Read Paite Chin LUKE 11 Bible Online

LUKE 11 - Paite Chin bible

LUKE 11

¹Hichi ahi a, Jesu koilai mun hiam ah a thum a, a thum khit in a nungzui mi khat in a kiang ah, Toupa, Johan in a nungzuite thum dan a hilh bang in hon hilhsam in, a chi hi.

²Huan aman a kiang uah, “Na thum chiang un hichibang in na chi ding uh, a chi hi: “Ka Pa uh, van a om, na min kizahtak hen, Na gam hongtung hen.

³Niteng in ka nekkhop uh an honpia in.

⁴Ka khelhnate uh hon ngaidam in, Kou leng kuapeuh bat hon neite ka ngaidam uhi; Khemna ah hon pilut ken. Gilou lak ah hon huzaw in”

⁵Huan a kiang uah, “Na lak ua kuahiam in lawm nei henla, zanlai in a kiang a hoh in, ‘Lawm, tanghou phel thum hon leitawi sak ve.

⁶Ka lawm zin in a hon tawn a, a ma a lui ding bangmah ka neikei,’ chi henla;

⁷Aman inn sung apan in, ‘hon hihbuai ken; tun zaw kong khak ahi, ka tate leng ka kiang ah lupna ah a ihmuta uh; thou in ka hong pe theikei chi in, dawng leh k’on hilh ahi,’

⁸A lawm a hih ziak in thou in a va pekei na a, a nget ngutngut ziak in thou in a deih zahzah a vape ding hi.

⁹“Huchi in k’on hilh ahi, ‘Ngen un, piak na hi ding uh; zong un, na mu ding uh; kiu un, honsak in na om ding uhi.

¹⁰Kuapeuh a ngen in a mu a, kuapeuh a zong in a mu a, kuapeuh a kiu honsak in a om ding hi.’

¹¹Nou lak a pa pen, a ta in tanghou ngen leh kua ahia suang pe ding? Ahihleh ngasa ngen leh kuan ahia gul pe ding?

¹²Ahihkeileh, aktui ngen leh aikam a pedia hia?

¹³Huchi in nou migilou in bawn na tate thil hoih piak dan na theih uleh, na Pa uh van a om in a ngente Kha Siangthou pe natel in chia!” a chi hi.

¹⁴Huan Jesu’n dawi pautheilou khat a delhkhia hi. Hichi ahi a, dawi a pawttak in pautheilou a hong pauta; huchi in mipi’n lamdang a sa mahmah uhi.

¹⁵Himahleh a khen in, “Dawimang Beelzibul ziak in eive dawite a delhkhiak zel” a chi uhi.

¹⁶A khen in, amah ze-etna ding in, van a kipan chiamtehna a ngen uhi.

¹⁷Aman a ngaihtuah uh a thei a, a kiang uah, “Koi gam leng amah kidou peuh a mangthang a; inkuan khat leng amah kidou a mangthang hi.

¹⁸Setan leng amah a kidou leh a gam bangchi’n a dingkhe dia? Beelzibul ziak in dawite a delhkhia, n’on chi ua;

¹⁹Ken Beelzibul ziak a dawite delhkhia ka hihleh, na tate un kua ziak in ahia a delhkhiak uh? Huaiziak in amau noute hon vaihawmsak dingte ahi ding uh.

²⁰Himahleh ken Pathian khutzung ziak a dawite delhkhia ka hihleh Pathian gam na kiang uah a hong tungkhinta hi.

²¹Mi hat in hiamzat kim tawi a a inn a ven sungteng, a sum bittak in a om gige hi;

²²Himahleh amah sang a hatzaw in a hongsual a, a zoh chiang in, a muan a galvan kim a sut a, sum a laksak a hawmzak zel hi.

²³Kuapeuh ka lam a panglou tuh hondou ahi a, kuapeuh honlak khawm pihlou in a hihzak hi.

²⁴“Dawinin mi sung a kipan a pawt in, khawlna zong in tui omlouhna mun peuh ah a vakvak hi. Huan, khawlna himhim a mu kei a, ka pawtna inn ah ka kiknawn mai ding, a chi hi.

²⁵A va tun in phiatsiang leh zephoih in a mu hi.

²⁶Huaitak in a vapai a, amah sang a gilou zaw dawi dang sagih a honpi a, huai mi sung ah a lut ua, a teng uhi; huai mihing omdan nanung amasa sang in a hoih keizaw tham hi” a chi hi.

²⁷Huan hichi ahi a, huai thute a genlai in, mipi lak ah numei khat a kikoukhia a, a kiang ah, “Nang honpai gil a hampha e, na nawitep toh” a chi hi.

²⁸Aman bel, “Pathian thu za a zuite mi hampha ahizaw uh” a chi hi.

