Read Paite Chin MATTHAI 9 Bible Online

MATTHAI 9 - Paite Chin bible

MATTHAI 9

¹Huan long ah a lut a, a galkah a, a khua a hongtung kiknawn hi.

²Ngai in, mi zeng khat damlou, lupna a lum a honzawng ua; huchi in Jesu’n a ginna uh mu in, zeng damloupa kiang ah, “Tapa, khamuangtak in om in, na khelhnate ngaihdam hi hen” a chi hi.

³Ngai in, Laigelhmi kuate hiam a kingaihtuah ua, “Hiai mi’n Pathian a gensia” a chi uhi.

⁴Huchi in Jesu’n a ngaihtuahte uh a thei a, “Bangdia na lungtang ua gilou ngaihtuah na hi ua? a chi hi.

⁵‘Na khelhnate ngaihdam hi hen’ chih leh, ‘thou inla, khe in pai in, chih koi a baihlam zaw?’

⁶Himahleh Mihing Tapa in leitung ah khelhnate ngaihdam theihna a nei chih na theihna ding un” zeng damloupa kiang ah “Thou in, na lupna la inla, na inn ah pai in” a chi hi.

⁷Huchi in a thou a, a inn ah a paita hi.

⁸Himahleh, mipi’n a muh un, lamdang a sa ua huchibang hihtheihna mihingte kiang a pepa, Pathian a pahtawita uhi.

⁹Jesu huai a kipan a pai zel a, siah piakna mun a tu, mi khat, a min Matthai a mu a; a kiang ah, “Honzui in” a chi a, huchi in, a thou a, a zuita hi.

¹⁰Hichi ahi a, a inn a Ankuang a umlai in, ngai in, siahkhawnmite leh mikhial tampi a hongpai ua, Jesu leh a nungzuite a umpih uhi.

¹¹Pharisaite’n huai a muh un, a nungzuite kiang ah, “Bangdia na heutupa un siahkhawnmite leh mikhialte kiang a ne ahia?” a chi uhi.

¹²Himahleh Jesu’n huai a zaktak in, “Mi damtheite’n daktor a kiphamoh kei ua, mi damtheiloute’n a kiphamoh zaw uhi.

¹³Huchi in, ‘kithoihna deihlou in zahngaihna ka deih hi,’ chih, a omdan vazil un, mi diktatte sam dia hongpai ka hi kei, mikhialte sam dia hongpai ka hizaw” a chi hi.

¹⁴Huchihlai in Johan nungzuite a kiang ah a hongpai ua, “Bangdia kou leh Pharisaite’n anngawl gige a, na nungzuite’n ngawllou uh ahia?” a chi uhi.

¹⁵Jesu’n a kiang uah, “Moupite kiang a a pasal a omlai teng moupite’n a sun thei ua hia? Himahleh, a pasal a kiang ua kipan a pimang nite a hongtung ding a, huai hun chiang in an a ngawl ding uhi.

¹⁶Huan kuamah in puan lui puan tuikhai louh them in a thuap ngeikei uh; a thuapna in puan a kaihkek ding ziak in, a hong nakkek zawsem ding hi.

¹⁷Kuamah in uain thak savun uain thawl lui ah a thun ngeikei uh; huchilou in zaw savun thawlte a puakkek dia, uain a baw dia, savun thawl leng a hong seding; huaiziak in uain thak savun uain thawl thak ah a thun zaw ua, huchi in hoihtak in a om tuaktuak” a chi hi.

¹⁸Huan a kiang ua a genlai tak in, ngai in, vaihawmpa khat a hongpai a, Amah bia in, “Tu tak in ka tanu a si a; himahleh hongpai inla, a tung ah na khut koih lechin a hong hingnawn ding” a chi hi.

¹⁹Huchi in, Jesu a thou a, a zuita a, nungzuite’n leng a zui uhi.

²⁰Ngai in, numei khat kum sawm leh kum nih si pawt damlou, a nung ah a hongpai a, a puanmong a khoihsak hi.

²¹“A puan mongkai khoihlel leng, hihdam in ka om mai ding” a lungsim in a chi hi.

²²Huan Jesu a kihei a, amah a mu a, “Ka tanu, khamuangtak in om in; na ginna na dampih hi” a chi hi. Huchi in numeinu huai dakkal a kipan a damta hi.

²³Jesu vaihawmpa inn ah a lut a, tamngai tumte leh mipi thawm ngaih vengvungte a va muh in,

²⁴“Pawt un: naupang a si kei, a ihmu ahizaw,” a chi hi. Amau bel amah a nuihsan maimah uhi.

²⁵Himahleh mipite pawlam a a pawtsak zoh in amah a lut a, naupang khut ah a len a, a hong thou maimah hi.

²⁶Huai tanchin huai gam tengteng ah a thangkheta hi.

²⁷Jesu huai a kipan a pai zel a, mittaw nih in, “David Tapa, ka tung uah zahngai in” chi a kikou in a zui uhi.

²⁸Huan inn a a lut leh mittawte a kiang ah a hongpai ua; Jesu’n a kiang uah, “Hiai hihthei din n’on gingta ua hia?” a chi hi. Amau a kiang ah, “Gingta e, Toupa” a chi uhi.

²⁹Aman a mit uh a khoih a, “Na gintak bang un na tung uah tung hen,” a chi hi.

³⁰Huchi in a mit uh a hongvakta hi. Jesu’n a kiang uah, “Kuamah theihlouh ding in pilvang un” a chi bilbel hi.

³¹Himahleh amau a pawt ua, huai gam tengteng ah a tanchin a genthangta uhi.

³²Huai apan a pawtlaitak un, ngai in, dawimat pautheilou khat a kiang ah a honpi uhi.

³³Huai dawi a delhkhiak tak in pautheilou a hong pauta a; mipite’n lamdang a sa mahmah uhi, “Israelte lak ah hichibang a kimu ngeikei hi” a chi uhi.

³⁴Pharisaite’n bel “Dawi kumpipa ziak in ahi, dawite a delhkhiak nak,” a chi uhi.

³⁵Huan Jesu’n a kikhopnain ua hilh in, gam Tanchinhoih gen in, damlouhna chiteng leh natna chiteng hihdam in, kholian leh khoneu tengteng a tawn vialvial hi.

³⁶Huchi in mipite a muh in, chingtu neilou belamte bang a gimthuak leh dalh a a om ziak un a lainat mahmah hi.

³⁷A nungzuite kiang ah, “Buhlak ding a tam mahmah a, himahleh a semmite a tawm uhi.

³⁸Huaiziak in a buhla dia semdingte sawl ding in buhneipa kiang ah ngen un” a chi hi.