Read Paite Chin DIUTERONOMI 1 Bible Online

DIUTERONOMI 1 - Paite Chin bible

DIUTERONOMI 1

¹Hiai thute Jordan suahlam gamdai, Paran leh Tophel leh Laban leh Hazeroth leh Dizahab kikal a Suph chin a Arabah a Mosi in Israel mi tengteng kiang a a gen ahi.

²Horeb tang a kipan Kadesh-barnea, Seir tanglam lampi tawn a pai in ni sawmlehkhat lam ahi.

³Kum sawmlina, kha sawmlehkhatna, huai kha ni khat ni’n, hichi ahi a, TOUPA’N amau hilh dia thu a piak tengteng Israel suante kiang ah Mosi in a gen hi.

⁴Heshbon a om Amorte kumpipa Sihon leh Edre-i leh Astaroth a om Bashan kumpipa Og a thah nung in;

⁵Jordan suahlam Moab gam ah hiai dan Mosi in hiai bang in a genchian panta hi:

⁶TOUPA i Pathian un Horeb tang ah a hon houpih a, “Hiai tang ah na om sawt huntawkta uhi.

⁷Kisuan unla, paikhia unla, Amorte tanggam ah leh a kimvel teng Arabah ah, tanggamte ah, phaizang gam leh Lebanon ah, Luipi Euphrates tan in pai un.

⁸Ngai un, gam k’on pekhin a; na pu uh Abraham, Isak, Jakob leh amau nung a, a suansawnte uh kiang a kichiam a TOUPA’N a piak gam valuah un,” a chi hi.

⁹Huailai in na kiang uah, “Kei kia in k’on paw zoukei.

¹⁰TOUPA na Pathian un a hon pungsak a, ngai un, tuin na tam dan uh van a aksi zah hial a hong hita hi.

¹¹TOUPA, na pi leh pute Pathian in tu sang a mun sang tamtakin hon pungsak henla, a honchiam bang in hon vualzawl hen.

¹²Bangchi’n kei kia in na buainate uh, na puakgikte uh, na kihou theihlouhnate uh ka pawzou dia?

¹³Na nam lak ua mi, mi pil, theisiam mi, a dan ding theimi kitelkhia unla, na tung ua heutu ding in ka bawl ding” ka chi hi.

¹⁴Nou, “Na thil gen kou adin a hoih mahmah” chi in n’on dawng uhi.

¹⁵Huchi in na nam heutute uh ka la a, na nam lak ua mi, mi pil a dantheimite na tung ua heutu in ka bawl hi: sangte tung a heutute, zate tung a heutute, sawmngate tung a heutute, sawmte tung a heutute, intek pente toh.

¹⁶Huailai in na vaihawmmite uh kiang ah, “Na unaute uh kal a thu ngaihkhiak sak unla, unau leh unau kikal ah leh gamdang mi, a ompih toh a kal uah diktattak in vaihawm un.

¹⁷Vaihawmna ah deihsaktuam na nei ding uh ahi kei. Mi neu leh mi lian kibang a na ngaihkhiak sak ding uh ahi. Kuamah na lau ding uh ahi kei. Vaihawmna lah Pathian a ahi ngal a. Nou adia thu haksa luate ka kiang ah na hontun zel ding ua, huai ka ngaikhe zel ding” chi in thu ka pia hi.

¹⁸Huailai in na thilhih ding tengteng uah thu k’on pia hi.

¹⁹TOUPA’N thu honpiak bang in Horeb tang apan i pawt ua, Amorte tanggam lampi a gamdai zapi leh mulkimhuaitak na muh uh i kantan ua, Kadesh-barnea khua i va tung uhi.

²⁰Na kiang uah, “TOUPA i Pathian in a honpiak Amorte tanggam na hongtungta uhi.

²¹Ngai dih ua, TOUPA na Pathian un gam a hon pekhinta hi. Hoh tou unla, TOUPA na pi leh pute Pathian in a na genkhitsa bang in va luahtou un. Lau kei unla, lunglel sam kei un” k’on chi hi.

