Read Paite Chin MARK 14 Bible Online

MARK 14 - Paite Chin bible

MARK 14

¹Huan ni nih nung in Paikan Ankuangluina leh Tanghou silngou sohlouh Ankuangluina om ding ahi a; siampu liante leh laigelhmite’n, amah zekhem a, man a, a hihlup theihna ding dan a zongzong uhi;

²Himahleh “Ankuanglui sung in hi kei hen, huchilou in zaw vantang lak ah buaina a hongom kha ding” a chi uhi.

³Huan, Bethani khua a phak Simon inn a a omlai a, Ankuang a um lai in numei khat, alabaster bawm a spiknardi thau gimlim man tampi tawi in a hong a, a bawm a hihkham a, a lu ah a sungta hi.

⁴Himahleh khenkhatte a lunghita kei ua, “Bang ding a thau gimlim hihmang mawkmawk ahia?

⁵Hiai thau makhai za thum sang a tamzaw a zuak a, migentheite kiang a piak theih ahi ngal a” a chi uhi. Huchi in, a tung ah a phun uhi.

⁶Jesu’n, “Hih hen aw; bangdia va hihbuai na hi ua? Ka tung ah thil hoihtak a hih ahi.

⁷Mi gentheite na kiang ua om gige ahi ua, na ut hun peuh un na hehpih thei uhi; kei bel na kiang ua om gige lou ding ka hi.

⁸A hihtheih khamkham a hih ahi; ka sapum vui ding a sathau nuhkhol ahi.

⁹Huchi in chihtaktak in k’on hilh ahi, khovel tengteng koipeuh ah leng Tanchinhoih a kigenna ah hiai numei thilhih amah theihgigena ding in a kigen zel ding” a chi hi.

¹⁰Huan Judas Iskariot, sawmlehnihte lak a khat in, Jesu a kiang ua zuausan a a matsak theihna ding in siampu liante kiang ah a vahoh hi.

¹¹Amau huai thu a zaktak un a kipak mahmah ua, a kiang ah dangka piak a chiamta uhi. Huchi in zuausan a matsak ding dan lemtang a zongta uhi.

¹²Huan Tanghou silngou sohlouh ni, ni masapen, Paikan Ankuangluina belamnou a gohzelna ni uah, a nungzuite’n a kiang ah, “Paikan Ankuanglui na nek theihna ding in koi ah vabawl le ung na ut?” a chi uhi.

¹³Huchi in a nungzuite lak a mi nih a sawl a, a kiang uah, “Khopi ah valut unla, huai ah pasal bel a tui pua in hontuak dia; amah zui un.

¹⁴Huan a lutna peuh ah huai inn kempa kiang ah, ‘Sinsakpa’n ka nungzuite toh Paikan Ankuang ka nekna ding uh, mikhual inn pindan koilai ahia?’ a chi, na chi ding uhi.

¹⁵Huchi in aman inn pindan tungnung za tak, van omsa, mansa dimdiam a hon ensak dia; huai ah ei ading in bawl un” a chi hi.

¹⁶Huan nungzuite a pawtta ua, khopi ah a valut ua, a kiang ua a gen bangtak in a vamu ua; Paikan Ankuang a bawlta uhi.

¹⁷Huan nitaklam a hong hih in, amah sawmlehnihte toh a vahohta uhi.

¹⁸Huan an a um ua a neklai un Jesu’n, “Chihtaktak in k’on hilh ahi, na lak ua mi khat, ka kiang a nesam in, hon zuausan in hon mansak ding” a chi hi.

¹⁹Huan a lungkham panta ua, khatkhat in a kiang ah, “Keimah ka hi hia?” a chi chiat uhi.

²⁰Huan aman a kiang uah, “Sawmlehnihte lak a mi khat, ka kuang a tanghou hon diahpihpa ahi.

²¹Mihing Tapa a tanchin a gelh bang tak un a pai ding: himahleh Mihing Tapa mansak ding mipa tung a gik hi: Huai mihing zaw piang kei leh amah adin a hoihzaw ding” a chi hi.

