Read Paite Chin MARK 1 Bible Online

MARK 1 - Paite Chin bible

MARK 1

¹Pathian Tapa, Jesu Khrist Tanchinhoih kipat tungna.

²Zawlneite a gelh a hih bang in, “Ngai dih, ka thangkou na ma ah ka sawl a, aman na lampi a bawlkhol ding;

³Gamdai a kikoupa aw in, Toupa lamlian sial unla, a lampite hihtang un” chi a a gelh bang in.

⁴Johan in gamdai ah a baptist a, khelhnate ngaihdamna ding a kisikna baptisma thugen in, a hongpawt hi.

⁵Judia gam a mi tengteng leh Jerusalem khua a mi tengteng a pawt ua, a kiang ah a pai ua, a khelhnate uh thupha tawi in Jordan lui ah, amaute a baptist zel hi.

⁶Johan sangawngsau mulpuan in a kivan a, a kawng savun kawnggak a gak a, a an khaukhup leh khuaizu ahi.

⁷“Ka nung ah kei sang a thupizaw a hong pailel ahi; kuna a khedap khau pheltak leng ka hi kei,” a chi hi.

⁸Ken tui in nou k’on baptist a; aman zaw Kha Siangthou in a hon baptist ding” chi in a gen hi.

⁹Huai nite in hichi a honghi a, Jesu Galili gam a Nazaret khua a kipan a hongpai a, Jordan lui ah Johan in a na baptist hi.

¹⁰Tui apan a hong pawttak in, van kihong leh kha vakhu bang a a tung a hongkum a mu hi.

¹¹Huan van a kipan aw a hongpawt in, “Nang ka Tapa deihtak na hi a, na tung ah ka kipak mahmah” a chi hi.

¹²Kha in amah gamdai ah a sawlpah hi.

¹³Huchi in, Setan khem in gamdai ah ni sawmli a om a, gamsa lak ah a om a; angelte’n a nna a sepsak uhi.

¹⁴Johan mat a a om nung in, Jesu, Pathian lalgam Tanchinhoih gen in, Galili gam ah a hong paita hi.

¹⁵“A hun a hongtungta a, Pathian gam a hong naita; kisik unla Tanchinhoih gingta un” chi in.

¹⁶Galili dilgei a nawklai in Simon leh Simon unaupa Andru dil ah lenpai in a mu a; ngamanmi ahi him uhi.

¹⁷Jesu’n a kiang uah, “Honzui un, huchi in mihing man din k’on bawl ding” a chi hi.

¹⁸A len uh paisan in amah a zuipah uhi.

¹⁹Saulou a pai leh Zebedai tapa Jakob leh a unaupa Johan a mu a, huaite len bawlpha in long ah a om uhi.

²⁰Huan aman amau a sampah a; a pa uh Zebedai leh kilohmi a goihte utoh long nusia in a zuita uhi.

²¹Huan Kapernaum khua ah a valut ua; khawlni’n kikhopnain ah a lut a, thu a hilh hi.

²²laigelhmite banglou a, thuneitak a amau thu a hilh ziak in a thuhilh lamdang a sa mahmah uhi.

²³A kikhopnain uah dawininpai mi khat a na om a; aman:

²⁴“Nazaret Jesu, kou leh nang bang ahia i kizolhna om? Kou hon hihmang dia hongpai na hi maw? Nang k’on thei a, Pathian Misiangthou na hi” chi in, a kikou khia hi.

²⁵Jesu’n a tai a, “Dai inla, asung a kipan hongpawt in” a chi hi.

²⁶Dawinin in amah a engbawl a ngaihtak a kikou in asung a kipan a hongpawtta hi.

²⁷Huan avek un lamdang a sa mahmah ua, huchi in, hiai bang ahia le! Sinsakna thak ahi ve! Dawininte nangawn thuneitak in thu a pia a, a thu a mang zel uh, chi in, a kihou uhi.

²⁸Huan Galili leh a kim gam tengteng ah a tanchin a thangta hi.

²⁹Huan kikhopnain a kipan a pawt un, Jakob leh Johan toh Simon leh Andru inn ah a lutpah uhi.

³⁰Huan Simon sungnu, khosik in a chi a na a, a na lum a; huchi in, a omdan Jesu a hilh pah uhi.

³¹Huan Jesu’n a khut a len in, a phong a; huchi in khosik in a nuseta a, a na uh a sepsak hi.

³²Huan nitaklam a nitum nung in, damlou tengteng leh dawimatte a kiang ah a honpi uhi.

³³A khomi tengteng kongkhak bul ah a hong omkhawm khiukheu uhi.

³⁴Huan mi tampi natna chiteng a nate a hihdam a, dawi tampi a delhkhia a; dawite’n amah a theih ziak un a pau uh a phalkei hi.

³⁵Huan zingsang khovak ma tham in a thou a, a pawt a, gamdai mun ah a hoh a, huai ah a thum hi.

³⁶Simon leh a lawmte’n a nung ah a zui uhi.

³⁷Amah a vamuh un a kiang ah, “Mi tengteng in a hong zong uh” a chi uhi.

³⁸Aman a kiang uah, “Maban khuate ah paini huai a leng thu ka gen theihna ding in; huai mah ka hong pawtsan ahi” a chi hi.

³⁹Huchi in thuhilh a dawite delhkhe kawm in Galili gam tengteng a a kikhopnainte uah a lut hi.

⁴⁰Huan a kiang ah phak a hongpai a, “Na utleh n’on hihsiangthou thei” chi in a ma ah khukdin in a ngen ngutngut hi.

⁴¹Aman a hehpih mahmah a, a sawka, a khoih a, “Ka ut hi, na siangthouta in” a chi hi.

⁴²Huchi in, phakna in amah a nuse paha, a hong siangthouta hi.

⁴³Jesu’n amah a kham bikbek kawm in a sawlkhe pah hi.

⁴⁴“Kuamah kiang a bangmah genlou ding in pilvang in; himahleh siampu kiang ah vakilak inla, na kisiansakna ding in Mosi thilsehte lan in, mite’n a hon theihchetna ding un” a chi hi.

⁴⁵Himahleh amah a pawt a, huai thu nakpitak a kikoupih in a thangzakta hi; huchi in Jesu a langtang in khua ah a lutthei nawnta kei a, gamdai mun ah a om zawta hi; huan munteng a kipan a mite a kiang ah a hongpai uhi.