Read Paite Chin LUKE 23 Bible Online

LUKE 23 - Paite Chin bible

LUKE 23

¹Huan mipi tengteng ading ua, Jesu Pilat kiang ah a pita uhi.

²“Hiai mi’n ka chite uh a pimang a, Kaisar kiang ah siahliau a kham, Khrist, kumpipa, a kichih ka za uh” chi in a hekta uhi.

³Pilat in, a kiang ah, “Judate kumpipa na hi hia?” chi in, a dong a. Aman “Hi e,” chi in a dawng hi.

⁴Pilat in siampu liante leh mipite kiang ah, “hiai mi tung ah bangmah khelhna ka mu kei,” a chi hi.

⁵Himahleh amau, “Galili gam a kipan Judia gam khuateng leh hiai mun tan ah thuhilh in, mi tengteng a fuihse gige” chi in, a khauh semsem uhi.

⁶Pilat in huai a zak in, hiai mi Galili gam a mi ahi hiam chih a dong hi.

⁷Huchi in Herod uk sungmi ahi chih a theihtakin Herod kiang ah a sawlta a; huailai in amah leng Jerusalem khua ah a om hi.

⁸Herod in Jesu a muh in a kipak mahmah a; a tanchin a zak ziak in, tuma siah apat muh a ut him ahi a, a thillamdang hih banghiam bek muh a lamen hi.

⁹Huan thu tampi a dong a; himahleh bangmah in a dawng tuankei hi.

¹⁰Siampu Liante leh laigelhmite’n ding in nakpitak in a hek uhi.

¹¹Herod leh a sepaihte’n Jesu a simmawh ua, nuihzabawlna’n a zang uh, puan thupitak silhsak in Pilat kiang ah a sawlnawnta hi.

¹²Huai ni nitakin Herod leh Pilat a kihouthei ta uhi; huai masiah zaw kihouthei lou ahi uhi.

¹³Pilat in siampu liante, heutute, mi tengteng a samkhawm a, a kiang uah,

¹⁴“Mite a pimang chi in, hiai mi ka kiang ah n’on pi uhi, ngai un, na ma ua ka etchet nung in na hekna thu uah hiai mi tung ah bangmah khelhna ka mu kei hi;

¹⁵Herod in leng a mu sam kei. I kiang uah a hon sawlnawnta hi. Ngai un, sihna khop hial bangmah a hih kei hi.

¹⁶Huchi in ka vaw ding a, ka pawtsak mai ding” a chi hi.

¹⁷Ankuangluini a lak ua mi khat a pawtsak teitei ding ahi ngal a.

¹⁸Himahleh kituaktakin a kikou ua, “Hiai mi hih mangthang inla, Barabba pen hon pawtsak zaw in” a chi uhi.

¹⁹Huai mi khopi a helna leh, tualthah ziak a suangkulh tang ahi.

²⁰Pilat in bel Jesu khah a ut a, a kiang uah thu a gen nawn hi.

²¹Himahleh “Kros ah kilhden in, Kros ah kilhden in” chi in a kikou uhi.

²²Huan aman, a thumveina ah a kiang uah, “Bang ding in maw? Hiai min bang ahia ahihkhelh? Sihna khop hial a tung ah bangmah ka mu kei; ka vaw ding a, ka khah mai ding” a chi hi.

²³Amau bel aw ngaihtak in Kros a kilhden ding in a ngen teitei uhi. Huan a aw un a vau daita uhi.

²⁴Pilat in a nget bang ua hih ding in thu a hihpukta hi.

²⁵Helna leh tualthah ziak a suangkulh tang a nget uh a khah a; Jesu bel a utut a loh ding un a peta hi.

²⁶A pimanglai un, Simon Kurini khaw mi, gam lam a kipan hongpai a man ua, Jesu nunglam paw ding in a tung ah Kros a ngata uhi.

²⁷Huan mi nazong leh numei amah kah a mau zelzul, mipi tampitak in a zui uhi.

²⁸Jesu bel amaute lam nga in, “Jerusalem tanute aw, honkah kei un, noumau leh na tate uh ading in kap zaw un” a chi hi.

