Read Paite Chin LUKE 22 Bible Online

LUKE 22 - Paite Chin bible

LUKE 22

¹1 Huan Tanghou Silngou Sohlouh Ankuangluini, Paikan Ankuangluina kichi a naita hi.

²Siampu liante leh laigelhmite’n hihlupna dan a zong ua, vantang lah a kihta uhi.

³Sawmlehnihte lak a pang, Judas, Iskariot kichi sung ah Setan a lut hi.

⁴Huchi in amah a vapai a siampu liante leh heutute kiang ah zuausan a matsak theihna ding dan a va kihoupih hi.

⁵Amau a kipak mahmah ua, a kiang ah dangka piak a chiamta uhi.

⁶Aman lem a sa a, mipi omlouh kal a zuausan a matsakna lemtang a zawngta hi.

⁷Huan Tanghou Silngou Sohlouh ni, Paikan Ankuangluina belamnou gohna ding ni, a hongtungta hi.

⁸Huchi in Jesu’n, “Peter leh Johan a sawl a, Paikan Ankuang i nek ding in hon va bawlsak un” chi in.

⁹Huan amau a kiang ah, “Koi ah vabawl le ung na ut a?” a chi uhi.

¹⁰Huan aman a kiang uah, “Ngai un, khopi a na lut un, pasal, bel a tui pua in hontuak ding a, a lutna inn ah zuilut un” a chi hi.

¹¹Inn neipa kiang ah, “Sinsakpa’n, ka nungzuite toh Paikan Ankuang ka nekna ding uh, mikhual inn pindan koilai ahia, a honchi, na chi ding uh.

¹²Huchi in aman indan tungnung zapi, van omsa, a hon ensak ding; huai ah hih un,” a chi hi.

¹³Huan a hohta ua, a kiang ua a gen bangtak in a muta ua; huan Paikan Ankuang a vabawl uhi.

¹⁴Huan a nek hun in, aman an a um a, a sawltakte’n a umpih sam uhi.

¹⁵Huan a kiang uah, “Ka thuak ding ka thuak ma in hiai Paikan Ankuang hon nekpih ka ut mahmah hi.

¹⁶K’on hilh ahi, hiai Pathian gam a a taktak a hih masiah, ka ne nawn kei ding” a chi hi.

¹⁷Huan nou a la a, kipahthu a genkhit in, “Hiai la unla, kihawm un;

¹⁸K’on hilh ahi, tuban Pathian gam a hongtun masiah grepgui gahtui ka dawn nawn kei ding” a chi hi.

¹⁹Huan tanghou a la a, kipahthu a genkhit in a balkham a, a kiang uah a pia a, “Hiai ka sapum ahi, na sikua piak ding ahi; keimah theihgigena in hihzel un” a chi hi.

²⁰Huchibang in nitak annek zoh in nou a la a, “Hiai nou ka sisan a thukhun thak, na sikua pawt ding ahi.

²¹Himahleh ngai un, zuausan a hon mansak dingpa khut ka kiang ah dohkan tung ah a omta hi.

²²Mihing Tapa a seh bangtak in a pai ding hi, himahleh zuausan a mansak dingpa mihing tung a gik hi!” a chi hi.

²³Huan amau lak ah “Huchibang thilhih ding kua ahi dia le?” chi in, a kidong uhi.

²⁴Huan a lak uah kuapen ahia thupipen a seh chih thu ah, kiselna a hongpawt hi.

²⁵Aman a kiang uah, “Jentel kumpipate a tung uah a thunei gige uh a, a tung ua thuneite Nu leh Pa, a chi gige uh.

²⁶Himahleh nou zaw huchibang na hi kei ding uh; na lak ua thupipen nauzaw bang in om henla, makai pen leng na sempen bang in omzaw hen.

²⁷Kua ahia thupizaw, an um hia, an pepa? An um hilou hia? Himahleh kei zaw na lak uah nasempa bang in ka om hi.

²⁸“Ze-etna ka tuah sung noute kei hon ompihte na hi uh;

²⁹Huchi in kei ka Pa’n gam a hon sehsak bang in gam k’on sehsak ahi.

³⁰Ka gam a ka dohkan a na nek ua na dawn theihna ding un; huchi in, Israel nam sawmlehnih vaihawm sak in mangtutphah ah na hongtu ding uhi.

³¹“Simon, Simon, ngai in, Setan in buhsep bang a a honsep theihna ding in, noute hon ngen eive.

³²Himahleh na ginna a manlouhna ding in k’on thumsak hi; na kihei nawn chiang in nang na unaute hihkip in, a chi hi.

³³Huan aman a kiang ah, Toupa, na kiang ah suangkulh ah leh sihna ah leng pai sam ngap ka hi, a chi hi.

³⁴Aman Peter, k’on hilh ahi, n’on theihna ah thumvei n’on kitheihmohbawl masiah tuni in ak a khuang kei ding” a chi hi.

³⁵Huan a kiang uah, “Dangka iplou, kawlzal lou leh khedap lou a k’on sawlkhiak in bang na tasam ua?” a chi hi. Amau, “Bangmah” a chi uhi.

³⁶Aman a kiang uah, “Tun zaw dangka ipnei in keng henla, kawlzal toh, kuapeuh namsau neilou in a puan zuak henla, lei hen.

