Read Paite Chin DIUTERONOMI 11 Bible Online

DIUTERONOMI 11 - Paite Chin bible

DIUTERONOMI 11

¹Huaiziak in, TOUPA na Pathian uh na it un a thusehte, a dante, a vaihawmte leh a thupiakte na zui gige ding uh ahi.

²Tuin thei un, TOUPA na Pathian sawina, a thupidan, a ban hatdan, a banzak dan,

³a chiamtehnate, a thilhih, Aigupta gam sung a Aigupta kumpipa Pharo tung leh a gamsung tengteng a a hihte;

⁴Aigupta sepaihte leh a sakol leh a kangtalai tung a a thilhihte; nou a hon delhzui ua, Tuipi San a a tum sakdan, tutan a TOUPA’N a hih manthat dante;

⁵Hiai mun na tun masiah ua gamdai a na tung ua a thilhih theih dante;

⁶Reuben tapa Eliab tapa Dathan leh Abiram tung a a hih dan; lei in a kam a kata, Israel mite tengteng lak a amaute leh a inkuanpihte uh leh a puaninte uh leh a ganhon tengteng uh a valhvek dante theilou na suante uh kiang a thu gen ka hi kei hi.

⁷Na mit ngei ua TOUPA’N thil thupitak, a hih tengteng mute kiang a thugen ka hi zaw hi.

⁸Huaiziak in, na honghat ua, luah dia na vazot gam uh na luah theihna ding un, tuni a k’on piak thupiak tengteng na zuih ding uh ahi.

⁹Nawitui leh khuaizu luanna gam, na pi leh pute leh a suante kiang a piak dia TOUPA’N a kichiamna gam a na ten sawt theihna ding un.

¹⁰Huai na va luah ding uh gam, na hong pawtna uh Aigupta gam, anteh louhing huan a haichi na tuh ua, na khe ua tui na buah uh bang uh ahi kei hi.

¹¹Na valuah ding uh gam zaw, tang leh guam leh van vuahtui mu gam ahizaw hi.

¹²TOUPA na Pathian uh zonkhiak gam ahi a; TOUPA na Pathian uh mit kum thak apan kumtawp pha a tuk gige na gam ahi.

¹³Hichi ahi ding a, TOUPA na Pathian uh it ding leh na lungtang tengteng uh leh na lungsim tengteng ua a na sem dia tu a ka honpiak thupiak tengteng phatuamngaitak a na zuih uleh,

¹⁴na gam vuahtui uh a hun geihgeih in, vuahtui ke masa leh vuahtui ke nanung k’on pedia, huchi in na buh uh, na uain uh, na thau uh na seklut thei ding uhi.

¹⁵Na gante uh ading in leng na loute uah loupa k’on sawl dia, nou leng na ne ding ua, na tai ding uhi.

¹⁶Pilvang un, huchilou in zaw na lungtang uh zekhem in a om dia, na pial ding ua, pathian dangte na sem in, na be kha ding uh.

¹⁷Na huchih uleh TOUPA na tung uah a thangpai dia, van a khak dia, vuah a zukei dia, lei in a gah a piangsak kei ding. Huchi in TOUPA’N a honpiak, gam hoih apan na mangthang pah ding uhi.

¹⁸Huaiziak in, hiai ka thute na lungtang uleh na lungsim uah khum unla, chiamtehna ding in na ban uah na vial ding ua, na mit kikal uah talgakna di’n leng a om ding ahi.

¹⁹Huaite na tate uh na sinsak ding ua, na in ua na tutlai un, lampi a na pailai un, na luplai un, na thoh chiang un na gen ding uhi.

²⁰Na inn kongkhak biangte uah, na kongkhakte uah na gelh ding uh ahi.

²¹Huchi in, na pi leh pute uh piak dia a kichiamna gam ah na damsung nite uh leh na tate uh damsung nite leitung a vante nite bang in a sausak ding hi.

²²TOUPA na Pathian uh it ding leh a lampi tengteng zui ding leh amah len chinten dia phatuamngaitak a hiai thupiak nou k’on piak tengteng na zuih peuhmah uleh;

²³TOUPA’N hiai nam tengteng a hon delhkhiak sak dia, nou sang a thupizaw leh thilhihthei zaw namte gam na luah ding uhi.

²⁴Na khepek ua na sikna peuh uh nou a ahi dia, gamdai apan leh Lebanon tang apan lui, Euphrates lui apan tumlam tuipi pha in na gam uh ahi ding hi.

²⁵Kuamah in a hon phakei dia; TOUPA na Pathian un na kiang ua a gensa bang in na vasik ding uh gam tengteng ah noute kihtakna leh lauhna a omsak ding.

²⁶Ngai un, tuni in na ma uah vualzawlna leh hamsia ka koih hi:

²⁷TOUPA na Pathian uh thupiakte, tua ka honpiakte na zuih uleh, vualzawlna ahi ding hi.

²⁸TOUPA na Pathian uh thupiakte na zuih kei uleh, na theih ngeilouh uh pathian dangte be dia tua k’on thupiakte na pialsan uh le bel, hamsiat na hi ding uhi.

²⁹Hichi ahi ding a, na va luah ding uh gam a TOUPA na Pathian un a hon pilut chiang in, Gerizim tang ah vualzawlna, Ebal tang ah hamsiatna na koih ding uhi.

³⁰Ni tumna khen, Arabah a om, Kanante gam, Gilgal zawn Moreh tawsaw sik, Jordan gal a te ahi kei umaw?

³¹TOUPA na Pathian un a honpiak gam valuah ding in Jordan na kan ding ua, na luah ding ua, huai ah na teng ding uhi.

³²Tua na ma ua ka koih, dan leh vaihawm tengteng zui ding in na pilvang ding uh ahi.