Read Paite Chin LUKE 24 Bible Online

LUKE 24 - Paite Chin bible

LUKE 24

¹Huan khawlni’n thupiak bang in a khawlta uhi; ni sagih ni masapen in; phalvakin, gimnamtui a bawlte uh tawi in, han ah a vahoh uhi.

²Hana kipan suangtum khuksuan a om a mu uhi.

³Huan a lut ua, Toupa Jesu luang a mukei uhi.

⁴Hichi ahi a, huai ziak a a mangbat laiun, ngai in, mi nih puan milengthei silh a kiang uah a hongding uhi.

⁵A lau ua a khupboh lai un, a kiang uah, “Bangdia misi lak a mihing zong?

⁶Hiai ah a omta kei hi, a thounawnta; Galili gam a a omlai a na kiang ua a thugen theigige un,

⁷Mihing Tapa mikhialte khut a matsakin a om ding a, a kilhden ding uh, ni thum ni’n a thounawn ding ahi” a chih a chi uhi.

⁸Huan a thugente a hon theinawn uhi.

⁹Hanmuna kipan a pai nawn un, sawmlehkhatte leh midang tengtengte kiang ah huai thil tengteng a hilh uhi.

¹⁰Sawltakte kiang ah huai thuhilhte bel Mari Magdalini, Mari, Joanna, Jakob nu Mari leh a kiang ua numei dangte ahi uhi.

¹¹Himahleh huaite thugen thu maimai in a ngai ua, amau a taksang kei uhi.

¹²Himahleh Peter a thou a, han ah a taita a; huan a kuna, a en a, puanmalngat omte kia a mu a, huchi in thil omdan lamdangsa tak in inlam ah a paita hi.

¹³Huan ngai in, huai ni mah in a lak ua mi nih khua khat Emmau a chih uah a hoh dek ua, huai khua Jerusalem apat ching sawmguk ahi.

¹⁴Huan thil hongtung tengteng a gen khawm zel uhi.

¹⁵Gen a a kisel lai un, Jesu ngei in a honzuan a, a kiang uah a paisamta hi.

¹⁶Himahleh amah a theihlouhna ding un, a mit uh hihvaih in a om hi.

¹⁷Huan a kiang uah, “Paikawm a na genkhawm uh bang thu ahia?” a chi hi. Huan dahmel tak in ading dinden uhi.

¹⁸Huan a min Kleopa pen in a kiang ah, “Jerusalem khua ah nangmah kia in hia na ten, tulai a thil omdan na theihlouh?” chi in a dong hi.

¹⁹Aman a kiang uah, “Bang thil eita?“ a chi hi. Amau a kiang ah, “Nazaret Jesu, Pathian leh mi tengteng mitmuh a a thu leh a thilhih a zawlnei minthangtak tanchin thu:

²⁰Siampu liante leh ka heutute un thah ding in thu a pia ua, Kros ah a kilhden thute uh.

²¹Kou amah zaw Israelte tanpa ding a lamen hi ung a, himahleh, huai thiltun nungsiah tuni a ni thumni ahita hi.

²²Huailou leng ka pawlte uh numei kuate hiam zingsang in, han ah a vahoh ua, hong hih mangbang uhi;

²³A luang mulou pi in, Pathian angelte kilak ka mu uh, huai mite’n a thounawnta chih a gen uh, a hong chi uhi.

²⁴Ka ompihte lak ua kuate hiam han ah a hoh ua, numeite genbang ngei in a mu ua; himahleh amah a mu kei uh” a chi uhi.

²⁵Aman a kiang uah, “Mihaite aw, zawlneite thugen tengteng gintak thu a ze awlte aw:

²⁶Khrist in huai thilte thuak a thupina a lut ding him ahi ka hia?” a chi hi.

²⁷Mosi leh zawlneite tengteng apan in, Laisiangthou tengteng amah tanchin gelh peuhmah amau a hilhchian zel hi.

²⁸Huan a hohna ding khua uh a tung dekta ua; amah gamla deuh a hohtum bang in a om hi.

²⁹Kam in a khou ua: “Ka kiang uah tam in; nitaklam leng hi ding hita a, ni leng tumdekta ahi” chi in. Huchi in a kiang ua tam ding in a lutta hi.

³⁰Hichi ahi a, a kiang ua an um a a tut in tanghou a la a, a vualzawl a, a balkham a, a kiang uah a pia hi.

³¹Huan a mit uh a hongvakta a, a mel a theita uhi. Himahleh amah a mangta mai hi.

³²Amau, “Lampi a hon houpihlai a Laisiangthou thute hon hilhchet lai in i lungtang a vakhuai him hilou hia?” a kichi uhi.

³³Huailai tak in, a thou ua, Jerusalem khua ah a kiknawn ua, sawmlehkhatte leh a lawmte omkhawmte a mu uhi,

³⁴“Toupa a na thounawn taktak ahi, Simon kiang ah leng a kilakta” a na chi uhi.

³⁵Amau lampi a bang thil om hiam chih leh, tanghou a balkhap a, a mel a theihdante uh a hilh sam uhi.

³⁶Huai thu a genlai un Jesu mahmah a lakuah a hongdinga, a kiang uah, “Na tung uah khamuanna om hen” a chi hi.

³⁷Himahleh mulkimhuai a sa mahmah ua, a lau ua, sikha mu hi in a kingaihtuah uhi.

³⁸Aman a kiang uah, “Bang a chia mangbang na hi ua? Bangdia na lungsim ua ginlahna hongom ahia?

³⁹Ka khutte ka khepekte en un, kei mahmah ka kei hiam! Hon khoih unla, thei un; sa leh guh nei a n’on muh bang un kha in zaw sa leh guh a nei ngal kei hi” a chi hi.

⁴⁰Huai a genkhit in a khutte a khepekte amau a lak hi.

⁴¹A kipahluat ziak ua a gin ngamlouh lamdang a saklai un, a kiang uah, “Hiai ah banghiam nekding na nei uhia?” a chi hi.

⁴²Ngahou, bak khat leh khuaizu khak a pia uhi.

⁴³A la a, a ma uah a neta hi.

⁴⁴Huan a kiang uah, “Na kiang ua ka omlai a ka tanchin gelh peuhmah thute a hongtung ding chi a k’on hilhhilhte Mosi Dan, zawlneite leh phatnalate a thu kigente hiaite ka thu ahi” a chi hi.

⁴⁵Huchi in Laisiangthou thu theihna din a lungtang uh a vaksakta hi.

⁴⁶Huan a kiang uah, “Hichibang a gelh ahi, Khrist in gim a thuak ding a, ni thum ni’n misi lak a kipan a thounawn ding a chi hi:

⁴⁷Amah min in kisikna leh khelh ngaihdamna thu Jerusalem khua apat in namchih kiang ah hilh ahi ding, chi in.

⁴⁸Huai thil tengteng a theihpihte na hi uh.

⁴⁹Huan ngai un, ka Pa thilchiam na tung uah k’on sawl ding a; himahleh, tunglam a kipan thilhihtheihna silhsak a na om masiah uh khopi ah om kinken un” a chi hi.

⁵⁰Huan Bethani pha in amau a pikhia a; huan a ban a zak a, a vualzawl hi.

⁵¹Hichi ahi a, a vualzawl laitak in amau a paisanta a, van ah pitouh in a omta hi.

⁵²Huan amah a bia ua, kipak kawm in Jerusalem ah a kik nawnta uhi:

⁵³Pathian biakin ah Pathian phat in a om nilouh uhi. Amen.