Read Paite Chin MARK 9 Bible Online

MARK 9 - Paite Chin bible

MARK 9

¹Huan a kiang uah, “Chihtaktak in k’on hilh ahi, hiai ading a khen, Pathian gam thilhihtheihna toh hongtung a muh ma ua, sihna chiamlou ding a om uh” a chi hi.

²Huan ni guk nung in Peter, Jakob, leh Johan a pituam a, tangsangtak ah Jesu’n a paitouhpih a; a ma uah a mel omdan a hong lamdangta hi.

³Huchi in a puansilhte lei a puansawpmi’n in a sawp ngou theihlouh khop hial a ngou velvol in a hong lamdangta hi.

⁴Elijah leh Mosi a kiang uah a hong kilak ua, Jesu toh a kihou uhi,

⁵Peter in Jesu a houpih a “Heutupa, ei din hiai a om a hoih; aidakbuk thum i lam ding a, nang adin khat, Mosi adin khat, Elijah adin khat” a chi hi.

⁶A lau mahmah ziak un a genpen leng a theikei hi.

⁷Huan amau liah in meipi a hong kai a; meipi apan aw a hongsuak a, “Hiai ka Tapa deihtak ahi, amah thu ngai un” a chi hi.

⁸Kintak in a kimvel a en ua, a kiang ua Jesu kia lou kuamah a muta kei uhi.

⁹Huan tang a kipan a paisuk lai un, “Mihing Tapa misi lak a kipan a thohnawn khit mateng a thilmuhte uh kuamah hilh louh ding” a chi bikbek hi.

¹⁰Huchi in huai thu a vom kinken uhi, Misi lak apat thohnawn pen bang chihna hi ding ahia chih a kidong uhi.

¹¹Huan amau a kiang ah, Bangchidan a laigelhmite’n, “Elijah a hongpai masa ding ahi” chi ahi ua? chi in, a dong uhi.

¹²Aman a kiang uah, “Bangkim bawlhoih thak ding in Elijah a hongpai masa him ahi; ahihleh thil tampi a thuak ding a, muhdah a mawkbawl in a om ding chi a mihing Tapa tungthu bangchidan a gelh a na om ahia leh? a chi hi.

¹³Himahleh k’on hilh ahi, Elijah zaw a hongpai khinta hi, a tanchin a gelh bang ngei un a tung ah a utut un a hihkhinta uhi” a chi hi.

¹⁴Huan nungzuite kiang a tunsuk in, a kim ua mipi tampite leh laigelhmite a na kisellai uh a mu hi.

¹⁵Mipi tengteng in amah a muhtak un lamdang a sa mahmah ua, a kiang ah a taipah ua, chibai a vabuk kheukhou uhi.

¹⁶Aman a kiang uah, “Amaute toh bang thu ahia na kisel uh?” chi in a dong hi.

¹⁷Mipi lak a mi khat in a kiang ah, “Sinsakpa, ka tapa, dawi pautheilou nei, na kiang ah ka honpi a;

¹⁸A matna peuh ah a puksak ekek a; huchi in a chilphuan kia in, a ha a gawi a, a gawng hulhul hi; na nungzuite’n delhkhe le uh ka chih leh a delhkhe theikei uh” a chi hi.

¹⁹Aman a kiang uah, “Ginna neilou khangte aw, Bang tan na kiang ua om ding a bangtan hon thuakthei ding ka hia? Amah ka kiang ah honpi un” chi in, a dawng hi.

²⁰Huan amah Jesu kiang ah a honpi ua; dawi in amah a muhtak in naupang nakpi’n a sawisa paha; huchi in lei ah a puk a, a chilphuan ke zezu in a kikhuk volvol hi.

²¹Huan aman a pa kiang ah, “Hichibang a a hong kipatna bang tan ahita a?” chi in, a dong hi. Aman, “A naupanlai a kipan ahita”

²²“Huchi in amah hih mangthang ding in tamveipi mei ah leh, tui ah a sawnpuk a; himahleh nang bangchi chi hiam bek a na hihtheih leh hon hehpih inla, hon huh in” a chi hi.

²³Jesu’n a kiang ah, “Na hihtheih leh e, a gingtami ading in bangkim hihtheih ahi” a chi hi.

