Read Paite Chin LUKE 15 Bible Online

LUKE 15 - Paite Chin bible

LUKE 15

¹Huan siahkhawnmite leh mikhialte tengteng in a thu za ding in a kiang a honzuan uhi.

²Pharisaite leh laigelhmite’n, “Hiai mi’n mikhialte a khawl a, a kiang uah an a ne chi in, a phun tuaktuak uhi.”

³Huchi in aman a kiang uah hiai gentehna a gen hi:

⁴“Nou lak ah kuapeuh in belam za khat nei henla, a lak ua khat mangsak leh gamdai ah sawmkua leh kuate nusia in, a mang pen a muhnawn masiah kua ahia zong lou ding?

⁵Huan a muhnawn un kipaktak in a liangzang ah a pua hi.

⁶Inn a tuntak un, a lawmte leh a vengte uh a samkhawm ua, a kiang uah, ‘hon kipahpih un, ka belam mang ka munawnta,’ a chi hi.

⁷K’on hilh ahi, huchi mah bang in, midik sawmkua leh kua kisik tuan ding neiloute sang in mikhial khat kisik tung ah van a mi a kipak zaw ding uhi.

⁸Huan numei kuapeuh in makhai sawm nei in khat mangsak leh, khawnvak de in, inn phiat in a muhnawn masiah kua ahia hoihtak a zong lou ding?

⁹Huan a muhnawn in, a lawmte leh a vengte a samkhawm a, hon kipahpih un, ka makhai mansak ka mu nawnta, a chi hi.

¹⁰K’on hilh ahi, huchi mah bang in, Pathian angelte ma ah, mikhial khat kisik tung ah, kipahna a om nak hi” a chi hi.

¹¹“Mi kuahiam in tapa nih a nei hi:

¹²A naupangzaw pen in, a pa kiang ah, Pa, gou ka tansik honpia in, a chi hi. Huchi in, a sum a kiang uah a hawmta hi.

¹³Huan ni sawtlou nung in a tapa naupangzaw pen in a tansik tengteng a lakhawm vek a, gam gamlapi ah a zinta hi, huai ah nuamtat lua in a sum a mawkzat mangta hi.

¹⁴Huan a zatbei zohvek tak in, huai gam ah kial thupitak a hongtung a; nekding a hong tasamta hi.

¹⁵Huchi in huai gam mi khat a vabel a; aman vokan pe ding in a lou ah a sawl hi.

¹⁶Huan thil hawng vok in a nekte ua kihihvah a ut mahmah a; kuamah in bangmah a pe ngalkei uhi.

¹⁷Huan amah leh amah hong kiphawkkhiak tak in, ka pa kiang a kilohte annek senglouh a tamtam toh, kei lah hiai ah gilkial a si ding himai veng in;

¹⁸Ka thou ding a, ka pa kiang ah ka pai ding a, a kiang ah, “Pa, van a tung ah leh nangmah mitmuh in thil ka hihkhial; na tapa a sehtak ka hita kei hi;

¹⁹Na kiang a kiloh khat bang in honbawl in ka chi ding” a chi hi.

²⁰Huchi in a thou a, a pa kiang ah a paita hi. Huan gamlapi a a omlai in, apan a mu a, a lainat mahmah a, a tai a, a vapoma a tawp tonton hi.

²¹A tapa in a kiang ah, ‘Pa, van a tung ah leh nangmah mitmuh in thil ka hihkhial; na tapa a sehtak ka hita kei’ a chi hi.

²²Himahleh apan a sikhate kiang ah, ‘puan hoihpen hon lakhe pah unla, silhsakun; a khut ah zungbuh a khepek ah khedap bunsakun;

²³Bawngnou thautak honla unla; gou un, i ne ding ua, nopbawl in i om ding uh;

²⁴Hiai ka tapa a si a, a hong hing nawnta hi; a mang a, i mu nawnta uhi,’ a chi hi. Huchi in kipaktak in a om panta uhi.

²⁵“Huan a tapa upazaw lou ah a om hi; inn a hong tunkuan in bangpeuh tum ging leh lam husa a zata hi.

²⁶Huchi in a sikha khat a sam a, tua bang ahia? chi in, a dong hi.

²⁷Huan aman a kiang ah, ‘na nau a hongtung a, damtak a a muhnawn ziak in na pa’n bawngnou thautak a gou,’ a chi hi.

²⁸Amah a heh a, a lut nuam kei hi; huchi in, a pa hong pawtkhia a, amah a hongsam hi.

²⁹Himahleh aman a pa kiang ah, ‘ngai in, kum hiai zah na nna sem ing a, na thu a talek ngeilou ing a; ka lawmte toh kipahna ka bawlna ding in kelnou leng n’on pe ngeikei hi.

³⁰Himahleh hiai na tapa kizuakte kiang a na sum nemang vekpa a hong tuntakin amah ading in bawngnou thautak na goh a,’ chi in a dawng hi.

³¹Huan aman a kiang ah, ‘Ka tapa, ka kiang a om gige hi chin a, ka neih tengteng nang a ahi.’

³²Kipak leh nuamtak a om ding ahi; hiai na nau a si a; a hong hing nawn a; a mang a, i mu nawnta ahi” a chi hi.