Read Paite Chin DIUTERONOMI 16 Bible Online

DIUTERONOMI 16 - Paite Chin bible

DIUTERONOMI 16

¹Abib kha tang unla, TOUPA Na Pathian uh ading in Paikan Ankuangluina din zang un. Abib kha in ahi, TOUPA na Pathian un Aigupta gam apan zana a hon pikhiak.

²TOUPA’N a min omna mun dia a seh ding ah TOUPA na Pathian kiang uah na belamhon lak ua leh na ganhon lak ua Paikan Ankuang ding in na kithoih ding uh ahi.

³Tanghou silngou soh toh na ne ding uh ahi kei. Na damsung teng ua Aigupta gam apan na pawt ni uh na theihgigena ding un ni sagih tanghou silngou sohlouh, haksatna tanghou toh na nekding uh ahi, Aigupta gam apan kintak a pawtkhia na hi uhi.

⁴Na gamsung uah ni sagih sung, na lak uah silngou muh in a om ding ahi kei. Ni khat ni nitaklam a na kithoihna sa uh zankhua in a zingsang tan in bangmah a om ding ahi kei.

⁵TOUPA na Pathian un a honpiak na omna uh koilai mah ah Paikan Ankuang kithoih in na kithoih theikei ding uhi.

⁶TOUPA na Pathian un a min omna mun dia a seh ding kia ah ahi ding. Huai ah Aigupta gam apan na hongpawt hun bang un nitaklam in Paikan Ankuang kithoih in na kithoih ding uhi.

⁷Na em ding ua, TOUPA’N a munseh ding ah na ne ding ua, zingsang in na pai nawn ding ua, na puanin uah na lut ding uhi.

⁸Ni guk sung tanghou silngou sohlouh na ne ding uh ahi. A ni sagih ni pen TOUPA na Pathian uh ading in khawmpi siangthou ahi dia, nna nasem ding uh ahi kei hi.

⁹Nipikal sagih na sim ding ua; na buhlak tung ua kipan nipikal sagih na sim ding uhi.

¹⁰TOUPA na Pathian un a hon vualzawl bangzel in na sepkhiak uh lak a noumau utthu a thillat lan in TOUPA na Pathian uh ading in nipikal Ankuanglui na nei ding uh ahi.

¹¹TOUPA na Pathian un a min omna dia a seh ding ah na sikhanute uh, na tenna ua om Levite, na lak ua om gamdang mite, pa neiloute, meithaite toh TOUPA na Pathian uh ma ah kipaktak in na om ding uhi.

¹²Aigupta gam ah sikha na hi uh, chih na theihgige ding uh ahi. Hiai dante pilvang tak in na zui ding uh ahi.

¹³Na buhphual ua kipan leh na uain sukna khuk ua kipan na sekkhawm khit un ni sagih sung bawkta Ankuanglui na nei ding uhi.

¹⁴Na Ankuangluina uah nou toh, na tapa utoh, na tanu utoh, na sikhanu utoh, na tenna ua om Levite, gamdang mite, pa neiloute, meithaite toh kipaktak in na om ding uhi.

¹⁵TOUPA’N a munseh ding ah TOUPA na Pathian uh ading in ni sagih Ankuang na lui ding uhi. TOUPA na Pathian un thiltung tengteng ah leh na khut ngakna tengteng uah a hon vualzawl dia, na vek un kipaktak in na om ding uh ahi.

¹⁶Kum teng in na pasal tengteng uh thumvei TOUPA ma ah mun a hon sehsak ding ah a kilang ding uh ahi. Tanghou silngou sohlouh Ankuang ah, nipikal Ankuang ah, bawkta Ankuang ah a kilang ding ua, TOUPA ma ah kuamah khutvuak in na kilang ding uh ahi kei.

¹⁷TOUPA na Pathian un vualzawlna a hon muhsak bangzel in michih in a zoh hun bang in a pe ding ahi.

¹⁸TOUPA na Pathian un a honpiak kulh kongpi tengteng ah na nam bangzel un vaihawmte leh heutute na kibawl chiat ding ua, mipite vai hoihtak in a hawmsak ding uh ahi.

¹⁹Dikloutakin vai na hawm ding uh ahi kei. Kuamah deihsak tuam na nei ding uh ahi kei. Golhgukna na la ding uh ahi kei. Golhgukna in mipilte mit a tawsak a, mi diktatte thu a kaikawi hi.

²⁰TOUPA na Pathian un a honpiak gam dam a na luah theihna ding un a dik kia na zui ding uh ahi.

²¹TOUPA na Pathian uh maitam na bawl chiang un a pang ah sing bangchi mah in leng Asher na bawlkhe ding uh ahi kei.

²²TOUPA na Pathian un a muhdah lam suang leng na phut ding uh ahi sam kei hi.