Read Paite Chin LUKE 6 Bible Online

LUKE 6 - Paite Chin bible

LUKE 6

¹Huan hichi ahi a, khawlni khat buhlei ah a paisuak a, a nungzuite’n buhvuite a khiak ua, a khutpek ua nuai siang in a ne uhi.

²Pharisai kuate hiam in, “Bangdia khawlni a hihsianglou hih na hi ua?” a chi uhi.

³Jesu’n a dawng a, “David a gilkial lai a a lawmte toh a thilhih uh huai bangte leng na sim kei ua hia?

⁴Huchi a Pathian inn a lut a, siampute loungal in a nek sianglouh tanghou koihtuam a lak a, a lawmte kiang a a piak sam thu” a chi hi.

⁵Huan a kiang uah, “Mihing Tapa zaw khawlni Toupa ahi” a chi hi.

⁶Huan hichi ahi a, khawlni dang khat kikhopnain ah a lut a, thu a hilh a; huai ah mi khat khut taklam zaw a na om hi.

⁷Laigelhmite leh Pharisaite’n a hekna ding a muhtheihna ding un, khawlni’n hihdam ding in a kisa hia kisa lou a sim et uhi.

⁸Himahleh aman a lungsim uh a thei a, khutzaw kiang ah, “Thou inla, a lai ah ding khia in” a chi hi. Huan a thou a, ading kheta hi.

⁹Jesu’n a kiang uah, “Khawlni’n hihhoih a siang hia, hih siat? Hotdam a siang hia, hihlup? K’on dong ahi” a chi hi.

¹⁰Huan avek un a en velvel a, a kiang ah, “Na khut zankhia in” a chi hi. Huan a zankhia a, a khut a damta hi.

¹¹Huchi in a heh law mahmah ua, Jesu tung a hih ding dan a kihouta uhi.

¹²Huan hichi ahi a, huai a kipan in a pawt a, thum ding in tang ah a kuan a, Pathian kiang ah zankhua in a thum hi.

¹³Khovak in a nungzuite a sam a; a lak uah sawmlehnih a tel a, a min ding un leng Sawltak a sa hi:

¹⁴Huaite Simon Peter a chih leh a unaupa Andru, Jakob leh Johan, Philip leh Bartholomai,

¹⁵Matthai leh Thomas, Alphai tapa Jakob,

¹⁶Simon, Zelot kichi leh Jakob tapa Judas leh a mansakpa Judas Iskariot ahi uh.

¹⁷Huan amau toh a paikhia a, mun zang ah ading a, a nungzui mipite toh, Judia gam tengteng a kipan leh, Jerusalem khua a kipan leh, Tura leh Sidon kholam a tuipi gei a kipan mipi tampitak a thu ngainuam leh a damlouhnate uh hihdam ut in a hongpai uhi.

¹⁸Huchi in dawinin bolgawpte leng damsak in omta uhi.

¹⁹Huan a kiang a kipan thilhihtheihna a pawtkhia a, michih a hihdam zel ziak in mipi tengteng in amah khoih a tum uhi.

²⁰Huan a dak khia a, A nungzuite enkawm in a gen a: “Nou gentheite aw, na hampha uhi; Pathian gam nou a ahi ngal a.

²¹Nou tua gilkialte aw, na hampha uhi, tai ding na hi ngal ua. Nou tua kapte aw, na hampha uhi, nui ding na hi ngal ua.”

²²“Mihing Tapa ziak a mite’n a honhuat ua, hon pampaih ua, hontai ua, na min uh a hoih kei chi a a hon paihmang chiang un, na hampha ding uh.

²³Huai ni’n kipak unla, nuam in tawm un, ngai un, van ah na kipahman uh a om kihkeih hi; huchi bangmah in a pipute un zawlneite tung ah a hih uhi.”

²⁴“Himahleh, nou mihaute aw, na tung uh a gik e; na khamuanna uh na mukhinta ngal ua:

²⁵Nou tua vahte aw, na tung uh a gik e; na gil hong uh kial ding ahi . Nou tua nuite aw; na tung uh a gik e; lungkham a kap ding na hi uhi”

²⁶“Mi tengteng in a honphat chiang un na tung uh a gik ding hi; huchi mah bang in a pipute un zawlnei takloute tung ah a hih uhi.

