Read Paite Chin MARK 12 Bible Online

MARK 12 - Paite Chin bible

MARK 12

¹Huan gentehna thu in a kiang uah a gen a, “Mi kuahiam in grephuan a bawl a, a kim huang in a um a, grep sukna ding khuk a tou a, insang a lam a, loukhoumite kiang ah khohloh ding in a pia a, gamdang ah a paisanta hi.

²A gah loh hun in a tansik amau kiang a kipan la ding in lou khohloh mite kiang ah sikha khat a sawl hi.

³Huai mi a na man ua, a vua ua, khutvuak in a paisak nawnta uhi.

⁴Huan sikha dang a kiang uah a sawl nawn a; huai mi leng a lu a na hihliam ua, zumhuaipi in a na bawl uhi.

⁵Huan sikha dang a sawl nawn zel a; huai mi a na that ua, sikha dang tampi leng, khenkhat a na vua ua, khenkhat a na that uhi.

⁶Huan sawl ding khat, a tapa deihtak kia a neilai hi; ‘Ka tapa zaw a na zahtak ding uh’ chi in amah a nanungpen in a kiang uah a sawl hi.

⁷Himahleh huai lou khohloh mite’n, ‘hiai mi gouluah dingpa ahi; i that ding uh aw; huchi in a gouluah ding ei a ahimai ding’ a kichi uhi.

⁸Huchi in amah a man ua, that in, grephuan apat a lawnkhia uhi.

⁹Huaiziak in, grephuan neipa’n bangchi’n a honhih dia? Lou khohloh mite a honhih mangthang dia; lou midangte a pe ding hi.

¹⁰Hiai Laisiangthou na sim kei ua hia? “Inlammite suang deihlouhpen, huai mahmah a ning a suang phatuampen a hong hita hi.

¹¹Huai Toupa hih ahi, i mitmuh un a lamdang hi” chih, a chi hi.

¹²Huan amah mat a tumta ua; huai gentehna thu lah amau dem a a gen ahi chih a thei ngal ua. Huchi in amah a nusia ua, a paimangta uhi.

¹³Huan a thugen a a mattheihna ding in Pharisaite leh Herod pawl a mi kuate hiam a kiang ah a sawl uhi.

¹⁴Huchi in amau a hongtun un a kiang ah, “Sinsakpa, midiktat na hi a, deihsak tuam kuamah na neikei chih ka thei uh, kuamah khentuam neilou in, chihtak ngial in Pathian lam thu na hilh zel hi: Kaisar kiang a leiman liau a siang hia siang lou?

¹⁵Pe ding ka hi ua, pe lou ding?” a chi uhi. Aman a lepchiahdan uh thei in, a kiang uah, “Bangdia hon ze-et na hi ua? Makhai hontawi un, ka en ding” a chi hi.

¹⁶A hontawi ua, aman a kiang uah, “Hiai kua lim leh kua min ahia?” a chi hi.

¹⁷Amau “Kaisar a” a chi uhi. Jesu’n a kiang uah, “Kaisar thilte Kaisar kiang ah pia unla, Pathian thilte Pathian kiang ah peta unla” a chi hi. Huchi in lamdang a sa mahmah uhi.

¹⁸Huan Saddukaite, thohnawnna a omkei chite, a kiang ah a hong uh.

¹⁹A kiang ah, “Sinsakpa, Mosi in, kuapeuh a unaupa’n ta neilou in a zi sihsan leh, a unaupa’n a zi luah in a unaupa ading in chi a suahsak ding chi’n a hon gelh sak hi.

²⁰Ahi, sal sagih a om ua; a upapen in zi a nei a, chi suahlou in a si hi.

²¹Huan a nihna in a luaha, chi suahlou in a si nawn zel a; a thumna in huchi mah bang in.

²²Huchi in sal sagihte chi suahlou in a sita ua, a tawpna ah numei leng a sita hi.

²³Thohnawn hun in a kuapen zi ahi dia le? Sagih te’n zi in a neichiat ngal ua” chi in a dong uhi.