²²Huan an a neklai un Jesu’n tanghou a la a, a vualzawl zoh in a balkham a, a kiang uah a pia a, “La un; hiai ka sapum ahi” a chi hi.

²³Huan nou a la a, kipahthu a gen zoh in a kiang uah a pia a; huchi in, avek un a dawn chiat uhi.

²⁴Huan aman a kiang uah, “Hiai ka sisan a thukhun thak ahi, mi tampi dia pawt ding ahi.

²⁵Chihtaktak in k’on hilh ahi, Pathian gam a a thak ka dawn ni a tun masiah grep guigah tui ka dawn nawnta kei ding” a chi hi.

²⁶Huan la a sak zoh un, a pawt ua, Olive tang ah a paita uhi.

²⁷Huan Jesu’n a kiang uah, “Na vek un lungkia in n’on taisan ding uh. ‘Belamchingpa ka khen dia, belamte a dalh ding uh’ chih gelh ahi ngal a.

²⁸Himahleh ka thohnawn nung in Galili gam ah na ma uah ka pai ding” a chi hi.

²⁹Peter in a kiang ah, “Avek un lungkia in hon taisan mahle uh, ken zaw k’on taisan kei ding” a chi hi.

³⁰Huan Jesu’n a kiang ah, “Chihtaktak in k’on hilh ahi, Tu zan ngeingei in, ak nihvei a khuan ma in, nang thumvei n’on kitheihmohbawl ding” a chi hi.

³¹Aman bel khauhtak in, “Na sihna ah si sam ding himah leng k’on kitheihmohbawl kei hial ding” a chi hi. Huchibang in a chi chiat uhi.

³²Huan Gethsemani a chih mun uh a tung ua; aman a nungzuite kiang ah, “Ka thum sung teng hiai ah na tu un” a chi hi.

³³Peter, Jakob leh Johan a pi a, nakpitak a lungkham in a mangbang mahmah hi.

³⁴Huchi in a kiang uah, “Ka kha a lungkham mahmah a, sihna khophial ahi; hiai ah om unla, kiging gige un” a chi hi.

³⁵Huan neukha in malam ah a vapai zeka, lei ah a khupboh a, a hihtheih leh, huai hun in amah pel ding in a thum hi.

³⁶“Abba, Pa, bangkim na hihthei a; hiai nou kei a kipan in lamang in; himahleh kei thu hilou in nangmah thuthu hizaw hen” a chi hi.

³⁷Huan a hongpai a, amau ihmu in a hong mu a, huchi in, Peter kiang ah, “Simon, ihmu na hi maw? Dakkal khat leng kiging gige in na om theikei maw?

³⁸Khemna a na lutlouhna ding un kiging gige in thum un. Kha in tuh a ngap a, sa zaw a hatkei” a chi hi.

³⁹Huan a vahoh nawn a, a thugen ngei gen in a thum nawn hi.

⁴⁰Huan a hongpai nawn a amau ihmu in a hongmu nawn hi, a ihmut uh a suak mahmah ngal a; a thugen dawn dan ding leng a theikei uhi.

⁴¹Huan a hongpai thumveina ah a kiang uah, “Na ihmu lailai umaw, na tawlnga lailai umaw? A hunta ve; a hun hongtungta; mihing Tapa mikhialte khut a zuausan a piak ahita hi.

⁴²Thou un, i pai ding uh; en un, zuausanpa a hongnai hi” a chi hi.

⁴³Huan a genlai tak in, Judas, sawmlehnihte lak a mi khat, a hong tungpah a, siampu liante leh laigelhmite leh upate a kipan mipi, namsau leh khetbuk tawite toh.

⁴⁴Huan zuausanpa’n, “ka tawp peuhmah amah ahi ding; man unla, kizentak in na pimang ding uh,” chi in chiamtehna a na hilhkhawl dimdiam hi.

⁴⁵Huchi in a tuntakin a vanaih a, “Rabbi!” chi in, a tawp tonton hi.

⁴⁶Huan amah a lenta ua, a manta uhi.

⁴⁷Huan a kiang a dingte lak a mi kuahiam in a namsau a dok a, siampu lianpen sikha a sat a, a bil a sat khiaksak hi.