²⁷“Ka thu ngaikhete aw, k’on hilh ahi, na melmate uh it unla, a hon hawte hoihna ding hih un,

²⁸Hamsia hon hamsiatte vualzawl unla, a hon simmohte thumsak un.

²⁹Biang langkhat a hon bengpa a lehlam leng doh in; na puan hon laksakpa kiang ah na puanak leng it ken.

³⁰A hon ngen peuh kiang ah pia in; huan na van hon laksakpa kiang ah ngen nawn ken.

³¹Huan min na tung ua a hih uh na deih ding bangzel un mi tung ah leng hih sam un.

³²“Huan a hon itte kia na it un, pahtak bang na loh ding ua? Mikhialte’n leng amau itte a it sam ve ua oi!

³³Na tung ua hoihte tung kia a na hoih un, pahtak bang na loh ding ua? Mikhialte’n leng huchi bangmah in a hih zel ve ua oi.

³⁴Muhnawn lametnate kiang kia a thil na leitawi sak un, pahtak bang na loh ding ua? Mikhialte’n leng a ngeingei mu nawn ding in mikhialte kiang ah a leitawi sak sam uhi.

³⁵Himahleh na melmate uh it unla, a hoihna ding un hih unla, lunglel hetlou in leitawi sak un; huchi in na kipahman uh a tam dia, Tungnungpen tate na hi ding uh; aman mi kipahna dan theiloute leh migiloute a hehpih hi.

³⁶Na Pa un mi a hehpih bang in mi hehpih sam un.

³⁷“Hawmsak kei un, huchi in hawmsak in na omkei ding uh; kuamah siamlou in sepkei un, huchi in siamlouh in na omkei ding uh; ngaidam un, huchi in ngaihdam in na om ding uh;

³⁸Pia un, huchi in piak in na om ding uh, hoihtak a teh a, hen gak a, sin gak a, let nawinawi in na angsung uah piak in na om ding uh. Noumau tehna ngei mah a tehsak a piak in na om ding uh a hingal a, a chi hi.

³⁹Huan a kiang uah, gentehna a gen a, Mittaw in mittaw mah a pi thei diam? A nih un kawkhuk ah a kekhawm kei ding ua hia?

⁴⁰Nungzui a heutupa tung ah a omkei; himahleh michih a siamkim chiang un a heutupa bang in a om ding uhi.

⁴¹“Huan bangdia, na mit a singtum om limsaklou a, na unau mit a ninneng neuchik om mu na hia?

⁴²Nangmah mit a singtum om mulou in, na unau kiang a, Unau, na mit a ninneng neuchik om hon lakhe sak ve, bangchi a chi thei na hia? Mi lepchiah na mit apat singtum lakhe masa in, huchi in na unau mit a ninneng neuchik lak khiak ding chiantak in na mu thei ding hi.

⁴³“Sing hoih gahsia a gah a om ngeikei; sing sia lah gah hoih a gah a om ngei sam kei hi.

⁴⁴Sing chih amau gah chiat ah a kithei hi. Min khaulingnei kung ah theipi a lou ngeikei uh, lingnok lak ah grep gah a lou ngei sam kei uh.

⁴⁵Mi hoih in a lungtang goubawm hoih a kipan thilhoihte a lakhia a; migilou in a lungtang goubawm sia a kipan thilhoihloute a lakhe zel hi; a lungtang a dim val kam in a genzel hi.

⁴⁶“Huan nou bang ding a, ka gente hihloupi a, Toupa, Toupa, honchi na hi ua?

⁴⁷Michih ka kiang a hong a, ka thu za a zui peuhmah kua bang ahi ua, k’on ensak ding:

⁴⁸inn lammi lei thukpi tou a, suangpi tung a suangphum lemmi bang ahi uh; huan tui a hong khan in, tuikhauh in huai inn a khoha, a hihling theikei, hoihtak a lam a hih ziak in.

⁴⁹Himahleh thu za a manglou suangphum louh a leitung maimaha inn lammi ahi; tui khauh in huai inn a khoha, a chim paha; huai inn siatna thupitak ahi” a chi hi.