Read Paite Chin DIUTERONOMI 12 Bible Online

DIUTERONOMI 12 - Paite Chin bible

DIUTERONOMI 12

¹TOUPA na pi leh pute uh Pathian in a honpiak gam na luah ua, leitung a na ten sung ua pilvang tak a na zuih ding uh dante leh vaihawmte hiaite ahi uh.

²Na valuah ding uh gam namte’n tang liante, tang neute, sing hing nuai a pathiante na a sepna mun tengteng uh na hihsiat vek ding uh ahi

³A maitamte uh na hihchim ding ua, a Aserte uh mei in na hal ding uh ahi. A bawltawm uh pathian limte na phuksak ding ua, huai a minte na hihse ding uhi.

⁴TOUPA na Pathian uh tung ah bel huchibang in na hih ding uh ahi kei.

⁵TOUPA na Pathian un na nam tengteng lak ua a min omna dia a munseh ding na zong zaw ding ua, huai ah na hoh ding uh ahi.

⁶Huai ah na haltum thillatte uh, na sawm a khatte uh, na vei thillat uh leh na thuchiamte uh, piak dia na chiamsate uh, na ut thu ua thillatte leh na ganhon uh leh na belamhon lak ua piang masapente na hontawi ding uh ahi.

⁷Huai ah TOUPA na Pathian uh ma ah na ne ding ua, na khut koihna peuh ua TOUPA na Pathian un a hon vualzawlna ah kipaktak in na om ding uh.

⁸Michih in amau hoihsak bang chiat a tuni a na hih bang ua na hih ding uh ahi kei.

⁹TOUPA na Pathian un nou a honpiak gam leh khawlna lah na tung nai tadih ngal kei ua.

¹⁰Jordan lui na galkah ua, TOUPA na Pathian un a hon luah sak ding gam a na ten ua, bit tak a na ten theihna ding ua na kim ua melma tengteng apan a hon khawlsak chiang in hichi ahi ding.

¹¹TOUPA na Pathian un a min a omsakna dia a sehna mun ah ka chih tengteng na hontawi ding uh ahi: Na haltum thillatte uh, na kithoihnate uh, na sawm ua khatte uh, na vei thillat uh leh Toupa kiang a na chiamsa uh na neihte ua a hoihpen teng n’on tawi ding uh ahi.

¹²TOUPA na Pathian uh ma ah kipaktak in na om ding ua, noumau leh na tapate uh, na tanute uh toh, na sikhapate uh, na sikhanute utoh, na in ua om, Levite toh, amau lah na lak uah tantuan leh gam a nei ngalkei uhi.

¹³Mun na muh peuh ua na haltum thillatte uh lan mawkmawk lou ding in pilvang un.

¹⁴Na namte uh lak a TOUPA’N a seh ding mun ah na haltum thillatte uh na lanzaw ding ua, huai ah thu k’on piak tengteng na hih ding uh ahi.

¹⁵Himahleh TOUPA na Pathian un vualzawlna a hon muhsak bangzel in na hinna un a lunggulh gulh uh na in chiat uah na gou ding ua, a sa na nethei ding uh. A siangloute leh a siangte’n leng sangai leh sakhi a nethei ding uhi.

¹⁶A sisan ahihleh na ne ding uh ahi kei. Tui bang in lei ah na sung baw ding uh ahi.

¹⁷Na in uah, na buh uh leh na uain thak ua sawm a khat na khuate uah na ne ding uh ahi kei. Ahihkeileh na ganhonte uh leh belamhonte uh leh na kelhonte uh lak a piang masapente ahihkeileh na utthu ua na thillat uh ahihkeileh na vei thilte na khuate uah na ne ding uh ahi kei.

¹⁸TOUPA na Pathian un a munseh ding ah, TOUPA na Pathian uh ma ah na ne zaw ding uh ahi: Noute leh na tapate uh leh na tanute uh, na sikhapate uh, na sikhanute uh, na in ua om Levite toh. TOUPA na Pathian ma uah na khut ngakna peuhmah ah kipaktak in na om ding uhi.

¹⁹Na gam ua na tensung teng un Levite limsaklou a omlou ding in pilvang un.

²⁰TOUPA na Pathian un a honchiam bang a na gam uh a hih zat a, na hinna un sa nek a ut ziak a, sa ka ne ding, na chih hun chiang un, na hinna un a lunggulh lampeuh sa na ne thei ding uhi.

²¹TOUPA na Pathian un a min omna dia a seh ding mun a gamlat luat leh, thu k’on piak bang in TOUPA’N a honpiak na ganhon uleh na belamhon lak ua na gou ding ua, na hinna un a lunggulh lampang na in uah na ne ding uh ahi.

²²Sangai sa leh sakhi sa nek a hihbang in na ne ding ua, a siangloute leh a siangte’n leng a kibang in na ne ding uhi.

²³Sisan ahihleh nelou ding in pilvang un; sisan lah hinna ahi ngal a; hinna toh sa na ne ding uh ahi kei.

²⁴Na ne mahmah ding uh ahi kei; tui bang in lei ah na sung baw mai ding uh ahi.

²⁵Na ne ding uh ahi kei. Huchi in TOUPA mit muh a thil dik na hih un noumau leh nanung ua na tate uh adin a hoih ding hi.

²⁶Himahleh na thil siangthoute uh leh lat dia na thuchiamsate kia uh tawi unla, TOUPA’N a munseh ding ah paipih un.

²⁷TOUPA na Pathian uh maitam ah na haltum thillat uh, a sa leh a sisan na lan ding ua; na kithoihna sisante uh TOUPA na Pathian uh maitam ah na sungkhe ding ua, a sa na ne ding uh ahi.

²⁸Hiai k’on thupiak tengteng limsak unla, ngaikhia un, Huchi in TOUPA na Pathian uh mitmuh a thil hoih leh thil dik na hih un nou ading leh nanung ua na tate uh ading in tangtawn in a hong hoih ding hi.

²⁹TOUPA na Pathian un na zoh ding uh namte a honhih manthat sak a, a gam uh na luah ua, na ten hun chiang un;

³⁰Hihmanthat a a omna ua na awk khaklouhna ding un, pilvang un. Hiai namte’n bangchi’n ahia a pathiante uh na a sep uh? A chih bang un en leng i chi sam ding uh, chi in a pathiante uh tungtang kankei un.

³¹Huchibang in TOUPA na Pathian tung ah na hih ding uh ahi kei. A pathiante tung uah TOUPA theih a thil kihhuai chiteng, a huat mahmahte a hihzel ua; a tapate uh, a tanute ngei uh leng a pathiante uh adin a halzel uhi.

³²Hihdia k’on thupiak peuhmah na hih ding uh ahi. Na behlap ding uh ahi kei a, na tawmsak ding uh leng ahi kei.