Read Paite Chin MARK 8 Bible Online

MARK 8 - Paite Chin bible

MARK 8

¹Huai nite in, mipi tampitak a hongom nawn ua, nekding bangmah a neikei ua, aman a nungzuite a sam a, a kiang uah,

²“Mipite tuin ka kiang ah ni thum a omta ua, nekding bangmah a neih louh ziak un ka lainat mahmah hi.

³Anngawl in a inn uah paisak leng lamkal ah a bah kha ding uh; khenkhatte houh a hongpaina uh a gamla mahmah hi” a chi hi.

⁴A nungzuite’n, “Mi’n hiai gamdai ah koi a tanghou in ahia hiai mite a hihtai theih ding uh?” chi in amah a dawng uhi.

⁵Huan aman, “Tanghou phel bangzah na nei ua?” chi in, amau a dong a. Amau, “Phel sagih” a chi uhi.

⁶Huan mipite lei a tu ding in thu a pia a; tanghou phel sagih a la a, kipahthu a genkhit in a balkham a, a ma ua lui ding in a nungzuite kiang ah a pia a; huchi in mipite ma ah a luita uhi.

⁷Ngasa tawmchik leng a nei ua; aman a vualzawl a, huaite leng a ma ua lui ding in thu a pia hi.

⁸Huchi in a ne ua, a kham chiat ua; a khamval nen uh bawm sagih dim in a luak uhi.

⁹Amau sang li vel ahi ua; aman amaute a paisakta hi.

¹⁰Amah bel a nungzuite kiang ah long ah a tuangpah a, Dalmanutha gam a tungta uhi.

¹¹Pharisaite a hongpai ua, amah ze-etna ding in, amah apan van a kipan a chiamtehna zong in amah a hong sel uhi.

¹²Huan amah a lungsim in nakpi’n a nak kuaikuai hi, “Bang a chia hiai khangte’n chiamtehna zong uh ahia? Chihtaktak in k’on hilh ahi, hiai khangte kiang ah chiamtehna himhim piak ahi kei ding” a chi hi.

¹³Huchi in amaute paisan in long ah a tuang nawn a, galkhat lam ah a paita hi.

¹⁴Huan a nungzuite’n tanghou a tawi mangngilh ua, tanghou phel khat kia lou ngal long ah tanghou dang himhim lah a neikei uhi.

¹⁵Huan, aman a kiang uah, “Pharisaite silngou leh Herod silngou lak ah kiveng unla, pilvang un,” a chi hi.

¹⁶Amau, “tanghou i neih louh ziak eive” chi in a a kingaihtuah uhi.

¹⁷Jesu’n huai a theih in, a kiang uah, “Bangdia tanghou na neih louh ziak ua kingaihtuah na hi ua? Tu nangawn in na theisam kei u maw? Theisiam lou lai maw? Na lungtang uh na khauhsak ua hia?

¹⁸Mit nei napi in na mu kei ua hia? bil nei napi in na za kei ua hia? theigige lou maw?

¹⁹Sang nga lak a tanghou phel nga ka balkhap lai in a nen bawm bangzah ahia na luahdim uh?” a chi hi. Amau, “Sawmlehnih,” a chi uhi.

²⁰Huan sang li lak sagih ka balkhap lai in, a nen bawm bangzah ahia na luahdim uh? a chi a. Amau a kiang ah, “Sagih” a chi uhi.

²¹Aman a kiang uah, bangchidan a tu nangawn a theisiam lou lailai na hi ua?” a chi hi.

²²Huai nung in Bethsaida a hongtung uhi; Huan a kiang ah mittaw a honpi ua, amah khoih ding in a ngen uhi.

²³Aman mittaw khut a len a, khua a kipan a pikhia hi; a mit ah chilsia in a tung a khut a koihkhit in, “Khua na mu thei hia?” chi in a dong hi.

²⁴Amah hong dak khia a, “Mite ka mu; singkung pai bang in ka mu” a chi hi.

²⁵A mit ah a khut a koihnawn a, aman a en gegu a, a hong dam maimah a, bangkim chiantak in a mu theita hi.

²⁶Huan Jesu’n, khua ah leng lut ken chi in, a in ah a paisakta hi.

²⁷Huan Jesu leh a nungzuite a hongpai zel ua, Kaisaria Philippi khua te a hongtung ua; huan paikawm in a nungzuite kiang ah, “Mite’n kei kua ahi a honchi ua?“ chi in, a dong hi.

²⁸Amau “Baptispa Johan ahi, a honchi ua; midang in Elijah ahi, a honchi ua; khenkhat in bel, zawlnei kuahiam ahi, a honchi uh” a chi uhi.

²⁹Huan aman a kiang uah, “Ahihleh nou kei kua ahi n’on chi ua?” chi in, a dong hi. Peter in a kiang ah “Khrist na hi” chi in, a dawng hi.

³⁰Huan aman a tanchin kuamah hilhlouh ding in a chi bikbek hi.

³¹Huan Mihing Tapa in thil tampi a thuak dingte, upate, siampu liante, laigelhmite deihlouh a a om ding, hihlup a a om ding leh ni thum nung a a thohnawn ding thute amau a hilh hi.

³²Huai thute chiantak in a gen hi. Huan, Peter in amah a pituam a, a tai hi.

³³Amah bel a hong kihei a, a nungzuite muh in, Peter a tai a, “Setan, ka nung ah pai in, Pathian thilte ngaihtuahlou in, mihing thilte na ngaihtuah zaw” a chi hi.

³⁴Huan mipite, a nungzuite toh a sam a, a kiang uah, “Kuapeuh in honzuih a ut leh amah kimangngilh in, a Kros pua in honzui hen.

³⁵Kuapeuh a hinna humbit ut in a tan ding a; kuapeuh keimah ziak leh Tanchinhoih ziak a a hinna tan in a humbit ding hi.

³⁶Min khovel a pum in a nei henla, a hinna tan leh, amah ading in bang a phatuam dia?

³⁷Min a hinna tang in bang a pe thei dia?

³⁸Kuapeuh tulai khang angkawm leh gilou chingte lak a keimah leh ka thu zumpih, Mihing Tapa in, angel siangthoute toh a Pa thupina a kivan a a hong hun chiang in, huai mite a hon zumpih thuk sam ding” a chi hi.