²⁴Jesu’n a kiang uah, “Hiai ziak hilou hia, na theihkhelh nak uh, Laisiangthou leh Pathian thilhihtheihna na theihlouh ziak un?

²⁵Misi lak apat a thohnawn hun un zi leh pasal a kinei lou ding ua, van angelte bang hizawta ding uh ahi.

²⁶Huan misite kaihthoh a a om ding thu lah Mosi laibu a, Loubuk ah, Pathian in, ‘Kei Abraham Pathian, Isak Pathian, leh Jakob Pathian ka hi, chi a, amah a houpih dan na simkei ua hia?’

²⁷Amah misi Pathian ahi kei a, mihing Pathian ahizaw; na theikhial tel uh” a chi hi.

²⁸Huan laigelhmite lak a mi khat a hong a, a kisel uh a na ngaikhia a, Jesu’n amaute thutak in a dawng chih a thei a, a kiang ah, “Thupiak tengteng ah koi ahia thupipen?” chi in, a dong hi.

²⁹Jesu’n, “A thupipen hiai ahi: Israel aw, ngai dih uh, Toupa i Pathian uh Toupa khat kia ahi;

³⁰‘Toupa na Pathian na lungtang tengteng in, na kha tengteng in, na lungsim tengteng in leh na hatna tengteng in na it ding ahi,’ chih.

³¹A zom hiai ahi, ‘nangmah na ki-it bang in na vengte na it ding,’ chih. Hiaite sang a thupiak thupizaw a omkei” chi in, a dawng hi.

³²Laigelhmi’n a kiang ah, “Hina ngei e, Sinsakpa amah zaw khat kia ahi a, amah louzaw kuamah dang a omkei uh,

³³Amah lungtang tengteng, theihsiamna tengteng, hatna tengteng a it a, eimah i ki-it bang a vengte it haltum thilpiak leh kithoihna tengteng sang in a hoihzaw petmah chih, na gendik ngei” a chi hi.

³⁴Piltak in a dawng chih Jesu’n a theih in, a kiang ah, “Pathian gam na gamlat kei hi” a chi a, huai nungsiah kuamah in thu a dong ngamta kei uhi.

³⁵Huan Pathian biakin a Jesu’n thu a hilhlai in, amau a houpih a, “Khrist David tapa ahi chih laigelhmite’n bangchidan a gen uh ahia?

³⁶David ngei in, Kha Siangthou in, Toupa’n, ka Toupa kiang ah, “Na melmate na khepek ngakna a ka bawl masiah ka taklam ah tuin” a chi, a chi hi.

³⁷David ngei in amah Toupa, a chi ngal a, koi a kipan in ahia amah a tapa a hih?” a chi hi. Huan mivantang in kipaktak in a thu a ngaikhia uhi.

³⁸Huan a thuhilhna ah, “Laigelhmite lak ah pilvang un; amau puanaktual silh a vak a ut ua, dawlmunte ah mite chibai a buk ua,

³⁹Kikhopnain a tutphah hoihpen leh Ankuangluina a mun hoihpen a deihtuam nak uhi;

⁴⁰Meithai in a negai ua, kilim bawl in sawtpipi a thum uh; huaite’n siamlouhtanna lianzaw a tang ding uh” a chi hi.

⁴¹Huan sumkholna zawn ah a tu a; sumkholna a mipi sumkhiakdan a en a; mi hau tampitak in tampipi a khia uhi.

⁴²Meithai zawngtak a hongpai a, dal dangka muza nih a khia a, huai tuh paihsa khat hu ahi.

⁴³Jesu’n a nungzuite a sam a, a kiang uah, “Chihtaktak in k’on hilh ahi, sumkholna a khe tengteng lak ah hiai meithai zawngtakin a khe tam pen hi.

⁴⁴Hiaite tengteng in a neihlet uh a khia ua; aman zaw a deihthoh laitak, a neih sun, a hinna ding tengteng a khe vek ahi” a chi hi.