²⁹Huan mipite a kiang a a hong kikhop lai un, Jesu’n, “Hiai khang giloute ahi uh; chiamtehna a zong ua; himahleh Jonah chiamtehna chih louh a kiang uah chiamtehna piak ahi kei ding.

³⁰Jonah Ninevi khua a mite adia chiamtehna a hih bang in, Mihing Tapa leng tulai khangte chiamtehna a honghi ding hi.

³¹Thukhenni chiang in, Simlam kumpinu tulai khangte kiang ah ading dia, siamlouh a tangsak ding; Solomon pilna ngaikhe ding in kawlmong a kipan a hong ngal a; ngai un, Solomon sang a thupizaw hiai ah a om hi.

³²Thukhenni chiang in, Ninevi khua mite tulai khangte kiang ah ading ding ua, siamlouh a tangsak ding uh, Jonah thuhilh ziak in a kisik ngal ua; ngai un, Jonah sang a thupizaw hiai ah a om hi.

³³“Kuamah in khawnvak a det un inn nuaitawng ah a koih ngeikei uh, lawh nuai ah leng a koih ngei sam kei uh, a lut mite’n vak a muh theihna ding un a koihna ah a koih zel uhi.

³⁴Na sapum khawnvak na mit ahi; na mit a chim leh na sapum leng avek in a vaksuak nak hi; a chim kei leh bel na sapum a mial vek nak hi.

³⁵Huchi in na sung a vak om mial a na hi kha ding e, pilvang in.

³⁶Huchi in na sapum koilai peuh miallou a avek a a vakkhiak leh, khawnvak vak petpet in a tatvak bang in a vakkhe vek ding” a chi hi.

³⁷Huan a genlai in Pharisai khat in amah kiang a an ne ding in a chial a; huchi in, a lut a an a ne hi.

³⁸Pharisai in a an um a muh in, annek ma a khut a sillouh lamdang a sa mahmah hi.

³⁹Toupa’n a kiang ah, “Nou Pharisaite’n nou leh kuang pawlam na silsiang ngeitak ua; na sung lam ulah lepgukna leh gilou in a dim hi.

⁴⁰Mihaite aw, pawlam bawlpa’n sunglam leng a bawl ka hia?

⁴¹Himahleh na neihte uh mi genthei kiang a thil thawnpiak ding in zangun; huchi in ngai un, nou adin bangkim a siangvek hi.

⁴²“Nou Pharisaite aw, na tung uh a gik e: pudina, pardi leh anteh louhing teng sawm a khat na pia ua, diktatna leh Pathian itna na limsak kei uhi; himahleh huaite eive na hih ding uh, a dangte hihlou tuanlou in.

⁴³Nou Pharisaite aw, na tung uh a gik e: kikhopnain ah tutphah hoihpente leh dawlmun a chibai bukte na ngaisang uh.

⁴⁴Laigelhmite leh Pharisai lepchiahte, na tung uh a gik hi: han chiamteh louh, a tung a theilou a mi a paizelna bang, na hi uh” a chi hi.

⁴⁵Huan dantheimi khat in, a kiang ah, “Sinsakpa, hiai thu na gen kou leng hontai na hi” a chi a, a dawng hi.

⁴⁶Huan aman “Dantheimite aw, nou leng na tung uh a gik: Puakgik, puak haksa pipi mite na suan ua, nou lah huai puakgikte na khutzung khat un leng na khoih ngeikei uhi.

⁴⁷Na tung uh a gik: na pipute uh thahsa zawlneite han inn na lam ngal ua.

⁴⁸Huchi in na pipute uh thilhihte na theihpih un na hoihsakpih uh ahi; amau a that ua, nou a han innte na lam uhi.

⁴⁹Huaiziak in ‘Pathian pilna in leng, a kiang uah zawlneite leh sawltakte ka sawl dia, a khen a that ding ua, a khen a sawi ding uh a chi hi;’

⁵⁰Zawlnei tengteng sisan, leitung piantung a kipan a kisuah, tulai khangte tung ah phu a laktheih ding in a chi hi;

⁵¹Abel sisan suah a kipan, Zakariah, maitam leh biakin kikal a sisan suah tan in; ahi, k’on hilh ahi, tulai khangte tung ah phu a kila ding.

⁵²Nou dantheite aw, na tung uh a gik e: theihna tabi na paimangpih ua; nou lah na lut ngalkei ua, mi a lut dingte na dal uhi” a chi hi.

⁵³Huai a kipan a pawtin, laigelhmite leh Pharisaite’n amah a tawng ua, thu chiteng gensak teitei tum in leh,

⁵⁴A pau khelh zenzen leh mat tum in a tang gige uhi.