Read Paite Chin LUKE 12 Bible Online

LUKE 12 - Paite Chin bible

LUKE 12

¹Huchihlai a mipi sang tampi kiphu muimui zou hial a hong kikhop un, Jesu’n a masapen in a nungzuite kiang ah, “Pharisaite silngou, lepchiahna lak ah pilvang un,

²Langlou ding a selguk bangmah a omkei a; theihlouh ding a im leng bangmah a omsam kei hi.

³Huaiziak in mial a na gen peuh uh vak a zak in a om ding; dantan sunggil a bilbul a na thugen uh intung vum a tangkoupih in a om ding hi.

⁴“Huan ka lawmte aw, k’on hilh ahi, sapum that a, huai nung a bangmah dang hih nawn theiloute zaw, kihta kei un,

⁵Himahleh kua ahia na lauh ding uh k’on hilhkhol ahi; a hihlup nung a leng Gehenna a paihtheihna thuneipa lau un.

⁶Kawlgit nga dal dangka nih in a zuaksek kei ua hia? Himahleh a lak ua khat leng Pathian in a mangngilh ngeikei hi.

⁷Na luzang ua samzangte nangawn leng simvek ahi uh. Lau kei un; kawlgit tampi sang in na manpha zaw uhi.

⁸“Huan k’on hilh ahi, mite ma a hon gum peuhmah Pathian angelte ma ah Mihing Tapa in a gum sam ding hi.

⁹Himahleh mite ma a hon kitheihmohbawl peuhmah Pathian angelte ma ah ka kitheihmohbawl sam ding hi.

¹⁰Mihing Tapa kalh a thugen peuhmah a genkalhna ngaihdam sak ahi ding a; himahleh Kha Siangthou hilhial gensia zaw a gensiatna ngaihdam sak ahi kei ding hi.

¹¹Kikhopnain a mite, vaihawmte, heutute ma a a honpi hun chiang un, bangchi in, bang thu in ka dawng dia, bang thu ka gen dia chi in lungkham kei un.

¹²Huai huntak in, bang ahia na gen ding uh, Kha Siangthou in a honhilh ding hi” a chi hi.

¹³Mipi lak a khat in Jesu kiang ah, “Sinsakpa, ka u kiang ah gou hon hawmsam ding in hilh in” a chi hi.

¹⁴Himahleh aman a kiang ah, “Mihing, noumau tung ah kuan ahia kei thukhenpa hiam tanseppa hiam a honbawl? a chi hi.

¹⁵A kiang uah, “Pilvang unla, enna lak ah kiveng un; hauhna mihing damsan ahi kei hi” a chi hi.

¹⁶Huan a kiang uah gentehna thu a gen a, “Mi hau kuahiam a hong pung mahmah hi.

¹⁷Huchi in a kingaihtuah a, bangchibang in ka hih diam aw? Ka buh leh bal koihkhawmna ding ka neikei hi.

¹⁸Hichibang in ka hih ding e; ‘ka buhinte ka phel ding a, a sang a lianzaw in ka lam dia, huai ah buh leh ka van tengteng ka koih khawm ding.’

¹⁹Huan ka kha kiang ah, ‘Kha aw, kum tampi sung daih ding tampi na kholta; khawl inla, ne in dawn inla, nuamtak in om in, ka chi ding,’ a chi hi.

²⁰Himahleh, Pathian in a kiang ah, ‘Nang mihai, tu zan chiah na kha a hon laksak ding uh, huai na lamkhiakte, kua a ahi ta dia?’

²¹Amau ading a gou khola, Pathian lam a haulou huchi ahi uh” a chi hi.

²²Huan a nungzuite kiang ah, “Huaiziak in k’on hilh ahi, bang ka ne diam aw? chi in, na hinna thu uh leh, bang silh in ka teng diam aw? chi in, na sapum thu uh lunghimawh kei un.

²³Nekding sang in hinna a thupizaw hi, puansilh sang in leng sapum a thupizaw hi.

²⁴Va-akte ngaihtuah dih uh, buh a tuh kei ua, a at sam kei uh; buhpang leh buhin leng a neikei uh; himahleh Pathian in amau a vak hi; noute vasate sang a manpha zaw na hi uhi.

²⁵Huan nou lak ah lunghimawh ziak a kua in ahia amah dunglam tong khat a hihsang thei tuan?

²⁶Hiai lel leng hih theiloute’n bangdia thil dang lunghimawh nak na hi ua?

²⁷Lilite khandan ngaihtuah dih uh; na a semkei ua, khau leng a khek kei uh; himahleh k’on hilh ahi, Solomon hilhial leng a thupina tengteng a a kizep in, hiai lilite lak a khat bang a zep in a omkei hi.

²⁸Huchi in gamlak loupa tuni a hing a, a zing a thuk a khul nawn mai ding bawn Pathian in hichitel a a zep leh, aw, nou mi gintawmte, huaite sang in puansilh honpe zaw natel in chia!

