Read Paite Chin DIUTERONOMI 13 Bible Online

DIUTERONOMI 13 - Paite Chin bible

DIUTERONOMI 13

¹Na lak ua zawlnei hiam, mangneimi hiam a hongom a, chiamtehna hiam, thillamdang hiam a hon etsak a,

²chiamtehna hiam, thillamdang hiam a hon etsak, a hong tangtun a, na theih ngeilouh uh, “pathian dangte zui ni e, a na uh sem ni” na kiang ua a chih leh;

³huai zawlnei hiam, mangneimi hiam thute na ngaikhe ding uh ahi kei. TOUPA na Pathian uh na lungtang tengteng uh leh na hinna tengteng un na it uhia, it lou chih theihtelna din TOUPA na Pathian un a hon ze-et ahi.

⁴TOUPA na Pathian uh na zui ding ua, amah laudan na siam ding ua, a thupiakte na zui ding ua, a thugente na zui ding ua, amah nna nasem ding ua, amah na len chinten ding uh ahi.

⁵Huai zawlnei hiam, mangneimi hiam hihlup ding ahi. Aigupta gam apan honpi khia a, saltanna inn apan hon tanpa TOUPA na Pathian un zuih ding thu a honpiak lampi apan hon pialsak dia, TOUPA na Pathian uh tung a helna thu a gen ziak in, huchibang in na lak ua thil hoihlou na hihmang ding uhi.

⁶Na unaupa, na nu tapa hiam, na tapa hiam, na tanu hiam, na zi pomlai hiam, na lawm nangmah hinna bang hial nangawn in leng, hon zekhem a, kisa ni, “pathian dangte na sem ni” a chih leh; nang hiam, na pipute hiam in leng na theihlouh uh pathiante;

⁷na kimvel ua, na kiangchin ua omte hiam, na kigamlat pih deuh uhiam, kawlmong apan kawlmong khatlam pha a mite pathiante;

⁸pha na sakpih ding uh ahi kei, amah na ngaikhe ding uh ahi sam kei. Na hehpih ding uh ahi kei a, na hawi ding uh leng ahi sam kei, na im ding uh leng ahi sam kei hi.

⁹Na hihlup ngeingei ding uh ahizaw. That ding in khut na kha masa dia, huaikhit chiang in mipi tengteng in a khut uh a kha ding uh.

¹⁰Suang a na denlup ding uh ahi, Aigupta gam a saltanna inn apan hon pikhepa TOUPA na Pathian ua kipan hon pialsakna ding a zon ziak in.

¹¹Huchi in Israel mi tengteng in a za ding ua, a lau ding ua, na lak ua huchibang tatsiatna himhim a chingta kei ding uhi.

¹²TOUPA na Pathian un na tenna ding ua a honpiak na khua khat a na lak ua kipan Belial tate khenkhat hongpawt a,

¹³huai khopi a mite na theih ngeilouh uh “pathian dangte be ding in a pimang uh” chih thu kigen na zak uleh kan unla;

¹⁴ding khia unla, phatuamngaitak in dongkhia un. Ngai un, thudik a na hih a, huchibang thil kihhuai na lak ua hih ahi, chih theihtel ahihleh,

¹⁵Namsau a huai khua a tengte na hihlup ngeingei ding uh ahi. Asung a om tengteng, ganhonte toh namsau in na hih mangthang vek ding uh ahi.

¹⁶Gallak thil teng kholak ah na la khawm ding ua, khua leh gallak thil teng TOUPA na Pathian uh kiang ah haltum thillat in na hal ding ua, leivui lel ahi tawntung ding a, lamthak ahi nawn kei ding hi.

¹⁷Gallak thil bangmah na khoih ding uh ahi kei. TOUPA a heh mahmahna a kiheisan dia, chitna a hon musak ding a, a hon hehpih ding hi.

¹⁸TOUPA na Pathian uh mitmuh a thil hoih hihdia tua k’on piak thupiak tengteng na zuih peuhmah uleh nou a hon pungsak ding hi, na pi leh pute uh kiang a a na kichiam khit bang in.