³⁷K’on hilh ahi, Amah talekte lak ah sim tel ahi, chih gelh ka tung ah a hongtung ahi; ka tungtang thu tungkim ngei ding ahi ngal a” a chi hi.

³⁸Huan amau, “Toupa, en dih, hiai ah namsau nih a om” a chi ua. Aman a kiang uah, “A hun” a chi hi.

³⁹Huan amah a pawt a, a ngeina dan in Olive tang ah a hohta a; nungzuite’n leng a zui uhi.

⁴⁰A mun a vatun un, a kiang uah, “Khemna a na lutlouhna ding un, thum un” a chi hi.

⁴¹Huan suang a denphak tan vel ah a vapai tuamta hi;

⁴²Huan a khukdin a, a thum a, “Pa, hoih na sakleh hiai nou ka kiang apan lasuan in; himahleh kei thu hilou in, nangmah thu hi zaw hen” a chi hi.

⁴³Huan van a kipan angel khat a hihhat ding in a kiang ah a hong kilak hi.

⁴⁴Huan a gim mahmah a, phatuamngai nawnsem in a thum a; a kho-ul, sisan bang in mal liantak in lei ah a takkheta hi.

⁴⁵Huan a thum khit a a thoh in, nungzuite kiang ah a hongpai a, a lungkham ziak un a na ihmu uh a mu hi.

⁴⁶Huan a kiang uah, “Bangdia ihmu na hi ua? Khemna a na lutlouhna ding un thou unla, thum un” a chi hi.

⁴⁷Huan huai a genlai tak in, ngai dih, mipi a hongpai ua, sawmlehnihte lak a tel Judas in a ma uh a kai a; tawp tum in Jesu a honzuan hi.

⁴⁸Himahleh Jesu’n, a kiang ah, “Judas, Mihing Tapa tawp a mansak ding na hi maw?” a chi hi.

⁴⁹Huan a kim a mite’n thil hongtung ding a theihun, “Toupa, namsau in ka sat ding uam?” a chi uhi.

⁵⁰Huan a lak ua kuahiam in siampu lianpen sikha a sat a, a bil taklam a satkhiak sak hi.

⁵¹Huan Jesu’n, “Hih nawn ken” a chi a, a bil a khoih a, a hihdamta hi.

⁵²Jesu’n a kiang a hong siampu liante Pathian biakin heutute leh upate kiang ah, Namsau leh khetbuk tawi in, suamhat man ding bang hial in na hong kuan uh maw?

⁵³Pathian biakin a na kiang ua niteng a ka omlai in hon mat tum in n’on sawk kei ua; himahleh tu mial thuneihna toh na tat hun uh ahi, a chi hi.

⁵⁴Huan a man ua, a pi ua, siampu lianpen inn ah a pilut uhi. Peter in gamlapi ah a zui hi.

⁵⁵Huan inn huangsung intual ah mei a chih ua, a tu khawm ua, Peter a lak uah a vatu sam hi.

⁵⁶Huan meivak a a tutlai in nungak kuahiam in a mu a, a en nilouh a, “Hiai mi leng a kiang a om ahi” a chi hi.

⁵⁷Aman bel, “Numei, amah ka theikei” chi in a kitheihmohbawl hi.

⁵⁸A denchiang deuh in midang in a hong munawn a, nang leng a lak ua mi na hi ve, a chi hi. Peter in bel, “Mihing aw, ka hi kei” a chi hi.

⁵⁹Huan dakkal khat phial nung in, midang in, “Hiai mi leng a kiang a om ahi tham hi; Galili gammi ahi” a chi chiltel hi.

⁶⁰Huan Peter in, “Mihing aw, na thugen ka theikei” a chi hi. Huan thakhat in, a paulaitakin ak a khuangta hi.

⁶¹Huan, Toupa a kihei a, Peter a en hi. Peter in, “Ak khuanma in thumvei n’on kitheihmohbawl ding, chi a Toupa’n a kiang a a thugen a hon theikhe nawnta hi.”

⁶²Huan a pawt a, a kap huphup hi.

⁶³Jesu lente’n nuihza bawlna’n a zang ua, a sat uhi,

⁶⁴A mit a tuam ua, “Kua ahia honsat, gen in?” chi in a dong uhi.

⁶⁵Thu dang tampi in leng a gensia un a kou uhi.

⁶⁶Huan khovak tak in Upa hon, siampu liante leh laigelhmite, a hong kikhawm ua, a vaihawmna uah a pi uhi.

⁶⁷“Khrist na hihleh honhilh in” a chi uhi. Huan aman a kiang uah: “Honhilh mah leng na gingta kei ding uh;

⁶⁸Ken noute thu hon dong lengleng, n’on dawng kei ding ua, na honkhah sam kei ding uh.

⁶⁹Himahleh tuban siah Mihing Tapa, Pathian thilhihtheihna taklam ah a tu ta ding” a chi hi.

⁷⁰Huan avek un, “Nang Pathian Tapa na hi maw leh?” a chi ua. Aman a kiang uah, hi e, n’on chih bang un, a chi hi.

⁷¹Huan amau bang theihpihna dang i deih lai dia? Eimah mah in amah kamsuak i zata ve le” a chi uhi.