Read Paite Chin MARK 13 Bible Online

MARK 13 - Paite Chin bible

MARK 13

¹Huan Pathian biakin a kipan a paikhiak lai in, a nungzuite lak a mi khat in a kiang ah, “Sinsakpa, en dih, suang leh inn a thupi mahmah hi” a chi hi.

²Jesu’n, a kiang ah, “Hiai inn thupitak na mu maw? Hihchip louh a, suang kichiang hiai ah a omkei ding” a chi hi.

³Huan Olive tang a Pathian biakin zawn a a tutlai in, Peter, Jakob, Johan leh Andru te’n a kiang ah,

⁴“Huaite chikchiang in a hongom dia? Huai tengteng a tun ding chiang in chiamtehna bang a om dia, honhilh in” chi in a simdot uhi.

⁵Jesu’n a kiang uah, “Kuamah in honkhem louhna ding in, pilvang un.

⁶Mi tampi, Khrist ka hi, chi in, keimah min lou in a hongpai ding uh, mi tampi a khempuk ding uhi.

⁷Huan kidou thu leh kidou thuthang na zak hun chiang un mangbang kei un; huaite hongtung ding him ahi uh. Himahleh tawpna zaw ahi nai tadih kei ding.

⁸Nam tuam leh nam tuam a kidou ding ua, gam tuam leh gam tuam a kidou ding ua; mun tuamtuam ah zin a ling dia; kial a ke ding hi. Hiaite nauvei kipatna ahi.

⁹“Himahleh pilvang un; vaihawmmite a hon mansak ding ua; kikhopnain ah a hon vaw ding ua; keimah ziak in gamukte leh kumpipate ma ah theihpihna pe ding in na ding ding uhi.

¹⁰Huan Tanchinhoih nam tengteng kiang a hilh masak ding ahi.

¹¹Huan a honpi ua, a hon matsak hun chiang un, bang ka gen dia chi in, ngaihtuah khawl kei un; a huntak a theihsaka na om peuh uh, huai ngeingei genzaw un; a genpen zaw noumau hilou in Kha Siangthou ahizaw ding hi.

¹²Huan hihlup ding in unaupa leh unaupa a kimansak ding ua, pa in a tapa a mansak ding; tate’n leng a nu leh pate uh a dou ding uh, a thatsak ding uhi.

¹³Keimah min ziak in mi tengteng huat na hi ding uh; himahleh a tawppha a thuakpa, huai mi hotdam in a om ding hi.

¹⁴“Himahleh zawlnei Daniel in a gen bang a hihmangbangpa kihhuai a dinlouhna ding ading na muh chiang un, a sim peuh in a omdan thei hen, huai hun chiang in Judia gam a omte tang sang ah taimang uhen;

¹⁵inn tung a om kum kei hen; a insung a thil lakhe ding in lutsam kei hen.

¹⁶Huan lou a om a puansilh la ding in kiknawn kei hen.

¹⁷Huaini in gaite leh naunou pomte tung a gik ding hi.

¹⁸Huaite phalbi a a hong tunlouhna ding in thum un.

¹⁹Huai nite bang a gimthuakna thupi Pathian bawl leilung piantung a kipan tutan in a om ngei naikei a, chikmah chiang in a om ngei nawn kei ding hi.

²⁰Huan Toupa’n huai nite hihtom kei leh mihing damin a suakta kei ding; himahleh, teltuamte ziak in nite a hih tom hi.

²¹“Huai hun chiang in, kuapeuh in na kiang ua, En dih uh; Khrist hiai ah a om, ahihkeileh En dih uh: huai ah hiam a chih chiang un gingta kei un;

²²Khrist takloute leh zawlnei takloute hongpawt ding ahi ngal ua, huaite’n chiamtehna leh thillamdang a hih ding uh, hithei ngial leh teltuamte nangawn a khem theihna ding un.

²³Nou zaw pilvang un, ngai dih uh, bangkim k’on hilh khol khinta ahi.

²⁴“Himahleh huai nite zoh in, huai gimthuakna khit in, ni hihmial in a om ding a, kha a vak nawn kei ding hi.

²⁵Van a kipan aksite a hong ke ding ua, van a thilhihtheihna omte hihlin in a om ding uhi.

²⁶Huai hun chiang in Mihing Tapa, thilhihtheihna leh thupina lianpi toh mei lak a hongpai a mu ding uhi.

²⁷Huai hun chiang in angelte a sawlkhe dia, a telte lei ningli apat leitawp a kipan a vantawp pha in a pikhawm ding uhi.

²⁸“Huchi in theipi kung ah gentehna zil un: a hiang a hong nou a, a nah a hongsel in nipi a nai chih na thei uhi.

²⁹Huchi mah bang in, nou leng huaite hongtung na muh chiang un, amah a hongnaita a, kongkhak bul mahmah ah a om chih, thei un.

³⁰Chihtaktak in k’on hilh ahi, huai tengteng a tunkim masiah tulai khang a mang kei ding hi.

³¹Lei leh van a mang dia, ka thu ahihleh a mang kei ding hi.

³²“Himahleh huai ni leh dak Pa kia lou ngal kuamah in, van a angelte’n leng Tapa in leng a theikei uhi.

³³Pilvang unla, kiging gige in thum un; a hun theilou na hi ngal ua.

³⁴Mi a in paisan a, a sikhate thu neisak a, a nasep ding uh pe chiat a, kongkhak veng leng kigin ding thu pe phot a, gamdang a vatam bang ahi.

³⁵Huaiziak in kiging gige in om un, inn neipa hongpai ding hun, nitaklam in hia, zan in hia, ak khuan in hia, zing in hia chih na thei ngal kei ua;

³⁶Huchilou in zaw, hongpai guih kha leh ihmu in a honmu kha ding.

³⁷Huan na kiang ua ka gen mi tengteng kiang a ka gen ahi, Kiging gige in om un” a chi hi.