Read Paite Chin DIUTERONOMI 15 Bible Online

DIUTERONOMI 15 - Paite Chin bible

DIUTERONOMI 15

¹Kum sagih a chin kum in ngaihdamna na bawl ding uh ahi.

²Ngaihdam ding dan hichibang ahi: Leiba neimi peuhmah in a invengte a na leitawi sak a ngaihdam ding uh ahi. A invengte leng, a u a nau leng a sik teitei ding ahi kei. TOUPA khahkhiat chih a hih ziak in.

³Namdang mi ahihleh na sik teitei thei ding uh. Himahleh nou a bangpeuh na unaute un a na zat uh na ngaihdam ding uh ahi.

⁴Mi zawng himhim na om ding uh ahi kei. TOUPA na Pathian un luah dia nou a honpiak gam ah TOUPA’N lah hon vualzawl ngei ding ahi ngal a.

⁵Hiai thupiak tuni a ka thupiak tengteng zui dia TOUPA na Pathian uh phatuamngai tak a na zuih peuhmah uleh;

⁶TOUPA na Pathian un a honchiam bang in a hon vualzawl dia, nam tampi na leitawi sak ding uh. Nam tampi tung ah vai na hawm ding ua, nou tung ah bel amau vai a hawm kei ding uhi.

⁷TOUPA’N a hon gam piak na tenna ua na unaute uh lak a mizawng a om uh leh na unau gentheite lak ah na lungsim khauhsak kei unla, sumchit sam kei un.

⁸A tung uah na thilphal ngeingei ding ua, a taksap awng hukna khop na leitawisak ding uh ahi.

⁹“Ngaihdam kum, kum sagihna a hongtung dekta, chi in, na unau zawngte mudah a bangmah pe nuamlou in na lungtang uah dikloutak a ngaihtuahna omlou ding in pilvang un.” Huchilou in zaw, amau na tungtang thu uah TOUPA a sam ding ua, nou adin khelhna ahi kha ding.

¹⁰Na piak ngeingei ding uh ahi. Na piak chiang un leng na lungtang uh a nuam mawh ding ahi kei. Huchibang thil ziak in ahi, TOUPA na Pathian un na thilhih tengteng uah leh na khut ngakna peuh uh a hon vualzawl ding hi.

¹¹Huai gam ah lah mizawngte omlouh lai omlou ding ahi ngal a. Huaiziak in, Na gam ua na unaute uh tung ah, tasamte tung ah, na mizawngte uh tung ah, na thilphal ngeingei ding uh ahi, chih k’on thupiak ahi.

¹²Na unau uh, Hebru pa hiam, Hebru nu hiam, na kiang ua a zuak ua, kum guk nangmah na a sep leh kum sagih kum in na khah ding uh ahi.

¹³Na khah chiang un khutvuak in na pawtsak ding uh ahi kei.

¹⁴Na belamhon ua kipan, na phual ua kipan, na uain sukna khuk ua kipan itlou tak in na pe ding uhi. TOUPA na Pathian un a hon vualzawl dan bangzel in na pe ding uhi.

¹⁵Aigupta gam ah sikha na hita ua, TOUPA na Pathian un a hon tan chih na theigige ding uh ahi. Huaiziak in ahi, tua hiai thu k’on piak.

¹⁶Hichi ahi ding a, noute leh na inkuan uh a ngaih ziak uleh, na kihoutheih ziak ua, “K’on pawtsan kei ding,” a chih bikbek leh;

¹⁷sikzum na la ding ua, kongkhak ah a bil na vut pailet ding ua, huchi in tangtawn in na sikha uh ahi ding. Na sikhanu uh leng huchi mah bang in na hih ding uh ahi.

¹⁸Pawtsak thil haksa bang in na ngaihtuah ding uh ahi kei. Kiloh sep zahnih sem in kum guk nang na a hon sepsak khinta ngal a. TOUPA na Pathian un na thilhih peuh uah a hon vualzawl ding hi.

¹⁹Na ganhonte uh, na belamhonte uh lak a a pa, piang masa pente TOUPA na Pathian uh a tuam in na pe ding uhi. Na bawngtal uh a piang masapen nasem ding in na zang ding uh ahi kei. Na belamhonte uh lak a piang masapen mul na met ding uh ahi kei.

²⁰TOUPA na Pathian uh ma ah kum teng in TOUPA’N a munseh ding ah nou leh na inkuante utoh na ne ding uh ahi.

²¹Gensiat kai, a khebai hiam, a mittaw hiam, gensiatna om peuhmah TOUPA na Pathian uh kiang a kithoihna ding in na zang ding uh ahi kei.

²²Na omna huangsung ah na ne ding uh ahi. A siangloute leh a siangte’n sangai leh sakhi leng a ne thei ding uh.

²³A sisan kia na ne ding uh ahi kei. Tui bang in lei ah na sungbua mai ding uh ahi.