Read Paite Chin MARK 4 Bible Online

MARK 4 - Paite Chin bible

MARK 4

¹Huan tuipiau ah thu a hilh nawn hi. Mipi tampitak a kiang ah a hong kikhawm ua, huchi in, dil ah long ah a tuang a, a tu a, mipi tengteng tuipiau a leitung ah a om uhi.

²Huan gentehna zang in thil tampi a sinsak a, amah sinsakna dan in a kiang uah,

³“Ngaikhia unla, en dih ua; buhchithehpa buhchi theh ding in a kuan hi.

⁴Huan hichi a honghi a, a thehlai in a khen lampi sik ah a kia a, vasate’n a nezou uhi.

⁵A khen suangsilei ah a kia a; lei a sah louh ziak in a pou pah hi.

⁶Himahleh ni a hongsuah in haivuai in a hongom a, zung a neih louh ziak in a vuaimang uhi.

⁷A khen loulingnei lak ah a kia a, loupa a hong khang a, buhkungte a depmang a, a gahta kei hi.

⁸A khen lei hoih ah a kia a, a pou a, a khanglian a, a gah a; a leh sawmthum a leh sawmguk leh a leh za in a pung chiat uhi” a chi hi.

⁹Huan a kiang uah, “Kuapeuh zakna ding bil nei in za hen!” a chi hi.

¹⁰Huan amah kia a omlai in a kim a omte leh sawmlehnihte’n gentehna thu a dongchian thak uhi.

¹¹Aman a kiang uah, “Pathian gam thuguk zaw noute kiang a piak ahi a, pawlam mite ading in bel bangkim gentehna a gen ahi.

¹²Muh zaw a mu na ua, theih zaw a theisiam kei ding uh, huchilou in zaw a kihei nawn ding ua, ngaihdam a hong hikha ding uh” a chi hi.

¹³Huan aman a kiang uah, “Hiai gentehna thu na theisiam kei umaw? Huchi a hih in bangchi’n gentehna thudangte na theisiam tuan ding ua?

¹⁴Buhchithehpa’n thu a theh ahi.

¹⁵Lamsik a thu theh hiai bang ahi uh; thu a zaktak un Setan kintak a hongpai in a lungtang ua thutheh a lakmangsak hi.

¹⁶Huchi bangmah in suangsilei a theh hiaite ahi uh; thu a zak phet ua kipaktak a pom pahte.

¹⁷Himahleh amau ah zung a neikei ua, sawtlou chik kia a om uh; huai nung in thu ziak a gimthuakna hiam sawina hiam a hongom phet in a kipukpah pah uhi.

¹⁸Huan midangte loulingnei lak a theh bang ahi uh; huaite’n thu a zata ua,

¹⁹himahleh khovel lunggulhnate, thildang duhgawlnate a honglut chiang in, thu a dep a, gahlou in a om hi.

²⁰Huchi in lei hoih a kia hiaite ahi uh; thu za a, pom, a leh sawmthum, a leh sawmguk, leh a leh za a gahte ahi uh” a chi hi.

²¹Huan a kiang uah, “Mi’n khawnvak de in a koihna a koihlou in, lawh nuai hiam, lupna nuai hiam ah a koih ngei ua hia?

²²Thanglou ding a im bangmah a om ngeikei a, langlou ding a sel bangmah a omsam kei hi.

²³Kuapeuh zakna ding a bil nei peuh in za hen” a chi hi.

²⁴Huan a kiang uah, “Na zak uh bang ahia, pilvang un; na tehna ngei mah ua tehsak in na om ding ua, a tamzaw bawn piak in na om ding uhi.

²⁵Kuapeuh a nei piak behlap in om ding ua, kuapeuh a neilou a neihsun nangawn laksak in om ding uh” a chi hi.

²⁶“Pathian gam tuh min lei a chi a tuh bang ahi a chi hi.

²⁷Zan chiang in a ihmu a, sun chiang in a thou zel a; chi pou in a na khang a, himahleh bangchi a pou a, khang ahia chih a theikei hi.

²⁸Lei in amah in gah a honsuah a; a masapen in akung, huan avui leh avui ah atang hongom hi.

²⁹Himahleh a gah a min chiang in, buhlak a huntak ziak in, kawite in a atpah uhi” a chi hi.

³⁰Huan “Pathian gam bang toh i tehpih dia? Ahihkeileh, bang gentehna in ahia i genteh ding? a chi hi.

³¹Ankam chi tangkhat lei a a tuh un, lei a chi tengteng sang in neupen mahleh,

³²A tuh nung un a hongpou a, loupa tengteng sang in a honglian zawta a, hiang liantak a honnei a, huchi in tungleng vasate a lim ah a giak uhi, huchi mah bang ahi” a chi hi.

³³Huan huchibang gentehna thu tampi in, a theihsiam theih khomkhom uh, a kiang uah a gen zel hi.

³⁴Himahleh gentehna lou in zaw a kiang uah thu a gen ngeikei; amah nungzuite kiang ah a sim in bangkim a hilhchian zel hi

³⁵Huai ni mah nitaklam a hong hih in, a kiang uah “Galkhat lam i kai ding uh” a chi hi.

³⁶Huchi in mipite paisan in, a om ngeingei bang in, long ah a paipih pah ua, long dangte leng a kiang ah a om uhi.

³⁷Huchi in huihpi thupitak a hongnung a, tuikihotte long ah a hong kihot lut zuazua hi, huchi in long a hong dimta hi.

³⁸Amah lukham kham a ihmu in, longmei lam ah a om hi. Huan a phawng ua a kiang ah, “Heutupa, ka manthat uh khawksalou na hi maw?” a chi uhi.

³⁹Amah a hongthou a, huih a tai a, dil kiang ah leng “Dai inla, om kinken in” a chi hi. Huan huih a tawp a, a hong daidide hi.

⁴⁰Aman a kiang uah, “Bangchi a hichitel a lau na hi ua oi? Ginna neilou na hi umaw?” a chi hi.

⁴¹Huchi in lau petmah in a lau ua, “Hiai mi kua ahia le, huih leh dil nangawn in a thu a man uh?” a kichi uhi.