Read Paite Chin LUKE 3 Bible Online

LUKE 3 - Paite Chin bible

LUKE 3

¹Tiberias Kaisar vaihawm kum sawmlehnga kum in, Judia gamukpa Pontia Pilat ahi a, Galili gam kumpipa Herod ahi a, a unau Philip, Ituria leh Trakoniti gam kumpipa ahi a, Abilin gam kumpipa Lusania ahi.

²Annas leh Kaiapha siampu lianpen ahi ua, huailai in Gamdai ah Zakariah tapa Johan kiang ah Pathian thu a hongtung hi.

³Amah bel Jordan luigei kim gam tengteng ah a hoh a, thil hihkhial ngaihdamna ding in kisikna baptisma thu a gen zel hi.

⁴Zawlnei Isai laibu a, “Gamdai a kikou aw in, Toupa lamlian sial unla, a lampite tangsak un.

⁵Guam chih sundim ahi ding a, tang leh mual chih, hihniam ahi ding; lampi kawite tansak ahi ding a, lampi phokte mamsak ahi ding.

⁶Huan mi tengteng in Pathian hotdamna a mu ding uh” a chi, chih gelh bang in.

⁷Aman baptisma tangding a kiang a mipi hongsukte kiang ah, “Gul suante aw, thangpaihna hong tungding taisan ding a kuan hon vauhilh ahia?

⁸Huchi in kisik minpu tak in gah un, Abraham ei hon suangpa ahi na lungsim un chi kei un; Pathian in hiai suangte Abraham suante in a dingsak thei chih k’on hilh ahi.

⁹Tu mahmah in heipi singbul teng ah koih ahita; huchi in, sing chih gah hoih a gahlou peuhmah phuk in a om a, mei ah paih in a om” a chi hi.

¹⁰Huan mipite’n a kiang ah, “Bang ka hih ding ua?” a chi ua, a dong uhi.

¹¹Aman, a kiang uah, “Kuapeuh puanak nih nei in a neilou kiang ah hawm hen; kuapeuh an nei in huchibang mah in hih hen” chi in, a dawng hi.

¹²Huan siahkhawnmite leng baptisma tang ding in a hong ua, a kiang ah, “Sinsakpa, bang ka hih ding ua?” a chi uhi.

¹³Aman a kiang uah, “Hon sehsak val uh khon kei un” a chi hi.

¹⁴Sepaihte’n leng a kiang ah, “Kou leng bang ka hih ding ua?” a chi ua, a dong uhi. Aman a kiang uah, “Kuamah hiamgam in hih kei unla, diklou pi in kuamah hek kei unla, na loh uah lungkim un,” a chi hi.

¹⁵Huan mite’n a lamet ua, mi tengteng in Johan tungthu a lungtang ua, Khrist ahi kha zenzen diam aw? chi a a ngaihtuah lai un,

¹⁶Johan in a dawng a, avek ua kiang ah, “Ken tui in k’on baptist a, himahleh keimah sang a mi thupizaw a hongpai ding, a khedap khau pheltak leng ka hi kei; aman Kha Siangthou leh mei in nou a hon baptist ding.

¹⁷A khut in a phazah a tawi a, a phual zapsiangna ding leh buhpang a buhte sunlutna ding in; a site mei mit ngeilou ah a haltum ding” a chi hi.

¹⁸Huan hanthawnna tampi in mite kiang ah Tanchinhoih a hilh zel hi.

¹⁹Himahleh kumpipa Herod in a naupa zi, Herodia tungthu ah leh a thilhihkhelh tung a Johan in a taihilh ziak in,

²⁰A thilhihkhelh tengteng behlap in amah suangkulh ah a khum hi.

²¹Huan mi tengteng a baptist zoh in, hichi ahi a, Jesu leng baptist zoh a a om in, a thum a, van a hong kihong hi,

²²Kha Siangthou sa pu in vakhu bang in a hongsuk a, a tung ah a tuta a; van a kipan in aw a hongpawta, “Nang ka Tapa deihtak na hi; na tung ah ka kipak mahmah” a chi hi.

²³Huan Jesu’n thu a hilh pattunglai in amah kum sawmthum vel ahita, mi ngaih in zaw Joseph tapa ahi a, huai Heli tapa ahi a,

²⁴huai Matthat tapa ahi a, huai Levi tapa ahi a, huai Melki tapa ahi a, huai Janna tapa ahi a, huai Joseph tapa ahi a,

²⁵huai Matthathi tapa ahia, huai Amos tapa ahi a, huai Nahum tapa ahia, huai Esli tapa ahi a, huai Naggai tapa ahi a,

²⁶huai Maathi tapa ahi a, huai Matthathi tapa ahi a, huai Semmei tapa ahi a, huai Josek tapa ahi a, huai Joda tapa ahi a,

²⁷huai Joanan tapa ahi a, huai Rhesa tapa ahi a, huai Zerubbabel tapa ahi a, huai Salathiel tapa ahi a, huai Neri tapa ahi,

²⁸huai Melki tapa ahi, huai Addi tapa ahi, huai Kosam tapa ahi, huai Elmadam tapa ahi, huai Er tapa ahi,

²⁹huai Joses tapa ahi a, huai Eliezer tapa ahi a, huai Jorim tapa ahi a, huai Matthat tapa ahi,

³⁰huai Levi tapa ahi a; huai Simeon tapa ahi, huai Juda tapa ahi, huai Joseph tapa ahi, huai Jonam tapa ahi, huai Eliakim tapa ahi a,

³¹huai Melia tapa ahi, huai Menna tapa hi, huai Mattatha tapa ahi a, huai Nathan tapa ahi, huai David tapa ahi,

³²huai Jesse tapa ahi, huai Obed tapa ahi a, huai Boaz tapa ahi a, huai Salmon tapa ahi a, huai Nahson tapa ahi,

³³huai Aminadab tapa ahi, huai Aram tapa ahi, huai Esrom tapa ahi a, huai Parez tapa ahi, huai Juda tapa ahi,

³⁴huai Jakob tapa ahi, huai Isak tapa ahi, huai Abraham tapa ahi a, huai Tera tapa ahi a, huai Nahor tapa ahi.

³⁵Huai Serug tapa ahi, huai Reu tapa ahi, huai Peleg tapa ahi, huai Eber tapa ahi, huai Selah tapa ahi,

³⁶huai Kainan tapa ahi, huai Arpaksad tapa ahi, huai Sem tapa ahi, huai Noah tapa ahi, huai Lamek tapa ahi,

³⁷huai Methusel tapa ahi, huai Enok tapa ahi, huai Jared tapa ahi, huai Mahalalil tapa ahi, huai Kainan tapa ahi,

³⁸huai Enos tapa ahi, huai Seth tapa ahi, huai Adam tapa ahi, huai Pathian tapa ahi.