⁴⁸Huan Jesu’n amau a houpih a, a kiang uah, “Temsaute, khetbukte tawi in suamhat man ding bang in, honman ding in n’ong kuan uh maw?

⁴⁹Pathian biakin ah niteng a thuhilh in na kiang uah ka om a; n’on man ngal kei ua, himahleh Laisiangthou thugelh a tun theihna ding eive,” a chi hi.

⁵⁰Huan avek un amah a nusia ua, a taimang vekta uhi.

⁵¹Tangval kuahiam, puanmalngat kia bat in, amah a zui a; amah a na man uhi.

⁵²Himahleh a puanmalngat a taisan a, vuaktang in a taimangta hi.

⁵³Jesu siampu lianpen kiang ah a pi ua; siampu liante, laigelhmite tengteng toh a hong ton uhi.

⁵⁴Peter in gamlapi a pai in amah a zui a, siampu lianpen inn huangsung konglai pha in; sikhate lak ah meilum awi in a tu sam hi.

⁵⁵Jesu a hihlup theihna ding un siampu liante leh vaihawmmite tengteng in amah hekna a zong ua, a mu kei uhi.

⁵⁶Mi tampi in zuau in a hek ua, himahleh, a hekna thu uh a kituak kei hi.

⁵⁷Huan kuate hiam ading ua, zuau in a hek uhi,

⁵⁸Hiai mi’n, “Pathian biakin khut a lam ka hihse dia, ni thum sung in biakin dang, khut a lamlouh, ka lam ding, a chih, ka za uh,” a chi uhi.

⁵⁹Huchi in leng a hekna thu uh a kituak thei sam kei uhi.

⁶⁰siampu lianpen a lai ah ading khia a, Jesu kiang ah, “bangmah a dawnglou maw? Hiaite hon hekna bangchidan ahia?” chi in, a dong hi.

⁶¹Amah lah a daidide a, bangmah in a dawngkei hi. siampu lianpen in a kiang ah, “Khrist, Hampha Tapa, na hi hia?” chi in, a dong nawn hi.

⁶²Jesu’n, “Hi e; Mihing Tapa thilhihtheihna taklam a tu a, van meilak a hongpai na mu ding uh,” a chi hi.

⁶³siampu lianpen in a puansilh a botkek a, “Theihpih dang bang din i deih dia?

⁶⁴Pathian a gensiat dan na zata uh; bangchi na sa ua?” a chi hi. Avek un amah sitakin a sep chiat uhi;

⁶⁵Huan a khen in amah a chilsiat pah ua, a maituam in khuttum in a tum ua, a kiang ah, zawlnei bang in gen in, a chi uhi: sikhate’n a paipih kawm un a khutpek un a beng ekek uhi.

⁶⁶Huan Peter nuailam a inn huangsung konglai a a omlai in siampu lianpen sikha nungakte lak a khat a hongpai a,

⁶⁷Peter meilum awi a mu a, a en a, “Nang leng Jesu Nazaret mi kiang a om na hi ve,” a chi hi.

⁶⁸Aman, “Na thugen ka theikei, a ngaihna leng ka theikei,” chi in, a kitheihmohbawl hi. Inlim ah a pawtkhia a; huchi in ak a khuangta hi.

⁶⁹Huan nungak in a mu a, a kiang a dingte kiang ah, “Hiai mi a lak ua mi ahi,” a chi nawn hi.

⁷⁰Himahleh a kitheihmohbawl nawn hi. Sawtlou nung in a kiang a dingte’n, Peter kiang ah, “A lak ua mi hi tawk teh, Galili gam a mi na hi ngal a,” a chi uhi.

⁷¹Aman, “Huai na mihing gen uh ka theikei,” chiin, hamsia kiloh in a kichiamta hi.

⁷²Huan ak khuan nihveina a khuang pah hi. Peter in, Jesu’n a kiang a, Ak nihvei a khuan ma in nang thumvei n’on kitheihmohbawl ding, a chih a theikhethak nawn a, huai a ngaihtuah a a kapta hi.