Read Paite Chin MARK 5 Bible Online

MARK 5 - Paite Chin bible

MARK 5

¹Huan dilgal, Gerasin mite gam a hongtung uhi;

²Long a kipan a pawtnung in dawininpai khat, han a kipan a hongpawt in amah a natuak pah hi;

³Huai mi han ah a om zel; kuamah in sik khainiang nangawn a hen theilouh uh ahi.

⁴Sikkol leh sik khainiang in a hen ua; himahleh sik khainiang a bottat a, sikkol leng a hihtan zel a; kuamah in a khoizual zou kei uhi.

⁵Sun leh zan in han leh tang ah a kikou kou a, suang in a ki-at hi.

⁶Huan gamla tak a kipan Jesu a muhtak in a tai a, amah a bia hi.

⁷Huan aw ngaihtak a kikou in, “Jesu, Pathian Tungnungpen Tapa, kei leh nang bang ahia i kizolhna om? Hon gimsak lou ding in Pathian min in nget chihtak in k’on ngen hi” a chi hi.

⁸Jesu’n a kiang ah, “Nang, dawininpai, hiai mi sung a kipan pawt in” a na chita hi.

⁹Huan aman “Na min bang ahia?” chi’n a dong hi. Aman, a kiang ah “Ka min nuai ahi, tampi ka hih ziak un” a chi hi.

¹⁰Huai gam apat amau sawlkhe lou ding in Jesu kiang ah nakpi’n a ngen hi.

¹¹Huan huailai a tangpang ah vokhon tampi a ta uhi.

¹²Dawininte’n, “Vok sung ah honsawl in, asung ua ka lut theihna ding un” chi in, a kiang ah a ngen uhi.

¹³Aman thu a pia a, huchi in, dawininte a pawt ua, vok sung ah a lut ua; vokhon, sang nih phial ahi ua, ken ah a taisuk ua, dil ah a tailutta ua; dil ah tuihak in a sita uhi.

¹⁴Huan vok anpete a tai ua, khua leh lou ah a gen ua, huai thil hongom bang ahia chih en ding in mite a hong taikhawm uhi,

¹⁵Jesu kiang a hongtung ua, dawimatpa, a lungsim ngei pu leh puansilh a huai a tu a mu ua, huchi in a a lauta uhi.

¹⁶A ma ua mute’n, dawimat tung a thiltun dan leh vok tanchin amaute a na hilh uhi.

¹⁷Huan amau a gam ua kipan a pawt ding in a ngenta uhi.

¹⁸Huan long a a lut in dawininpaipa’n amah kiang a omsak din a ngen hi.

¹⁹Himahleh Jesu’n a phalkei a, a kiang ah, “Na inn a na lawmte kiang ah pai inla, Toupa’n nang dia thil hon hihsak a thupidan leh nang a hon lainat dan vahilh in” a chi zaw hi.

²⁰Huan a pai a, Dekapolis khua ah Jesu’n amah dia thil a hihsak thupidan a tangkoupihta hi. Huan mi tengteng in lamdang a sa mahmah uhi.

²¹Jesu long a galkhat lam a a hong kainawn in mipi tampitak a kiang ah a hong paikhawm ua, amah dilgei ah a om hi.

²²Huchi in kikhopnain a vaihawmte lak a mi khat, a min Jaira, a hong a, Jesu a muhtak in a khebul ah a khupboh hi.

²³“Ka tanu naupang chik a si dekdek a; hongdam a, a hin theihna ding in hongpai a a tung a na khut koih ding in k’on ngen hi” chi in, nakpi’n a thum hi.

²⁴Huchi in Jesu a kiang ah a vahoh a, mipi thupitak in zui in, amah a boh lutlut uhi.

²⁵Huan numei khat kum sawmlehnih sipawt a damlou a om hi,

²⁶Daktor tampi lak ah nakpitak a thuak in, a neih tengteng a zangbei khinta a, phattuam naksang in a se zawsop hi.

²⁷Huai min Jesu tanchin a naza a, a nung ah mipi lak ah a hongpai a, a puanmong a khoih hi.

²⁸“A puanmong kia khoih leng hihdam in ka om mai ding” a lungsim in a chi hi.

²⁹Huan thakhat in a sipawt a kam ngal a, a natna hihdam ahi chih a sa ah a kitheita hi.

³⁰Jesu’n, asung a kipan thilhihtheihna a pawt chih a thei a, milak ah a kihei vialvial a, “Kua ahia ka puanmong khoih?” a chi hi.

³¹A nungzuite’n a kiang ah, “Mipi’n a honboh lutlut uh mu chin a, kua ahia hon khoih? Bangchidan a chi na hia?” a chi uhi.

³²Aman huai thilhihnu muh tum in a en vialvial hi.

³³Huchi in numei in a tung a thil a hihsak thei in, lau leh ling kawm in a hongpai a, a ma ah khupboh in, a kiang ah thudik a hilhvek hi.

³⁴Aman a kiang ah, “Tanu na ginna dampih na hi, khamuangtak in pai inla, na natna a kipan na damta in” a chi hi.

³⁵A pau laitak in kikhopnain a vaihawmpa inn a kipan mi a hongpai ua, “Na tanu sita hi, sinsakpa hihbuai lailai ding na hiam?” a chi uhi.

³⁶Jesu’n a thugen uh ngeingaih lou in, kikhopnain a vaihawmpa kiang ah, “Lau ken, gingta mai in” a chi hi.

³⁷Peter, Jakob, leh Jakob unau Johan chih louhngal midang kuamah in amah a zuih uh a phal kei hi.

³⁸Huan kikhopnain vaihawmpa inn a tung a, Jesu’n a na buai vengvung, kap vengvung leh a mau vengvung a za hi.

³⁹A valut a, a kiang uah, “Bangdia bil am zen a kap na hi ua? Naupang silou hi, a ihmu ahizaw hi” a chi hi.

⁴⁰Huan amah a nuihsan maimah uhi. Himahleh aman avek un a delkhia a, naupang omna ah a valut hi,

⁴¹Huan naupang khut a len a, a kiang ah, “Talitha kumi” a chi a, “Nungaknou, thou in, k’on chi” chihna ahi.

⁴²Huan numei naupang a thou a, a paipah ngal a; amah kum sawmlehnih mi ahi hi. Huan amau lamdang a sa mahmah uhi.

⁴³Aman a kiang uah, “Hiai kuamah in theikei hen” a chi bilbel hi, nekding piak ding thu a pia hi.