Read Paite Chin DIUTERONOMI 10 Bible Online

DIUTERONOMI 10 - Paite Chin bible

DIUTERONOMI 10

¹Huailai in TOUPA’N ka kiang ah, “Suangpek nih tuma lam a te bang seknawn inla, tang ah ka kiang ah hongpai inla, singkuang bawl in.

²Tuma lam a suangpek na hih khapte a thu tuangte suangpekte ah ka gelh dia, singkuang ah na koih ding ahi” a chi hi.

³Huchi in singgi sing in singkuang ka bawl a, tuma lam a bang suangpek nih ka sek a, suangpek nihte tawi in tang ah ka hohtou hi.

⁴Suangpekte ah a ma a gelh bang, na kikhopkhawm ni ua tang a mei apan TOUPA’N na kiang ua a gen thupiak sawm a gelh a, TOUPA’N a honpia hi.

⁵Tang apan ka ki heisuk nawn a, suangpek ka singkuang bawl ah ka koih hi. TOUPA’N thu a honpiak bang in huai ah a om nilouh hi.

⁶Israel suante Bene-jaakan tuileh apan Moserah ah a pai ua; huai ah Aron a si a, huai ah a vui uhi. A tapa Eleazar in amun ah siampu na a sem hi.

⁷Huai apan Gudgodah ah a pai ua; Gudgodah apan tuiluite gam Jotbathah ah a pai uhi.

⁸Huailai in tutan a TOUPA thukhun singkuang zawng a, A ma a TOUPA nasem a, A min a vualzawl sakmi hi ding in Levi chi a septuam hi.

⁹Huaiziak in, Levi in a unaute lak ah tantuan, goutan a neikei hi. TOUPA na Pathian un a kiang a a gen bang in TOUPA a goutan ahi.

¹⁰A malam mah bang in tang ah, ni sawmli ka om a; huailai in leng TOUPA’N ka thu a ngaikhia a, TOUPA’N nou a honhih mangthang kei hi.

¹¹TOUPA’N ka kiang ah, “Thou inla, mipite makai in; amaute piak dia a pi leh pute uh kiang a kichiam a ka chiam gam a luah ding uh ahi” a chi hi.

¹²Khaile, Israel mite aw, nou apan TOUPA na Pathian un a hon phut bang dang ahia, na hoihna ding ua TOUPA na Pathian uh laudansiam a, a lampi tengteng tawn a, amah it a, na lungtang tengteng uleh na lungsim tengteng ua TOUPA na Pathian uh na sem a,

¹³TOUPA thupiakte, a dante zuih dia tua thu ka honpiak zuih hilou maw?

¹⁴Ngai un, van leh van sangpente leh lei leh asung a om tengteng TOUPA na Pathian uh avek ahi.

¹⁵Himahleh na pi leh pute it bel amah kipahlam ahi a, namdang tengteng tung ah noute, amau nung a a suante uh tua na hih mah bang un a hon na telta hi.

¹⁶Huaiziak in, na lungtang vun uh sum unla, genhak nawn kei un.

¹⁷TOUPA na Pathian u lah pathiante Pathian, heutute Heutu, Pathian thupitak, hattak, lauhuaitak, kuamah deihsak tuam neilou a, golhna leng la ngeilou ahi ngal a.

¹⁸Pa neiloute leh meithaite hoihtak in vai a hawmsak hi.

¹⁹Huaiziak in, gamdang mite it sam un; nou leng Aigupta gam ah gamdang mi na hi ngeita uhi.

²⁰TOUPA na Pathian uh laudan na siam ding ua, amah nna nasem ding ua; amah na len chinten ding ua, a minlou in na kichiam ding uh ahi.

²¹Amah na phat dingpa uh ahi, hiai na mit ua na muh khitsa uh thil thupitak leh mulkimhuai takte hon hihsakpa na Pathian uh ahi.

²²Na pi leh pute uh Aigupta gam ah mi sawmsagih a paisuk ua; tuin bel tamlam in van a aksi zah in TOUPA na Pathian un a hon tam sakta hi.