Read Paite Chin MARK 16 Bible Online

MARK 16 - Paite Chin bible

MARK 16

¹Huan khawlni a bei in Mari Magdalini, Mari Jakob nu leh Salomite han ah a vahoh ua, amah nuh ding in gimlim a lei uhi.

²Ni sagih ni masapen in, zingsang pi in, ni suahlai in han a va tung uhi.

³“Han kong a suang kuan hon khukkhiak sak ding a diam aw?” a kichih laitak un,

⁴A dak uh leh suang khukkhiaksa in a muta uhi, a lian mahmah hi.

⁵Hansung ah a lut ua, pasal khat puanngou silh, a taklam pang a tu a mu ua; lamdang a sa mahmah uhi.

⁶Huchi in aman a kiang uah, “Lamdang sa kei un; Jesu Nazaretmi, a kilhden uh, na zong ua; a thou nawnta hi; hiai ah a omta kei; en un, a sialna uh!

⁷Himahleh pai unla, a nungzuite leh Peter kiang ah, Galili gam ah na ma uah a pai ding hi; na kiang ua a chih bang ngei in huai ah na mu ding uh” a chi hi.

⁸Huchi in linna leh lamdang sakluatna in amau a phaktak ziak in a pawt ua, han a kipan a tai vengveng ua; a lauh ziak un kuamah kiang ah bangmah a genkei uhi.

⁹Huan ni sagih ni masapen zingsang a a thohnawn in, Mari Magdalini, asung apat dawi sagih a delhkhiakna nu kiang ah a kilak masapen hi.

¹⁰Amah Jesu ompih zelte kiang ah a vahoh a, misi sun a a kahlai un a vahilhta hi.

¹¹Himahleh amah a hing a, muh leng a mu chih a za na ua, a gingta tuankei uhi.

¹²Huai nung in a lak ua mi nih gam lam zuan a a pailai un mel dang pu in a kiang uah a kilak nawn hi.

¹³Amau nungzui dangte kiang ah a vahilh ua, amau thu leng a gingta tuankei uhi.

¹⁴Huai nung in, an a umlai un sawmlehkhatte kiang ah a kilak a, a thohnawn nung a a mute thu a gintak louh uh leh a lungtang khauh thu uah a taihilh hi.

¹⁵A kiang uah, “Khovel tengteng ah pai unla, thilsiam tengteng kiang ah Tanchinhoih hilh un.

¹⁶A gingta a baptisma tang hotdam in a om ding a; gingtalou tuh siamlouh tang in a om ding uhi.

¹⁷Hiai chiamtehnate’n a gingtate a zui zel ding: Ka min in dawite a delhkhe ding ua, pau thak in a pau ding uhi;

¹⁸gulte khut in a la ding ua; sihna gu bangchibang dawn mahle uh bangmah a chi kei ding uh; damloute tung ah a khut uh a koih ding ua, a damzel ding uhi” a chi hi.

¹⁹Huchi in Toupa Jesu a kiang ua thu a genkhit in van a pitouh in a om a, Pathian taklam ah a tu hi.

²⁰Huchi in amau a paikhia ua, gam teng ah thu a genta uhi. Toupa’n amau a seppih a, chiamtehnate’n zui in thu a hihkip zel hi. Amen.