²⁹Huan na nekding uh, na dawn ding uh, zong kei un; ginglel in leng omsam kei un.

³⁰Khovel a namte’n huai thil tengteng a zong uh; huai bang na kiphamoh uh chih na Pa un a theigige hi.

³¹Himahleh Pathian kumpi gam zong zaw un, huchi in huai thilte leng a honpiak behlap ding hi.

³²“Pawltawmte aw, lau kei un; nou kiang a gam piak ding na Pa uh kipahlam tak ahi.

³³Na neih peuh uh zuak unla, mi gentheite kiang ah pia un; van ah guta naih phaklouhna ah, leikha neksiat louhna ah, dangka ip lui theiloute, gou bei theiloute kibawl un.

³⁴Na gou omna peuh ua na lungtang uh leng a om ding ziak in.

³⁵“Na kawng uh gak unla, na khawnvak uh leng diam sa in om un.

³⁶Min a pu uh kitenna Ankuangluina a kipan a a hongpai chiang a, kongkhak a hon kiuhtaka, hon theipah ding a a ngak nilouh bang in, om un.

³⁷A pu uh a hongpai chiang in sikha na ngak nilouh a a muhte a hampha uhi; chihtaktak in k’on hilh ahi, aman a kawng a gak dia, amau an um ding in a tusak ding a, a na uh a sepsak ding hi.

³⁸Zanlai in hiam, thoh hun in hiam a hong a, huchibang a a honmuh, huai sikhate a hampha uhi.

³⁹“Himahleh, hiai thei un, guta a hongpai ding inn neipa’n thei leh, a veng dia, a inn a phenvang sakkei ding hi.

⁴⁰Nou leng mansa in om un, na gintak louh dak un Mihing Tapa a hongpai ding hi” a chi hi.

⁴¹Huan Peter in “Toupa, hiai gentehna koumau kia hia n’on hilh, mi tengteng?” a chi hi.

⁴²Toupa’n “Sumkempa ginom, piltak, a pu in a hunteng a a tan ding uh hawmsak ding a a inkuanpihte tung a heutu a a bawl ding kuapen ahi dia le?”

⁴³A pu a hongpai chiang in sikha huchibanga hih a hon muhding pa a hampha hi.

⁴⁴Diktakin k’on hilh ahi, a neih tengteng tung a heutu ding in a bawl ding hi.

⁴⁵Himahleh huai sikha in a lungtang in, ‘ka pu a hongzok kei ding e, chi in, a sikhanu, a sikhapa, na vaw ta leh, ne in dawn in na kham leh;

⁴⁶Huai sikha pu, a ginlouh ni’n, a theihlouh lai in, a hong ding a, tum nih a honsuah ding a, mi ginomloute tan bang a tangsak ding hi.’

⁴⁷Sikha a pu deihlam theigige na pi a na kiging tuanlou a, a pu deihlama gamta loupa’n nakpitak a vuak a tuak ding hi.

⁴⁸Himahleh theiloupia vuakna tham a gamtapa’n awlchika vuak a tuak ding. Tampi piak a ommi kiang ah tampi phutin a om ding a; tampi kepsakpa kiang ah a tamsem a phut ding uhi.

⁴⁹“Khovel a mei khesuk ding a hongpai ka hi; tuin leng kangpah leh china tel ing e!

⁵⁰Himahleh baptisma tan ding ka nei, huai hih tangtun mateng ka om nuamlou hina mahmah e:

⁵¹Khovel a lem lengsak ding a hongpai hiam honsa na hi umaw? Hidek lou, k’on hilh ahi, kidou lengsak ding a hongpai ka hi zaw.

⁵²Tunung chiang in inkuan khat ah mi nga a kidou ding uh, thum in nih, nih in thum.

⁵³A kidou ding ua, pa in a tapa, a tapa in a pa; a nu in a tanu, a tanu in a nu; a pi in a mou, a mou in a pi, a chi hi.

⁵⁴Huan mipi kiang ah leng, “Tumlam a meikai na muh uleh, ‘vuah a zu ding na chi pah ua; huan a hongzu ngei zel hi.’

⁵⁵Sim huihnung na muh chiang un, ‘khua a lum ding, na chi ua, a hong lum hi.’

⁵⁶Nou lepchiahte aw, khovel leh van omdan leng na genchian thei ngal ua, bang a chia tu hun theichian siamlou na hi ua?

⁵⁷“Bang a chia noumau in thudik kikhen lou na hi ua?

⁵⁸Honhekpa toh thukhenpa kiang na zotlai un, lampi ah kilep theihna khat zawng teitei in; huchilou in zaw thukhenpa mai ah hon kailut ding a, thukhenpa’n miman heutu a hon mansak ding a. Miman heutupa’n suangkulh ah a honkhum kha ding hi.

⁵⁹K’on hilh ahi, paihsa san khat nangawn na piakkim masiah, huai a kipan na pawtkei hial ding” a chi hi.