Read Paite Chin LUKE 21 Bible Online

LUKE 21 - Paite Chin bible

LUKE 21

¹Huan a dak khia a, mi haute’n sumkholna a sum a khiaklai uh a mu hi.

²Meithai zawngtak kuahiam in dal dangka muza nih hong khia leng a mu hi.

³Huchi in, “Chihtaktak in k’on hilh ahi, hiai tengteng sang in tua meithai zawngtakin a khe tamzaw;

⁴Hiai tengteng in a neihlet uh a khia ua; aman bel a kitunhingna ding a a neih sunsun a khevek” a chi hi.

⁵Huan kuate hiam in Pathian biakin thu, suang hoihtak leh thil piakkhawm a a zep kilawm dan uh, a genlai un, aman,

⁶“Hiai na thilmuh uh, hih chiplouh a suang kichiang himhim hiai ah a omkei ding; huaibang ni a hongtung ding” a chi hi.

⁷Huan amau a kiang ah, “Sinsakpa, huaite chikchiang in a hongom ding ua? Huaite a hongtun ding chiamtehna bang a om dia?” chi in, a dong uhi.

⁸Huan aman, “Pimang a na omlouhna ding un pilvang un. Mi tampi in, ‘Khrist ka hi’ a hun tungding ahita, chi in, keimah minsial in a hongpai ding uh, huaite zuikei un.’

⁹Kidou thu leh buai thu na zak hun chiang un lau kei un; huaite a tung masa ding a, tawpna bel hipahlou ding ahi” a chi hi.

¹⁰A kiang uah, “Nam tuam leh nam tuam a kidou ding ua, gam tuam leh gam tuam a kidou ding uh.

¹¹‘Zin nakpitak in a ling ding a, mun tuamtuam ah kial a ke ding a, hipi a leng lai ding; van a kipan thil lauhuai leh chiamtehna thupitak a hongom ding hi.’

¹²Himahleh huai thil tengteng a tunma in, nou a honman ding ua, kikhopnain leh suangkulh ah pi in a hon hihgim ding uh, keimah min ziak in kumpipate leh gamukte ma ah a honpi ding uhi.

¹³Hiai noute ading a theihpihna hun lemtang ahi ding hi.

¹⁴Huchi in dawnna ding ngaihtuah khawllou ding in na lungtang uah kihih kip un.

¹⁵Na melma tengteng un hondou ua honsel theihlouhna ding un kam leh pilna ka honpe ding a.

¹⁶Huan na nu leh na pate, na unaute, na sanggamte, na lawmte un leng hon mansak ding ua; a khen a honthat ding uhi.

¹⁷Keimah min ziak in mi tengteng huat na hi ding uh.

¹⁸Himahleh, na samzang uh khat leng a mangthang kei ding.

¹⁹Na kuhkalna uah na hinna uh na humbit ding uhi.

²⁰“Himahleh sepaihte’n Jerusalem khua a um uh na muh chiang un, a mangthang dek chih thei un.

²¹Huai hun chiang in Judia gam a omte’n tang ah taimang san u hen; asung a omte’n pawtsan u hen, gam a omte asung ah lut kei uhen.

²²Huai nite phulakna ahi, thu a gelh tengteng uh a hongtun theihna ding in.

²³Huai nite in gaite leh naunou pawmte tung a gik ding, khovel ah haksatna thupitak a tun ding ziak in leh hiai chite tung a thangpaihna a tun ding ziak in.

²⁴Huan namsau in a si ding ua, namchih kiang ah sal a pi in a om ding uh; huan Jentelte ni a tawp mateng Jerusalem Jentelte sikden in a om ding hi.

²⁵“Huan ni leh kha leh aksite ah, chiamtehna a om ding a; tuipi mau leh a kihoh ziak in lei ah leng namchih haksatna leh mangbatna a tung ding;

²⁶mite launa ziak leh khovel a thil hongtung ding ngaihtuah ziak in, a sibup ding uhi; van thilhihtheihnate a ling ding hi.

²⁷Huai hun chiang in Mihing Tapa thilhihtheihna leh thupina thupi toh meilak a hongpai a mu ding uhi.

²⁸Huan huai thilte a hong tunpat chiang in entou unla, dak khia un; na tatna uh hong naita ahihman in” a chi hi.

²⁹Huan a kiang uah gentehna thu a gen a: “Theipi kung leh sing tengteng en un;

³⁰A hong selnoutakin huai na mu ua, nipi hongtung ding ahi chih noumau in na thei uhi.

³¹Huchi mah bang in nou leng huaite hongtung na muh chiang un, Pathian lalgam a hongnaita chih thei un.

³²Chihtaktak in k’on hilh ahi, thil tengteng a tunkim masiah tulai khangte a mangkei ding hi.

³³Lei leh van a mang dia, ka thu zaw a mang kei ding hi.

³⁴“Himahleh pilvang un, huchilou in zaw nek vahluat toh, zukham toh damsung khosak ngaihtuah in, na lungtang uh a dimlaw kha ding a, huai ni’n thangawk bang in thakhat in na tung uah a hongtung guih kha ding hi.

³⁵Tuabang tak in leitung tengteng a omte tung a tung chiat ding ahi ngal a.

³⁶Huai thil hongtung ding tengteng pel ding leh Mihing Tapa ma a dingtak ding a seh na hihtheihna ding uleh thahatna na neihna ding un chiklaipeuh in thumkawm in limsak gige un” a chi hi.

³⁷Huan niteng in Pathian biakin ah thu a hilhzel a; zan teng in a pawt a, Olive tang a chih uah a giak zel hi.

³⁸Huan zing in a thu ngaikhe ding in mi tengteng Pathian biakin ah a kiang ah a hongzel uhi.