Read Paite Chin LUKE 19 Bible Online

LUKE 19 - Paite Chin bible

LUKE 19

¹Jeriko khua ah Jesu a lut a, paisuak din a kisa hi.

²Ngai in, mi khat a min Zakai a om a; huai mi tuh siahkhon heutu ahi a, amah leng a hau ngial hi.

³Jesu mi bangchi banghiam muh a tuma; amah lah a niam ngal a, mipi ziak in a mu theikei hi.

⁴Huchi in a matai a, a en ding in theipi kung ah a kal a ; huai lampi a hontot ding ahi ngal a.

⁵Jesu huai mun a tun in a dak a, a kiang ah, “Zakai, hongkum meng in; tuni’n na inn a tung ding ka hi” a chi hi.

⁶Huan kintak in a kuma, kipaktak in amah a zintunta hi.

⁷Huai a muhtak un avek un, “Mikhialte kiang a tung ding in a lutta ve” chi in, a phun uhi.

⁸Zakai ading a, Toupa kiang ah, “Ngai in, Toupa, ka sum kimkhat tagahte kiang ah kape ding a; kua lak ah leng thil bangpeuh na negu taleng, a lehli in ka din ding” a chi hi.

⁹Jesu’n a kiang ah, “Tuni’n hiai inn ah hotdamna a hongtungta, amah leng Abraham tapa ahi ngal a.

¹⁰Mangthangte zong a hondam ding in Mihing Tapa a hongpai ahi him hi” a chi hi.

¹¹Huan huai thute a ngaihkhiaklai un, Jerusalem khua a naihtak ziak leh Pathian gam hong langpah ding hi a a gin ziak un gentehna a gen hi.

¹²Huchi in hiai thu a gen hi. “Mi hoih kuahiam gamukna thu la a hong kiknawn ding in khaw gamla tak ah a hoh hi.

¹³A hoh ding in a sikhate sawm a sam a, a kiang uah dangka sawm a pia a, ka hongtun nawn masiah hiai in sum na sin un, a chi hi.

¹⁴Himahleh a khuate’n a hua ua, hiai mi katung ua vaihawm ding in ka deihkei uh, chi in a nung ah thu a khak uhi.

¹⁵Huan hichi ahi a, gamukna thu a lak a, a hong kiknawn in a sikha sum a piakte, a hekpung dan uh theihna din a samsak hi.

¹⁶A masapen a hongpai a, ‘Toupa, na dangka sawm in a pung,’ a chi hi.

¹⁷Aman a kiang ah, ‘Sikha hoih, na hih hoih e; tawmchik tung a na ginom ziak in khaw sawm tung ah heutu in om in’ a chi hi.

¹⁸A nihna a hongpai a, ‘Toupa, na dangka nga in a pung e’ a chi hi.

¹⁹Amah kiang ah leng, ‘nang leng khaw nga tung ah heutu in om in,’ a chi hi.

²⁰Huan midang a hongpai a, Toupa en in, hiai na dangka, kho-ul nulna puan in ka kem kinken hi.

²¹Mi mawktat na hihziak in k’on lau hi; na koihlouh leng na la a, na tuh louh leng na at ngal a, a chi hi.

²²Huan aman a kiang ah, sikha gilou, na paukam suakngei in k’on siam louh ding. Mi mawktat ka hih a, ka koih louh leng ka lak a, ka tuh louh leng ka at na thei maw?

²³Huchi ahihleh bangdia ka dangka sum in a na koihlou? Huchi in ka hongpai in a pung toh ka lak ding ahi, a chi hi.

²⁴Huan a kiang a dingte kiang ah, ‘a sum laksak unla, dangka sawm neipa kiang ah pia un,’ a chi hi.

²⁵Amau a kiang ah, Toupa, aman sum sawm a nei a ka, a chi uhi.

²⁶K’on chi ahi, ‘a nei peuh piak behlap ahi ding a, a neilou a neihsun leng laksak ahi ding hi.

²⁷Himahleh hiai ka galte a tung ua vaihawm dia hon deihlou, honpi unla, ka ma ah that un’ ” a chi hi.

²⁸Hiai thu a gen khit in Jerusalem kholam naihtou in ma a kai hi.

²⁹Huan hichi ahi a, Bethphage leh Bethani khaw kiang, Olive tang kichi a tun in, nungzuite lak a mi nih a sawl hi.

³⁰“Na mazawn khua uah va hoh unla; huai ah na luttung un sabiltung nou kikhih, kuamah tuanna ngei nailouhna, na vamu ding ua, huai hon phel unla, honkai un.

³¹Huan kuapeuh in ‘bangdia phel?’ chi a a hondot uleh ‘Toupa’n a deih ahi,’ ” chi un, a chi hi.

³²Huan a misawlte a paita ua, a kiang ua a gen bang in a vamu uhi.

³³Sabiltung nou a phellai un, a neite’n a kiang uah, “Sabiltung nou bangdia phel?” a chi uhi.

³⁴Amau, “Toupa’n a deih ahi” a chi uhi.

³⁵Huchi in Jesu kiang ah a honkai ua; huan sabiltung nou tung ah a puante uh a phah ua, a tung ah Jesu a tuangsak uhi.

³⁶Huan a paina ding lampi ah a puante uh a phah uhi.

³⁷Huan a tunkuan in, Olive tang kumsukna ding tak ah, nungzui mipi tengteng in a thil thupi hih tengteng a muh ziak un a kipak ua, aw ngaihtak in Pathian a phat uhi;

³⁸“Toupa min a kumpipa hongpai a hampha e; van ah lem thu leng henla, tungnungpen ah thupina om hen” chi in.

³⁹Huan mipi lak a Pharisai khenkhat in a kiang ah, “Sinsakpa, na nungzuite tai in” a chi uhi.

⁴⁰Aman bel k’on hilh ahi, “Hiaite a daih uleh suangte bek a kikou ding uh” chi in, a dawng hi.

⁴¹Huan a tunkuan in, khua a mu a, a kahkhum a;

⁴²“Aw, nang tel in tusung in khamuanna thei leteh aw: himahleh tun zaw na muhlouhna ding in a kiselta ngal a.

⁴³Na galte’n na kim in leikulh a khoh ding ua, a hon um ding ua, na kim in pawt theihlouh in a hon opkhum ding ua, huchibang nite na tung ah a hongtung ding hi.

⁴⁴Na sung a na ta, na naute, nangmah toh lei ah a hon pai ek ding ua; na sung ah suang kichiang himhim a hawikei ding uh; veh a na om ni na theihlouh ziak in” chi in.

⁴⁵Huan Pathian biakin ah a valut a, bangpeuh zuakte a delhkhia a, a kiang uah,

⁴⁶“Ka inn thumna inn ahi ding, chih gelh ahi; nou bel suamhatte khuk in na bawlzaw uh” a chi hi.

⁴⁷Huan niteng in Pathian biakin ah thu a hilhzel hi. siampu liante, laigelhmite leh, vantang lak a heutu deuhte’n amah hihmang a tum uhi;

⁴⁸Himahleh mipi’n phatuamngaitak a a thugen a ngaihkhiak ziak un, a hih ding dan a thei tuankei uhi.