²²Ka kiang ah na hongpai vek ua, “A gam va enkhia a, i hoh touhna ding lampi leh i hohna ding khaw tanchinte honghilh nawn di’n i ma uah mi sawl leng” na chi uhi.

²³Huai thu in a hon kipaksak a; Huchi in na lak ua mi sawmlehnih, nam khat a khat zel ka tel hi.

²⁴Huchi in a pawtta ua, tang ah a kahtou ua, Eskol guam a va tung ua, a va enkhe vek uhi.

²⁵Huai gam a theite a lou ua, a honpuak ua, tanchin a hontun ua; “TOUPA i Pathian hon gam piak hoih petmah ahi” a chi uhi.

²⁶Himahleh na hohtou nuam kei ua, TOUPA na Pathian uh thupiak na helsan uhi.

²⁷Na puaninte uah na phun ua, “TOUPA’N a honhuat ziak in hon hihmang dia, Amorte khut a honpe ding in Aigupta gam apan hon pikhia ahi.

²⁸Koilai ah ahia i hohtouh ding? I unaute’n, mihing ei sang in a lianzaw ua, san leng a sangzaw ua; khuate a lian a, vansun in kulh a nei uh. Anak tate leng i mu a, chi in a hon lung kesak uh” na chi uhi.

²⁹Ke’n na kiang uah, “Amaute kihta kei unla, lau leng lau sam kei un.

³⁰TOUPA na Pathian na makaipa un na mitmuh ua Aigupta gam a a hon hihsak tengteng bang in a hon doupih ding.

³¹Gamdai ah leng mi’n a ta a puak bang a TOUPA na Pathian un hiai mun na tun tan un lamtawn a a hon puakdan na mu ding uhi, ka chi hi.

³²Himahleh hiai thil ah TOUPA na Pathian uh na gingta kei uh.

³³Na puanin na zak ding uh hon zonsak ding leh na lampi uh hon kawkmuh dia zan a mei a, sun a meipi a na ma uh pipa na muang kei uhi.”

³⁴TOUPA’N na thugen uh a za a, a heh a, a kichiam hi.

³⁵“Hiai suan gilou tak lak a mi khat mahmah in leng na pi leh pute uh pedia ka kichiamna gam hoih petmah a mu kei ding uh,

³⁶Jephunneh tapa Kaleb kia ngallou in. Aman zaw a mu dia, a vasik gam amah leh a tate ka pe ding, aman TOUPA a lungtang tengteng a a zuih ziak in” a chi hi.

³⁷Noute ziak in ka tung ah TOUPA a heh a, “Nang leng huai ah na lut kei ding,

³⁸Na nasempa Nun tapa Joshua bel a lut ding. Amah hanthawn in, Israelte a lutsak ding hi.

³⁹Na ta neute uh, gallak in a lamai ding uh, na chihte uleh, tua a sia a pha thei nailou na tate uh a lut ding ua, amau zaw ka pedia, a luah ding uhi.

⁴⁰Nou ahihleh kihei unla, Tuipi San lam ah gamdai ah pai un” a chi hi.

⁴¹Nou “TOUPA tung ah i na khialta uhi, i hohtou ding ua, TOUPA i Pathian in thu a honpiak tengteng bang in i vadou ding uh” chi in n’on dawng ua, huchi in kidouna van in na kivan chiat ua, tang a hohtouh thil neuchik in na ngaihtuah uhi.

⁴²TOUPA’N ka kiang ah, “Hoh tou kei un. Vadou sam kei un, na lak uah ka omkei hi. Na melmate un a hon na that kha ding uh, a kiang uah chi in” a honchi hi.

⁴³Huai k’on hilh a, na ngaikhe kei ua, TOUPA thupiak na helsan zawta ua, tang ah na hohtou teitei uhi.

⁴⁴Huai tang ah Amorte’n a hon na dou ua, khuai midelh bang in a hon delh ua, Seir apan Hormah tan in a honthat uhi.

⁴⁵Na hong kiknawn ua, TOUPA ma ah na kap ua; himahleh TOUPA’N na aw uh a ngaikhe kei a, a bil leng a hondoh sam kei hi.

⁴⁶Huchi in huai a na omsung uh ngaihtuah in Kadesh ah sawtpi na tam uhi.