²⁹Ngai un, a ni a hongtung ding a, ‘huai ni’n, numei chingte, naupai ngeilouhna gilte, naungek tep ngeilouh nawite a hampha uh,’ a chi ding uhi.

³⁰Huai hun chiang in mite’n, ‘tangte kiang ah hondelh un’ a chi ding uh, mualte kiang ah, honkhuh un, a chi ding uhi.

³¹Sing a hinlai a bawn hichibang a a hih uh leh; a keu chiang in bang a lohta phet ding ua?” a chi hi.

³²Huan a kiang ah midang nih, migilou, hihlup ding in a pisam uhi.

³³Luguhmun, a chih uh a tun un, migiloute, a taklam ah khat, a veilam ah khat toh Kros ah a kilhden uhi.

³⁴Jesu’n, “Pa, amau ngaidam in; a thilhih uh a theikei ua ahi, a chi hi. Huchi in a puansilhte kihawm in, ai a san uhi.

³⁵Huan mi vantang in ding kawm in a en uhi. Huchi in vaihawmmite’n, “Midang bawn a hondam a ka; Pathian tel Khrist a hihtaktak leh amah leng ki hondam hen aw,” chi in a enghou uhi.

³⁶Sepaihte’n leng amah nuihzabawlna’n a nei ua, a kiang ah a hong ua, zuthuk a pia uhi.

³⁷“Judate kumpipa na hih taktak leh ki hondam in” a chi uhi.

³⁸Huan a lutung zawn Kros ah, Grik, Latin leh Hebru laimal in, “HIAI JUDATE KUMPIPA AHI” chi in, laigelh a tak uhi.

³⁹Huan a migilou kilh khat un Jesu a tai a, “Khrist na hi ka hia? Ki hondam inla, kou leng hon hondam tanla” a chi hi.

⁴⁰Himahleh khatpa’n dawng kawm in, a taihilh a, “Pathian nangawn na kihta ka hia kibang sap a hon gawt uh?

⁴¹Eizaw gawt tuak him i hi; i thilhih manlel mu i hi a; hiai min bangmah a hihkhial ngalkei a” a chi hi.

⁴²Aman, “Jesu Toupa na Kumpi gam a n’ong pai chiang in hon theigige in” a chi hi.

⁴³Aman a kiang ah, “Chihtaktak in k’on hilh ahi, tuni in ka kiang ah Paradise ah na omsam ding” a chi hi.

⁴⁴Huan dakgukna ding ahi a, huai nungsiah dak kua na huntan in gam pumpi a hong mialvekta a, nivak a beita hi.

⁴⁵Pathian biakin puanzak a lai ah a hong keksuak hi.

⁴⁶Jesu aw ngaihtak in a kikou a, “Pa, na khut ah ka kha k’on kemsak hi” a chi hi. Huai a chihzoh in a kha a khahta hi.

⁴⁷Sepaih zaheutupa’n thil omdan a muh in, “Hiai mi pellou in midik ahi ngeingei” chi in Pathian a phat hi.

⁴⁸Huai etnop en ding a mipi hong kikhawm tengteng te’n thil omdante a muh un a awm uh kitum in a kiknawnta uhi.

⁴⁹Huan a meltheihte tengteng leh numei Galili gam a kipan a honzuite, huai thilte en in gamla tak ah ading uhi.

⁵⁰Huan ngai un, mi khat a min Joseph, vaihawmmi, mi hoihtak, diktak, Judate khua khat Arimathai a kipan a om hi,

⁵¹A vaihawm uah leh a thilhih uah leng a ki awikei him hi. Pathian gam a lamen gige hi.

⁵²Huai mi Pilat kiang ah a hoh a, Jesu luang a ngen hi.

⁵³Huan a lakhia a, puanmalngat in a tuam a, han, suang khuakkuak, kuamah sial nailouhna ah, a sial hi.

⁵⁴Huan huai ni kisakkholhna ni ahi, khawlni a hong tundek ziak in.

⁵⁵Galili gam a kipan a kiang a numei hongte’n a zuizel ua, han leh a luang sialdan a mu uhi.

⁵⁶Huan a pai nawn ua, gimnamtui leh thaunamtui a bawl uhi.