Read Paite Chin MARK 15 Bible Online

MARK 15 - Paite Chin bible

MARK 15

¹Huan zingsang a hong hih in, siampu liante, upate leh laigelhmite leh vaihawmte tengteng toh a kihou ua, Jesu a hen ua, a pi ua, Pilat kiang ah a peta uhi.

²Pilat in a kiang ah, “Judate Kumpipa na hi hia, chi in a dong a, aman a kiang ah, “Na gen bang in himah ing” chi in, a dawng hi.

³Siampu liante’n thu tampi in a hek uhi.

⁴Huchi in Pilat in a dong nawn a, a kiang ah, “Bangmah a dawnglou maw? Ngai in, a hon hekna uh tamdan!” a chi hi.

⁵Jesu’n bangmah in a dawngkei a; huchi in Pilat in lamdang a sa mahmah hi.

⁶Huan Pilat in ankuangluini in mi henta khat a nget peuhmah uh a pawtsak zel hi.

⁷Mi khat, Barabba a chih uh, a helte lak ah hensa in a om a, amah bel helna a pang leh tualthat ahi.

⁸Mipite a hohtou ua, amau adia a hihsak zel bang a hihsak ding in a ngen uhi.

⁹Pilat in a dawng a a kiang uah, “Judate Kumpipa hon khahsak leng na ut uhia?” a chi hi.

¹⁰Siampu liante’n hazat ziak a paipih ahi uh chih a thei hi.

¹¹Himahleh siampu liante’n mipite Barabba pawtsak zawk ngen ding in a hanthawn uhi.

¹²Huan Pilat in a kiang uah, “Judate Kumpipa a chih uh bang ka loh tadia le?” chi in a dong nawn hi.

¹³Huan amau “Kros ah kilhden in” chi in a kikou nawn uhi.

¹⁴Pilat in a kiang uah, “Bang din maw? Bang a hihkhial a ahia?” a chi hi. Himahleh amau, “Kros ah kilhden in” chi in, a kikou semsem uhi.

¹⁵Huchi in Pilat in mipite hih lungkim ut in, Barabba a pawt sakta a; Jesu a vuak zoh in Kros a kilhden ding in a peta hi.

¹⁶Huan sepaihte’n inn huangsung konglai, Praitoriam a chih uah, amah a pilut ua, a pawl ua mi tengteng a samkhawm uhi.

¹⁷Huchi in puansandup a silhsak ua, linglukhu phan in a khusak uhi.

¹⁸“Chibai, Judate Kumpipa!“ chi in, chibai a buk uhi.

¹⁹A lu sialluang in a khen ua, chil a siat ua, khukdin in chibai a buk uhi.

²⁰Huan nuihzabawlna a a zatzoh un, puansandup a hawk ua, amah puan a silhsak nawn ua, Kros a kilhden ding in a pikhia uhi.

²¹Huan mi khualzin khat, Kurini khomi, Alexander leh Rufas pa, Simon, a gam lam a kipan hongpai, a Kros paw ding in a man uhi.

²²Jesu Golgotha mun ah a pi ua, huai Luguh mun, chihna ahi.

²³Huan uain murra toh hel a pia ua, himahleh a dawn nuam kei hi.

²⁴Kros ah a kilhden ua, a tan ding chiat uh theihna ding in aisan in a puansilhte a kihawm uhi.

²⁵A kilhden uh dak thumna vel ahi.

²⁶A hekna lai a tunglam ah a gelh ua, “JUDATE KUMPIPA” chi in.

²⁷Huan suamhat nih, a taklam ah khat, a veilam ah khat amah toh a kilhden sam uhi.

²⁸Laisiangthou in, “Amah talekte toh simkhawm ahita,” chih genna hih tangtun in a omta hi.

²⁹Huan mi kivialleh peuh in a lu uh sing in, “Ehe! Nang Pathian biakin susia a ni thum a lamnawnpa,

³⁰Ki hondam inla, Kros a kipan hongkum in” chi in a enghou uhi.

³¹Huchi mah bang in siampu liante’n, laigelhmite toh, amau lak a enghou in, midang bawn hondam a, amah kihondam theilou pi in, a chi uh.

³²I muh a, i gintak theihna ding in, Khrist, Israel Kumpipa, tuin Kros a kipan hongkum leh a kei dia” a chi uhi. Huan amah toh a kilhden samte’n leng a enghou uhi.

³³Huan dak gukna a honghih in, dak kua na dong in gam pumpi a hong mialta hi.

³⁴Dak kua na ding in Jesu aw ngaihtak in, “Eloi, Eloi, lam a sabakthani?” chi in a kikou khia a, huai tuh “Ka Pathian, Ka Pathian, bangdia hon paisan?” chihna ahi.

³⁵Huan a kiang a ding khenkhatte’n huai a zak un, “Ngai un, Elijah a sam” a chi uhi.

³⁶Mi khat a tai a, spanji uain thuk a diah dim in, chiang dawn ah a tak a, a dawnsak hi. Khawldih ua, amah lakhe ding in Elijah a hong hiam i en ding uh” a chi uhi.

³⁷Jesu aw ngaihtak in a kikou a, a kha a khahta hi.

³⁸Pathian biakin puanzak a tunglam a kipan a nuailam pha in a hong keksuakta hi.

³⁹A mazawn a sepaih zaheutupa ding in huchibang a a kha a khah a muh in, “Hiai mi Pathian Tapa ahi ngeingei” a chi hi.

⁴⁰Numeite’n leng gamla tak ading in a en ua; huaite lak ah Mari Magdalini, Mari Jakob naupangzaw leh Joses nu, Salomi leng a pang uhi;

⁴¹Huaite Galili gam a a omlai a, amah zui a, a na sepsak zelte ahi uhi; numei dang tampi Jerusalem khua a amah toh hohtoute leng a om uhi.

⁴²Huan nitaklam a hih in Kisakkholhna a hih ziak in, huai khawlni ma ni ahi,

⁴³Arimathai khua a om, Joseph, vaihawmpa zahtakhuai, Pathian gam lamen mi, a hongpai a, hangsantak in Pilat kiang ah a lut a, Jesu luang a ngenta hi.

⁴⁴Huchi in Pilat in huchibang a a sih pah lamdang a sa mahmah a, huchi in sepaih zaheutupa sam in, a sihna a sawtta hiam chih a dong hi.

⁴⁵Sepaih zaheutupa kam a a sita chih a theih in, a luang Joseph kiang ah a pia hi.

⁴⁶Huan aman puanmalngat a lei a, amah a lakhia a, puanmalngat in a tuam a, han khuakkuak ah a sial a, hankong suang in a delhta hi.

⁴⁷Huan Mari Magdalini leh Joses nu Mari in a sialna a mu uhi.