Read Paite Chin LUKE 14 Bible Online

LUKE 14 - Paite Chin bible

LUKE 14

¹Huan hichi ahi a, khawlni’n Pharisai vaihawmmi khat inn a an ne ding a a hoh in a na enkhia uhi.

²Huan ngai in a ma ah damlou chibawk kuahiam a om hi.

³Huchi in Jesu’n dantheimi leh Pharisaite a houpih a, a kiang uah, “Khawlni’n hihdam a siang hia, siang lou?” a chi hi.

⁴Amau a daidide uhi. Aman damlou a long a, hihdam in a paisakta hi.

⁵Huan a kiang uah, “Na lak uah sabiltung hiam bawngtal hiam nei unla, khawlni’n tuikul sung ah ke leh kua ahia kaikhe pah lou ding?” a chi hi.

⁶Huai thu a dawng theikei uhi.

⁷Huan a mi sapte un tutna mun hoihpen a telzel uh a mu a, a kiang uah gentehna a genta hi:

⁸“Kitenna an ne ding a kuapeuh in a honsap chiang in tutnamun hoihpen ah tu kei un; huchilou in zaw noute sang a mi zahtakhuai zaw a na sam kha dia, huchi in a hon sampan,

⁹‘Hiai mi tutna ding awn in,’ a honchi dia; huan nang zumpi in tutnamun niampen ah na tu nawn phing ding hi.

¹⁰A honsap chiang in tutnamun niampen ah na vatu zaw ding a; huchi in a hon sampa a hong chiang in, na kiang ah, ‘Lawm, tutnamun hoihdeuh ah tuin, a hon chithei ding.’ Huchi in na an umpihte mitmuh in pahtawi in na om ding hi.

¹¹Kingaisang peuhmah a neu ding a: kingaineu pahtawi a om ding a hih ziak in” a chi hi.

¹²Huan a sampa kiang ah leng, “Sun an hiam nitakan hiam a Ankuang na lui chiang in, na lawmte, na unaute, na sanggamte, na inveng mihaute na sam kei ding hi; huchilou in zaw a hon samthuk ding ua, a hon thuk chitchiat kha ding uhi.

¹³Ankuang na luichiang in, tagahte, piangsualte, khebaite, mittawte, na sam zaw ding hi;

¹⁴Huchi in huai ten thukna ding a neih louh ziak un, na hampha ding; midikte thohnawn chiang in thuknawn na hih ding ziak in” a chi hi.

¹⁵Huan a an umpih kuahiam in huai thu a za a, a kiang ah, “Pathian gam a an ne ding a hampha hi” a chi hi.

¹⁶Huan aman a kiang ah, “Mi kuahiam in nitakin Ankuang thupi a lui a, mi tampi a sam hi;

¹⁷Annek hun in, a misapte kiang ah, ‘hong paita un, bangkim a manta,’ chi ding in a sikha khat a sawl hi.

¹⁸Huan avek un thukhatsat in paulam a neichiat uhi. A masapen in, a kiang ah, lou ka leita a, a en dia ka hoh kiphamoh hi; hon hehpih inla, hon ngaisiam hen, a chi hi.

¹⁹Midang in bawngtal tuaknga ka leita a, a siat a phat chian ding in ka kuan ding a, hon hehpih inla hon na ngaisiam hen, a chi hi.

²⁰Huan midang in, zi ka neita a, huaiziak in ka hoh theikei, a chi hi.

²¹Huan sikha in a pu kiang ah, huai thute a vahilh hi. Huan inn neipa a heh a, a sikha kiang ah, ‘kintak in pawt inla, kongzing leh kawmkal ah pai mengmeng inla, tagahte, piangsualte, mittawte, khebaite hiai lai ah hon pilut in,’ a chi hi.

²²Huan a sikha in, Pu, n’on thupiak bang in ka hihkhin a, himahleh mun awnglai lai ve aw, a chi hi.

²³A pu in, sikha kiang ah, ‘Pawt inla, lamlian leh daikil kal ah pai inla, ka inn dimna ding in mi hon sawllut teitei in a chi hi.’

²⁴K’on hilh ahi, ka misapte khat in leng ka Ankuang lui a chiam kei hial ding” a chi hi.

²⁵Huan mipi thupitakte a kiang ah a hohsam ua; huchi in amah a kihei a, a kiang uah,

²⁶“Kuapeuh ka kiang a hongpai in, a pa, a nu, a zi, a tate, a unau a sanggamnu, leh amah hinna nangawn huat kei leh ka nungzui ahi theikei ding.

²⁷Kuapeuh a Kros pua a hon zuilou ka nungzui ahi theikei ding.

²⁸Nou lak a kuapeuh in insang lam tum le uchin, amasa in tuin, lam zohna khop sum na neih uleh neih louh thei ding in, aman ding dan kua ahia sut lou ding?

²⁹Huchilou in zaw, suangphum khin phot a, a lamzoh theihkei leh, a en peuh in,

³⁰‘Hiai min gel napi in a zou thei ngalkei chi in, a nuihsan ding uh.’

³¹Huan kumpipa kuan ahia kumpipa dang dou ding a a kuan ding in, amasa a tu a, mi sing nih toh amah dou ding a hong, mi sing khat toh a tuah ngam ding leh ding louh, mi dong lou ding?

³²Huchi ahihkei vanglak leh, kumpipa dang gamlapi a a omlai in, kituahna lam thuchiam ngen ding in palai a sawl ding hi.

³³Huchibang in, nou lak ah kuapeuh a neih tengteng paisanlou ka nungzui ahi theikei ding hi.

³⁴“Chi a hoih a, himahleh chi a pen khit in, bang in a hih al nawn ding a?

³⁵Lei ading in a hoihkei; ekvum ding in leng a hoih sam kei; min a paikhia uhi. Kuapeuh zakna ding a bilnei in za hen” a chi hi.