai in, amau “Pathian Tapa kou leh nang bang ahia i kizolhna om? Hunchiam tunma a koute hongawt dia hongpai na hi maw?” chi in, a kikou uhi.

³⁰Huan a omna ua kipan gamla khop ah vokhon tampi a gamta uhi.

³¹Huan dawite’n, “N’on delhkhiak a leh huai a vokhonte sung ah hon lutsak in” chi in, a kiang ah nakpi’n a ngen uhi.

³²Aman a kiang uah, “Pai un” a chi a, huchi in, a hong pawtkhia ua, vok sung ah a lut uhi; ngai in, vokhon tengteng tuigei ken ah a taisuk ua, dil ah a tailut ua, tui ah a mangthangta uhi.

³³Huan a vulte a tai ua, khua ah a pai ua, dawimatte tung a thil hongtungte bangkim a hilhta uhi.

³⁴Ngai in, a khua in Jesu mu ding in a hongpawt ua; amah a muhtak un a gam ua kipan a pawtkhe ding in nakpi’n a ngen uhi.