²⁴Huchi in naupang’ pa’n khitui toh, “Toupa, ka gingta hi, ka ginlahna hon huh in” chi in a kikou khia hi.

²⁵Jesu’n mipi hong taikhawm a muh in, dawinin a tai a, a kiang ah, “Nang dawi pautheilou leh bengngong, thu ka honpia hi, asung apat pawt inla, lut nawn ken” a chi hi.

²⁶Huchi in a kikou kheta a, nakpitak a a sawikhit in a pawtta a, naupang misi bang in a om a; huchi in mi tamzawte’n, a si ahi” a chi uhi.

²⁷Jesu’n a khut a len a, a kaithou a; huan a hong thou maimahta hi.

²⁸Huan Jesu inn a a valut leh a nungzuite’n “Bangchi a kou delhkhe theilou ka hi ua? chi in a sim in a dong uhi.

²⁹Aman a kiang uah, “Hichibang zaw thumna leh anngawlna kia loungal in bangchi mah in a pawt theikei” a chi hi.

³⁰Huan huai a kipan a paikhia ua; Galili gam a paikan ua, kuamah theih a deihkei uhi.

³¹A nungzuite a sinsak lai a hih ziak in a kiang uah “Mihing Tapa mihingte khut a matsak in a om dia, a that ding ua; a hihlup nung uh ni thum nung in a thounawn ding” a chi hi.

³²Himahleh a thugen a theisiam kei ua, amah lah a dong ngam kei uhi.

³³Huan Kapernaum khua a hongtung ua; insung a a omlai in, amau kiang ah, “Lampi a bangthu ahia na kisel uh?” chi in, a dong hi.

³⁴Lampi ah, i lak uah kua i thupipen dia? chi a a na kisel khit ziak un a daidide uhi.

³⁵Huan amah a tu a, sawmlehnihte a sam a, a kiang uah, “Kuapeuh in masapen hih a ut leh mi tengteng sang in nanungpen in a om ding ahi, mi tengteng nasem in a om ding ahi” a chi hi.

³⁶Huan naupang chik khat a kai a, a lak uah a dingsak a: a pom a a kiang uah,

³⁷“Kuapeuh ka min ziak a hiai bang naupang chik khat sang keimah hon sang ahi a, kuapeuh kei hon sang kei hon sang ahi kei ding, hon sawlpa sang ahizaw uh” a chi hi.

³⁸Johan in a kiang ah, “Sinsakpa, kuahiam na min a dawite delhkhia ka mu ua; a hon zuih louh ziak in ka kham uh” a chi hi.

³⁹Jesu’n “Kham nawn kei un; kuamah ka min a thil thupi hih kei hon gense pah thei a omkei hi.

⁴⁰Kuapeuh ei hon dou lou i lam a pang ahi.

⁴¹Kuapeuh Khrist mi na hih ziak ua tui nou khat dawn ding honpia, chihtaktak in k’on hilh ahi, a kipahman a tan kei hial ding hi.

⁴²“Huan kuapeuh hon gingta neu chikte lak a khat leng hihpuk, a ngawng ah buhgawizanna suang lianpi oksak in tuipi ah khele uh, amah ading in a hoihzaw ding hi.

⁴³Huan na khut in a hon hihpuk leh, tankhia in; melhem a hinna a lut nang ding in a hoihzaw, khut nih nei a gawtmun mei mittheilou a pai sang in,

⁴⁴A than uh a sih louh a, meikuang mihlouhna ah.

⁴⁵Na khe in a hon hihpuk leh, tankhia in, khe nih nei a gawtmun a paih a om sang in, khebai a hinna a lut nang ading in a hoihzaw hi.

⁴⁶A than uh a sih louh a, meikuang a mihlouhna ah

⁴⁷Huan na mit in a hon hihpuk leh, khelkhia in; mit lang nih nei a gawtmun a paih a om sang in mit langkhat nei a Pathian gam a lut nang ading in a hoihzaw hi.

⁴⁸A than uh sih ngeilouhna leh mei mih ngeilouhna ah.

⁴⁹“Michih mei a soh al in a om ding uhi.

⁵⁰Chi a hoih hi; himahleh, chi a pen khit leh bang in na hih al nawn ding ua? Noumau ngei ah chi nei unla, khat leh khat kilem in om un” a chi hi.