Read Paite Chin LUKE 5 Bible Online

LUKE 5 - Paite Chin bible

LUKE 5

¹Huan hichi ahi a, mipi’n Pathian thu a ngaihkhiak ua, amah a boh huthut lai un, amah Gennesaret dilgei ah ading hi.

²Huan dilgei a long nih om a mu a, himahleh ngamanmite a pawtkhia ua, a lente uh a sawp uhi.

³Huchi in long khat Simon a pen ah a tuang a, a kiang ah luigei a kipan neukha tolhlut sak deuh a ngen hi. Huan a tu a, long a kipan mipite thu a hilh hi.

⁴Huan a thugen zoh in, Simon kiang ah, “Lithuk lam naih unla, ngaman ding in, na lente uh pai un” a chi hi.

⁵Huan Simon in a kiang ah, “Heutupa, gimtakin zankhua in ka pang ua, bangmah ka mankei ua, himahleh na thu in lente ka pai nawn ding,” a chi a, a dawng hi.

⁶Huan a paih ua leh nga tampi tak a khuh ua, a lente uh a kek iakkiak hi.

⁷Huan long dang a om a lawmte uh amau huh ding in a khutvan uhi. A hongpai ua, long nih tum phialphial in asung dim tuaktuak uhi.

⁸Simon Peter in huai a muh in, Jesu khebul a khupboh in, “Toupa, hon paisan in, mikhial ka hi” a chi hi.

⁹A nga mat uh amah leh a lawmte’n lamdang a sa mahmah uhi;

¹⁰Simon pawlte mah Zebedai Tapa Jakob leh Johan in leng lamdang a sa mahmah sam uhi. Simon kiang ah Jesu’n, “Lau ken, tuban siah mihing na manta ding” a chi hi.

¹¹Huan a longte uh luigei ah a tolh galkai ua, bangkim paisan in amah a zuita uhi.

¹²Huan hichi ahi a, khua khat a a omlai in ngai dih, mi khat phak a pumdim a om a, aman Jesu a muh in, a ma a khupboh in, “Toupa, na ut leh n’on hihsiang thei” a chi a, a ngen ngutngut hi.

¹³Aman a sawk a, a khoih a, “Ka ut, na siangta in” a chi hi. Huan thakhat in a phak a hong beipah hi.

¹⁴A kiang ah, “Kuamah hilh ken, himahleh siampu kiang ah va ki ensak inla, na sianhonna ding Mosi sehbang lan in, mite theihchetna ding in” a chi hi.

¹⁵Himahleh a tanchin thu a thang sansan a; mipi thupitak a thu za nuam leh a natnate uh hihdam ut in a hong kikhawm kheukhou uhi.

¹⁶Himahleh amah gamdai ah a paituam a, a thum hi.

¹⁷Huan hichi ahi a, huailai in ni khat thu a hilh hi. A kiang ah Pharisaite leh dansiamte a tu uhi, huaite Galili leh Judia gam khaw teng a kipan a hongpai ahi uhi. Mite hihdamna ding in Toupa thilhihtheihna a kiang ah a om hi.

¹⁸Huan ngai dih, lupna toh mizaw khat a honzawng ua; a ma a koih ding in zawnlut a tum uhi.

¹⁹Himahleh mipi ziak in zawnlut ding dan a mu theikei ua, intung a kipan a laitak ah, Jesu ma ah a lupna toh a khai khesuk uhi.

²⁰Huan a ginna uh a muh in, a kiang ah, “Mihing, na khelhnate ngaihdam ahita” a chi hi.

²¹laigelhmite leh Pharisaite’n, “Pathian gensia hiai mi kua ahia? Pathian kia lou in kuan ahia khelhnate ngaidam thei?” chi in a ngaihtuah uhi.

²²Huchi in Jesu’n a ngaihtuah uh a thei a, a kiang uah, “Na lungtang uah bang na ngaihtuah ua?

²³Na khelhnate ngaihdam ahita, chih leh thou inla, khe in paita in, chih, a koipen gen a nuam zaw?

²⁴Himahleh, khovel ah Mihing Tapa in khelhnate ngaihdam theihna a nei chih na theihna ding un” a chi a, “Damlou mizaw kiang ah; Thou inla, na lupna la inla, na inn ah pai in, k’on chi” a chi hi.

²⁵Huchi in a mitmuh un a thou paha, a lupna a la a, Pathian phat kawmkawm in a inn ah a paita hi.

²⁶Huan avek un lamdang a sa mahmah ua, Pathian a phat uhi. “Tuni in thillamdang pitak i mu hi” a chi ua, a lau mahmah uhi.

²⁷Huaite khit in a pawt a, siahpiakna mun a tu, siahkhonmi khat a min Levi a mu a; a kiang ah, “Honzui in” a chi hi.

²⁸Huchi in bangkim a paisan a, ading a, a zuita hi.

²⁹Huan Levi in a inn ah Jesu ading in Ankuang thupitak a lui hi; siahkhonmi leh midangte toh mi tampi in amau a umpih chiat uhi.

³⁰Pharisaite leh laigelhmite a nungzuite tung ah a phun uhi, “Bangdia siahkhawnmite leh mikhialte kiang a ne a dawn na hi ua?” a chi uhi.

³¹Jesu’n a kiang uah, “Mi damtheite’n daktor a kiphamoh kei ua, mi damtheiloute’n a kiphamoh uhi.

³²Mi diktatte sam ding a hongpai ka hi kei a, mikhialte kisik ding a sam dia hongpai ka hizaw” chi in a dawng hi.

³³Huan amau a kiang ah, “Johan nungzuite’n an a ngawl zel ua, a thum zel uh: Pharisaite nungzuite’n leng huchibang mah in a hihzel uh: himahleh na nungzuite’n a ne un a dawn gige uh” a chi uhi.

³⁴Jesu’n a kiang uah, “Moupi mite kiang a a pasal ding a omlai siah moupi mite an a ngawlsak thei ua hia?

³⁵Himahleh a pasal ding amau a kipan pimangnite a hongtung ding a, huai ni chiang in zaw a ngawl ding uh” a chi hi.

³⁶Huan a kiang uah gentehna thu leng a gen a: “Kuamah in puan lui puan thak them in a thuap ngeikei, thuap mahle uh, a thak in a kaikek dia, a thak them leh a lui a kituak kei ding uhi.

³⁷Huan kuamah in uain thak savun uain thawl lui ah a thun ngeikei, thun le uh uain thak in savun thawlte a puakzak dia, a baw dia, savun thawlte leng a segawp ding uhi.

³⁸Uain thak savun uain thawl thak ah a thun zaw ding uhi.

³⁹Huan kuapeuh uain lui na dawn khin in leng, a thak a duh pah kei hi; a lui hoihzaw a chi ngal a” a chi hi.