Read Paite Chin DIUTERONOMI 14 Bible Online

DIUTERONOMI 14 - Paite Chin bible

DIUTERONOMI 14

¹TOUPA na Pathian uh tate na hi ua; misi ziak in na ki atkeh ding uh ahi kei. Na mitmul uh leng na metmai ding uh ahi sam kei hi.

²TOUPA na Pathian ading in nam siangthou na hi uh. Leitung a nam tengteng tung ah amah a tuammawng hidia TOUPA’N a hon tel na hi uhi.

³Thil kihhuai himhim na ne ding uh ahi kei.

⁴Hiai sate ahi, na nek theih ding uh: Bawngtal, belam, kel,

⁵sakhi, sangai, sakhi tal, sathak, gamkel, gamlawi leh gam belam.

⁶Sa chiteng, a chin ka, a chin ka paisuak, eknel hai chi peuhmah na ne thei ding uh.

⁷Himahleh eknel hailel leh a chin uh leng ka ngalte, na nekding uh ahi kei. Sangawngsau, zupi leh zusapi in eknel a hai na ua, a chin uh a kat louh ziak in nou ading in sianglou ahi uh.

⁸Vok ahihleh a chin a ka na a, eknel a hailouh ziak in nou ading in sianglou ahi; a sa na ne ding uh ahi kei a, a siluang leng na khoih ding uh ahi kei.

⁹Tui a tengte lak ah hiaite na ne thei ding uh: phe leh lip nei peuhmah na ne thei ding uhi.

¹⁰Phe leh lip neilou peuhmahte na ne theikei ding uh, nou ading in sianglou ahi uh.

¹¹Vasa siang tengteng na ne thei ding uh.

¹²Hiaite zaw na ne ding uh ahi kei: Muvanlai, mungawnggiau, mu akla;

¹³Musane, mu meika, mu chi himhim;

¹⁴Va ak chi himhim;

¹⁵Simbu, zan mu, mu chi himhim, tuipi mu;

¹⁶Simbu neu, simbu lian, simbutanglip;

¹⁷Gamdai simbu, musane, va ngawngsau;

¹⁸Tuipi, tuiva lian chi himhim, huihtun leh bak.

¹⁹Kha nei khe a pai chi himhim nou ading in sianglou ahi uh, nekding ahi kei.

²⁰Vasa siang tengteng na ne thei ding uh.

²¹Amah sih a si bangmah na nekding uh ahi kei. Na ompih uh gamdang mite nek ding in na pe thei ding uh. Namdang mite kiang ah leng na zuak thei ding uh. Nou zaw TOUPA na Pathian uh ading in nam siangthou na hi uhi. Kelnou a pi nawitui in na huan ding uh ahi kei.

²²Kum chih in na lou ua antung tengteng sawm a khat na piak ngeingei ding uh ahi.

²³TOUPA na Pathian uh laudan siamna dan n’on theihgige theihna ding un sawm a khat, na buh uh, na uain uh, na thau uh leh na bawnghon uh leh na belamhon lak ua piang masapente TOUPA na Pathian uh ma ah, a min omna dia a seh ding ah na ne ding uhi.

²⁴TOUPA na Pathian un a hon vualzawl chiang in, TOUPA na Pathian un a min omna ding a seh ding a gamlat luat ziak a nou ading a a lampi a sau luata na tawi theih kei uleh,

²⁵Sum na suah ding ua, sum na tawi ding ua, TOUPA na Pathian un a mun sehna ah na hoh ding uh ahi.

²⁶Na lungsim ua na deihpen uh, bawngtal hiam, belam hiam, uain hiam, zupi hiam, na lungsim ua na lunggulh peuhmah uh adin sum na zang ding ua; huai ah TOUPA na Pathian uh ma ah na ne ding ua, kipaktak in na om ding uhi, noute leh na inkawte utoh.

²⁷Na tenna ua teng Levite limsaklou in om hetkei un. Na lak uah amau tantuan leh goutan a neikei uhi.

²⁸Kum thum a chin kum in huai kum a na thil tung tengteng ua sawm a khat na lakhawm vek ding ua, na omna uah na koih ding uh ahi.

²⁹Na omna ua om Levite leng, na lak ua tantuan, goutan leng neiloute leh gamdang mite leh pa neiloute leh meithaite’n a ne ding ua, a hong khosa thei sam ding uhi. Huchi in TOUPA na Pathian un na khut koihna teng uh a vualzawl ding hi.