Read Paite Chin LUKE 13 Bible Online

LUKE 13 - Paite Chin bible

LUKE 13

¹Huailai in, kuate hiam a om ua, huaite’n Galili mite Pilat in a sisan uh Pathian biakna sagohte lak a a helsakte tungtang Jesu a hilh uhi.

²Huan aman a kiang uah, “Huai Galili mite huchibang thil a thuak ziak un Galili mi tengteng sang in migilou tuan hi un na gingta ua hia?

³Hilou e, k’on hilh ahi, nou leng na kisik kei uleh huchi mah bang in na mangthang vek ding uhi.

⁴Huan Siloam insang in mi sawmlehgiat a delhlupte leng Jerusalem khua a om tengteng sang in migilou zaw hi un na gingta ua hia?

⁵Hilou e, k’on hilh ahi, nou leng na kisik kei uleh huchibang mah in na mangthang vek ding uh” a chi a, a dawng hi.

⁶Huan hiai gentehna a gen a: “Kuahiam in a grephuan ah theipi kung khat a suan hi. Huan a kung ah gah a hong zong a khat leng a mu kei hi.

⁷Huchi in grepgui kemmi kiang ah, ‘Ngai in, kum thum sung hiai thei kung ah a gah ka va zong zel a, khat leng ka mu kei; phuk in; bangdia mun dal a om nilouh ahia?’ a chi hi.

⁸Aman a kiang ah ’Toupa, tukum bek om henla, a kimvel in ka tou ding a, ek in ka phungvuh lai dia;

⁹Huchi a a gah leh a hoih ding, a gah keileh phuk mai in,’ ” a chi hi.

¹⁰Huan khawlni’n aman kikhopnain khat ah thu a hilh hi.

¹¹Ngai in, kum sawmlehgiat hatlouhna nei dawimat numei khat a om hi; huai mi a kun kheukheu a, amah thu in ading tang theikei hi.

¹²Jesu’n amah a muhtak in a sam a, a kiang ah, “Numei, na hatlouhna in a honkhahta” a chi hi.

¹³Huan a tung ah a khut a koih a; thakhat in a tang paha, Pathian a phatta hi.

¹⁴Jesu’n khawlni a mi a hihdam ziak in kikhopnain heutu a heh a, mipi a houpih a, a kiang uah, “Mihing nasepna ding ni guk a om vo oi; huai sung in kihihdam un, khawlni’n hilou in” a chi hi.

¹⁵Toupa’n a kiang ah “Nou lepchiahte aw, khawlni’n na bawng uh hiam na sabiltung uh hiam a annekna a kipan phel in, tui dawn ding in na pikhe chiat zel uh hilou hia?

¹⁶Hiai numei, Abraham tanu ahi ngal a, ngai un, Setan in kum sawmlehgiat a man a, Khawlni’n leng hiai gak phelsaklouh dan ahi ahia?” a chi a, a dong hi.

¹⁷Huai thute a genlai in a melma tengteng a zum ua; mipi bel a thil thupi hih tengteng ziak in a kipak uhi.

¹⁸Huchi in aman “Pathian gam bang ahia? Bang toh ka teh dia?

¹⁹Ankam chi tangkhat min a lak a, huan a a theh bang ahi, huai a hongpou a, sing a honghi a, tungleng vasate a hiangte ah a giak uh,” a chi hi.

²⁰Huan “Pathian gam bang toh ka teh dia? a chi nawn a.

²¹Silngou numei in a lak a, anbuang tehna thum lak a avek a a thoh mateng a phum bang ahi” a chi hi.

²²Huan aman thuhilh kawm zel in, Jerusalem kholam naih in kholian leh khoneute a tawn zel hi.

²³Kuahiam in a kiang ah, “Hotdamte tawmchik ahi ding u maw? a chi hi.

²⁴Huan aman a kiang uah, kong kawchik ah lut tum teitei un; k’on hilh ahi, mi tampi in lut a tum ding ua, a lut theikei ding uhi.

²⁵inn neipa a thoh a, kong a khaknungin, nou a pua ading in, Toupa, kong hon hon in, chi in kongkhak n’on kiuh chiang un, aman koilam mi na hi ua, hon theilou ka hi’ chi in, nou a hon dawng ding hi.

²⁶Huai hun chiang in, nou, na muh in ka ne ua, ka dawn ve ua oi, ka kongzing uah leng thu na hilh zel vaw oi, na chi ding uh.

²⁷Aman, k’on hilh ahi, koilam mi na hi ua, k’on thei ngeikei; nou thil gilou hihte aw, ka kiang apan paimang vek un, a honchi ding hi.

²⁸Abraham, Isak, Jakob leh zawlnei tengteng Pathian gamsung a om na muh ua, nou pawlam a delhkhiak na hih uh na kitheih chiang un, na kap ding ua, ha na gawi ding uhi.

²⁹Huan suahlam, tumlam, simlam leh mallam a kipan mite hongpai ding ua, Pathian gam ah ne in a dawn ding uhi.

³⁰Huan ngai un, nanungpente leng masapen a om ding ua, masapente leng nanungpen a om ding a om uh” a chi hi.

³¹Huaitak in Pharisai kuate hiam a hongpai ua, a kiang ah, “Pawt inla, hiai a kipan paimang in: Herod in a honthat ding” a chi uhi.

³²Huan aman a kiang uah, “Huai sehal kiang ah hiai thu vagen un: ‘Ngai in, tuni toh, zingchiang toh dawite ka delhkhe dia, natnate leng ka hihdam dia a ni thum ni’n ka zou ding.

³³Abang abang hitaleh tuni toh, zingchiang toh, a ni thumni toh ka pai zel ding hi; Jerusalem khaw pawlam ah zawlnei sih theih hilou ahi’.

³⁴Aw Jerusalem, Jerusalem: zawlneite that, na kiang a honsawlte uh suang a na denglum: akpi in a noute a khanuai a a opkhum bang in na tate bangzah vei opkhum ka tuma? Himahleh na ut kei uhi.

³⁵En in, na inn a vuak a taisan in a omta hi. Ka hon hilh ahi, ’Toupa min a hongpai a hampha, na chih masiah n’on mu kei ding’ ” a chi hi.