Read Paite Chin MARK 3 Bible Online

MARK 3 - Paite Chin bible

MARK 3

¹Huan kikhopnain ah a lut nawn a; huai ah khutzaw khat a na om hi.

²Amah a hek theihna ding un khawlni a a hihdam nop leh noplouh a enkhia uhi.

³Aman khutzaw kiang ah, “Ding khia in” a chi hi.

⁴Huan a kiang uah, “Khawlni’n hihhoih hia siang, hihsiat? Hotdam hia siang, hihlup?” chi’n a dong hi. Himahleh a daidide uhi.

⁵Huan a lungtang uh tak ziak a lungkham mahmah leh hehkawm a amaute a et velvel nung in, huai mi kiang ah, “Na khutzan in” a chi a, huchi in, a zankheta a a khut a damta hi.

⁶Pharisaite a pawtkhia ua, amah hihlup theihna ding lampi ngaihtuah in Herod pawl a mite toh a kihoukhawm pah uhi.

⁷Jesu a nungzuite toh dil lam ah a paimang ua; Galili gam a kipan mipi tampitak in a zui uhi;

⁸A thilhih thupidan a zak un Judia gam a kipan, Jerusalem khua a kipan, Idumai gam a kipan, Jordan gal a kipan, Tura leh Sidon khokim a kipan in mipi tampitak a kiang ah a hongpai uhi.

⁹Mipi ziak in amah adia long neu mansa a om ding in a nungzuite a hilh hi, huchilou in zaw honum lutlut ding uh, a chi hi.

¹⁰Mipi tampi a hihdamtak ziak in natna nei peuhmah in amah a khoih theihna ding un a boh huthut uhi.

¹¹Dawininte’n leng amah a muh un a ma ah khupboh in, “Nang Pathian Tapa na hi” chi in, a kikou uhi.

¹²Huan a tanchin genthang lou ding in a kiang uah a chi bikbek hi.

¹³Huan tang ah a hohtou a, aman a ngaihngaih a sam a; amau a kiang ah a hohtou uhi.

¹⁴A kiang a om ding leh thugen dia a sawlkhiak ding in sawmlehnihte a namkip hi.

¹⁵Natnate hihdam ding leh dawite delhkhe ding in thuneihna a pia hi.

¹⁶Huai mite, Simon, Peter, a chih pa;

¹⁷Zebedai tapa, Jakob leh Jakob unau Johan, huai mite Boanerges a chihte; huai omdan tuh vanpiging tapate chihna ahi.

¹⁸Andru, Philip, Bartholomai, Matthai, Thomas, Alphai tapa Jakob, Thaddai, Kanan mi Simon leh,

¹⁹a mansakpa, Judas Iskariot ahi uhi.

²⁰Huaizoh in, in khat ah a lut uhi. Huai ah mipi tampi a hong ki khawm nawn ua, huchi in an nangawn leng a ne theikei uhi.

²¹Huan a lawmte’n a zak un, “Lungsim buai” chi in amah mat a tum uhi.

²²Huan Laigelhmi, Jerusalem khua a kipan a hongsukte’n, “Beelzibul a zawl hi, dawite kumpipa ziak in ahi, dawite a delhkhiak” a chi uhi.

²³Jesu’n laigelhmite a sam a, gentehna in a kiang uah, “Setan in Setan mah bangchi in a delhkhe thei dia?

²⁴Gam leng amah a kidou leh, huai gam ading khe theikei ding hi.

²⁵Inkuan khat leng amah a kidou uleh, huaite inkuan ading khe theikei ding uhi.

²⁶Setan leng amah kidou a, a kilan leh, ading khe theikei ding a, a mangthang zaw ding hi.

²⁷Kuamah in mi hatpa a hen masak phot kei leh inn a lut in a sum a laksak theikei uhi, huai nung in bel a inn a lok mai ding uhi.

²⁸“Chihtaktak in k’on hilh ahi, mihing tate, a khelhna tengteng uah leh Pathian a gensiatna bang peuh uah leng a gensiatnate uh ngaihdam ahi ding hi.

²⁹Kuapeuh Kha Siangthou hilhial gensia zaw chikmah chiang in ngaihdam a hi kei ding a, tangtawn khelhna a siamlouh in a omzaw ding” a chi hi.

³⁰Dawinin a zawl ahi, a chih ziak un huai a gen ahi.

³¹Huan a nu leh a unaute a hong ua, inn pua ah ading ua; amah sam di’n mi a sawl uhi.

³²A kim ah mipi tu diamduam te’n a kiang ah, “Ngai dih, inn pua ah na nu leh na sanggampate’n a hon ngak uh” a chi uhi.

³³Aman a kiang uah, “Ka nu leh ka samgampate kuate ahi ua?” chi’n a dong hi,

³⁴A kiang a tute a en vialvial a, “En un, ka nu leh ka sanggampate;

³⁵kuapeuh Pathian deihlam hih photphot ka sanggampa, ka sanggamnu leh ka nu ahi uh” a chi hi.